Агьалинан цалва тарих, материал ва рувхIаний культура кIулну дикIаву мурадрайсса хьунни РАН ДНЦ-рал (РАН-далул академик ХI. ХI. ХIамзатовлул сипталийну) Тарихрал, археологиялул ва этнографиялул институтрал сакин дурсса «Программа», цийн бувнугу Дагъусттаннал халкьуннал тарихрал-этнографиялул хъиривлаявурттайн бувну цIусса луттирду итабавкьусса. Ми хъиривлаявур­тту чичлачисса давривунгу кIункIу бувну бия этнографиялул отделданул сайки циняв зузалт, щалва коллектив.

Дагъусттаннал шяраваллавун­сса этнографиялул экспедициялул чIумал, этнографтуран хIисав хьуну бур анаварсса бущилий най душиву аслийсса культуралул, багьу-бизулул лишанну, элементру хъамабитлатаву. Мюрщи миллатирттая тIурчаннив, шиная шинайн захIмат хъанай бушиву миннаясса материал датIин, тарихрал ва этнографиялул хъиривлаявуртту даншиврул. Ми халкьуннал (хваршинцы, гинухцы, гунзибцы, зибирхалинцы ва цаймигу) ляличIийшиву, цайминнаха къалащаву дуруччин къабюхъавриву хъуннасса даву дурну дур ми кьанийн бизан баврилгу. Ялагу, хIисавравун ласурча Дагъусттаннал чансса инсантал бусса (малочисленные) халкьуннал чичрулулми аьдатру хьхьарасса душиву, ми халкьуннал тарихрайн, багьу-бизулийн бувну этнографтурал чичлачисса очеркирдансса бувагу бусса ца бакIщаращину диркIссар «полевой этнографический материал».
Школьниктурая тIурчарив, кIулссарив миннан цалва улклул, цалла шяраваллил, райондалул, Дагъусттаннал тарих, цалва тухумрал тарих, цалва халкьуннал аьдат­ру, багьу-бизу? Краеведение ла­хьхьаврил элмийсса ва методикалул центрдал бигарду щилли хIакьину биттур буллалисса? ХIакьинусса Дагъусттан му цукунсса Дагъус­ттанни?
Вай ва чIявусса цаймигу суаллансса жавабру лякъин бюхъантIиссар дуклаки оьрчIаща ябацIанну авурну щаллу бувсса дуккаврил кIива пособиялуву – 7-мур ва 8-мур классирттансса «Краеведение» луттирдаву. Ми итабавкьуну бур «БХВ – Петербург» издательствалул. Шиккува кIицI лаган, ва издательство бухлахиссар дуккавриву ишла буллансса ихтияр дусса пособияртту ва учебникру итабакьлакьисса ва дянивсса кIулшиву дулайсса дуккаврил идарарттаву дянивсса кIулшиврул программартту щаллу дуллалисса ва паччахIлугърал аккредитация дусса организацияр­ттал сияхIравун (АьФ-лул КIулшиву дулаврил ва элмулул министерствалул 14.12.2009 шиналсса 729-мур ХIукму). ЧIурчIав дан ччива вай дуккаврил пособиярттал щаллуну бугьайшиву учебникирттал кIану.
Вай пособиярттал автор ур МахIаммадов Ислам Мурадович – экономикалул элмурдал кандидат, Аьрасатнал Чичултрал союзрал член, Дагъусттан Республикалул паччахIлугърал цалчинмур классрал мяйжаннугусса маслихIатчи, 30-нния ливчусса элмийсса-методикалул ва ду­ккаврил давурттал автор, миннувух 5 монографиялул, дянивсса кIулшиву дулайсса идарарттансса 4 учебникрал ва дуккаврил пособиярттал.
Вай луттирдал дуклаки оьрчIру кIул буллай бур цалва улклул тарихращал, мунил тарихийсса гьайкаллащал, гьарцагу шяраваллил цIанихсса кIанттурдащал, экономикалущал, культуралул оьрмулущал, гьарцагу райондалул багьу-бизулущал.
Агьамсса кIану вай лу­ттир­даву буллуну бур Дагъус­ттаннал тIабиаьтрал цIанихсса кIанттурдан ва дуручлачисса гьайкаллан.
Хъинну хIаз дизансса дур раздел «Просвещение и искусство».
Вай пособиярттаву дур Да­гъусттаннал халкьунная­сса кутIасса тарихрал-этног­рафиялул очеркру, цавунгу бухла­хисса гьарцагу миллатрал тарихрал ва культуралул агьамми элементру. Вай очеркирттал цал ххишалагу ккаккан буллай бур цуксса авадансса тарих ва рувхIанийсса ирс буссарив гьарцагу миллатрал.
Вай давурттаву бувсун бур, хъунисса миллатирттая ба­къассагу, мюрщи миллатирттаягу (агъул, рутIул, цIахъюр), хIатта цал мина-гьанулул, ля­хъаврил таварих ДагъусттаннацIун къабавхIуминнаягума (оьрус, тат, азирбижан).
