1950-1951-ку шиннардий хIукуматрал хIукму бувну бур педучилище бувккусса душру Дагъусттаннал шяраваллавун гьан буван, шяраваллил оьрчIан оьрус мазгу, багьу-бизугу лахьхьин буван, хъунисса, цIа дурксса оьрус чичултрал, шаэртурал чивчумунищал зунттал оьрчIругу кIул буван. Жул, КIулушацIрал, шяравун бувкIуна ца ххуйсса, иминсса, ккаккангу хъинну авур дусса душ – Мария Григорьевна Коновалова.

Шяраваллил халкьунналгу, оьрчIалгу му хъинну хIурматрай, ххарину кьамул бувуна. Мария бия ххишала бакъа интеллигентныйсса, хъинну ххуйну тарбия бувсса, ас-намус бусса душ. Хъинну ххуйну яннагу лаххайва. Жу, душру, эбрат ласлай, ванил кунна янна лаххан, ихтилат буллан ччай, ваних буруглай, ми лахьлай буссияв. