Уссар МахIачкъалалив ялапар хъанай Лакку билаятрай тарбия хьусса, чаннан куна кьянкьа­сса лаккучу, Ккурккуллал Тажу­ттиннул арс Шайхов Нариман. Цаппара гьантрава Нариманнул оьрмулун 80 шин бартлаглай дур.
Нариман акъар хIакьину вайннащал, гьунттий тайннащал хъанай, ччатI кIукIлу буллай аьдат хьусса адамина. Му ур цал цала лавсъсса ххуллия акъаккайсса, мяйжаннугусса коммунист.

Шайхов Нариман шиннах къаурувгун хIакьинугу зий ур МахIачкъалаллал 11-мур гимназиялуву аьраб мазрал дарсру дихьлай. Ва гимназиялувусса ванал дарс дишайсса оьрчIан ва душваран ва хъинну ххирар, ванал инсаншиврия, мяърипатрая лавайсса хIурматрай гъалгъа тIий бур вай. Дуклаки оьрчIачIа бакъассагу, шикку зузисса преподавательтурал коллективралгу Нариманнул хIурмат-иззат лавайсса бур, мунин сававгу ванал инсаншиву дур.
ЖучIавагу хIурмат лавай­сса Нариман Тажуттинович дакIнийхтуну барча уллай буру 80 шинал юбилейращал. Ина мукуна жагьилна, хIурмат буну, оьрчIан тIул-тIабиаьт лахьхьин дуллай 90 шинавугу зунсса каши дулуннав Аллагьнал.
Виха дуаьлийсса дустурал, гьалмахтурал цIания
Амин Аьбдуллаев

————————

ДР-лул медико-социальный экспертизалул цалчинмур бюрорал хъунмур, ДР-лул цIуллу-сагъшиву дуруччаврил отличник, хIакин-офтальмолог, ХIусманнул душ Макьсудова Лариса дакIнийхтуну барча буллай буру ниттил бувсса кьинилущал.
Лариса ХIусмановна грамотнайсса специалист бушаврищал цилла даву сантирай дачин дурсса хъунмургу, дакI-аьмал тIивтIусса, инсаннал чIарав бацIан, хъиншиву дан ччисса инсангу бур.
Барча буллай ина ниттил бувсса кьинилущал, чIа тIий буру вин цIакьсса цIуллушиву, даврий тIайлабацIу, лахъисса, ххарисса оьрму. Я Аллагь, вил дакIнивусса цинявппагу мурад­ру бартлаганнав.
Виха дуаьлийсса вил даврил уртакьтал, дустал,
гьалмахтал