Лайкьсса кIану бугьлай бур шиву Дагъусттаннал художествалул хъунмасса центрданул – Оьргърал (Кубачи) шяраваллил искусствалул.
Бувсун бур ххуйсса даражалул мусил ва арцул кьай-кьуй дуллалисса центрду бивкIшиву Эндирейлив, Аксайлив, Хасавюртлив. Амма язими заргалтал ва миннал щаллу дурсса лавайсса даражалул кьай-кьуй диркIшиву Оьргърал шяраву ва Гъази-Гъумук (С.Ш. ХIажиева). Гъази-Гъумучиял округравун духлахисса 100 шяравасса 55-нниву зий бивкIун бур мусиха ва арцуха, Гъази-Гъумук 1913-ку шинал зий ивкIун ур мусил ва арцул 700 усттар тIий чивчуну бур вай луттирдаву. Бувсун бур да­гъусттаннал заргалтал цавунма цив­ппа бувххун, кIулмуний гьашиву дурну къабивкIшиву, минначIан Индийский океандалул, Средиземный хьхьирил зумардаясса ярагъуннил, чIюлушиннардал журардугу багьайсса бивкIшиву, жулва заргалтал щаллагу дунияллийх машгьурсса кьай-кьуйлул усттартал бивкIшиву.
Гьарца разделданий къа­бацIлан, вай луттирдаву був­сун бур бархъаллал ва унцIу­кIуллал усттартурая, къайтагъуллал зумунусса щащаврия, мусил ххаллай ва ттиркьюкьай щащаврия. Ислам Мурадовичлун хъамабивтун бакъар бусан чару цIуцIавриягу. Ванал, мукунма, бувсун бур ПаччахIлугърал «Лезгинка» ансамбльданиягу.
Автор оьвчаву дуллай ур дук­лаки оьрчIайн, учительтурайн шайссаксса буручлан Дагъус­ттаннал халкьуннал культуралул ирс. Му масъала ца агьаммурну ккаклай ур хIакьину Дагъусттан Республикалул БакIчи Рамазан АьбдуллатIиповгу.
Вай луттирдал ца хъинну ххуйсса ляличIишиннану дур гьарцагу объектрая буслай буна (къарал бай къаларду бикIу, аслийсса къатри, янна-ус, чIюлушиннарду дикIу) чIарав яргсса суратру, иллюстрациярду, картарду (ДР-лул карта, экономикалул карта ва м.ц.) дирхьуну душиву.
Вай давурттал щаллагу ла­хъишиврий най бур авторнал пикри, цийн бувнугу уттизаманнул шартIирдаву школардай лахьлахьисса краеведениялул дарсирдал махъа нанисса никираву граждан лишанну тарбия даврил масъала щаллу буллалиссар тIисса.
Хъунмасса умуд бур дуклаки оьрчIал цалла дунияллухсса бургаву, цалла кругозор гьарта дувансса кIулшивуртту ласунссар вай учебникирттава тIисса.
Жул пикрилий, укунсса учебникру бакъа цалва улча, цалва миллат, цалла тарихийсса ватан ххира хьун къабюхъайссар, цалла культуралул кьадру буллан лахьхьин къабюхъайссар. Укунсса луттирдайн бувну дихьлахьисса дарсру чара бакъа духхан дуван аьркинссар циняв школардал программалувун, оьрчIаву аькьлу-кIулшилул ва за лахьхьаврил культура тарбия даврил ца бутIа хIисаврай. ОьрчIахь анжагъ мукъурттийну «ххирану икIу вилла ватан, вилва улча» учаврийну цичIав къашайссар.
Шиккува учин, укунсса учебникру Аьрасатнал чIяруми регионнай (Москавлий, Санкт-Петербурграй, Ленинградуллал, Челябинскаллал областьирдай ва м.ц.) ччянива буссар.
Жу хъунмасса барчаллагь тIий буру Дагъусттан Республикалул Краеведениялул дуккаврил цалчинсса пособиярттал автор МахIаммадов Ислам Мурадовичлухь.
Умуд бур цIусса дуккаврил шинал вай луттирду республикалул школардайн биянссар тIисса, ми бияншиврулгу ДР-лул КIулшиву дулаврил ва элмулул министерствалул шаймур буванссар тIисса.
МахIаммад ХIасанов,
ДГПУ-рал тарихрал кафедралул заведующий, тарихрал элмурдал доктор, профессор
Барият Аьлимова,
РАН ДНЦ-рал Тарихрал, археологиялул ва этнографиялул институтрал хьхьичIунсса элмийсса зузала, тарихрал элмурдал доктор
Мамед АхIмадов,
«Хрюгская общеобразовательная школа» МБОУ-лул директорнал хъиривчу, тарихрал элмурдал доктор, ДР-лул лайкь хьусса учитель
Таржума
Бадрижамал Аьлиевал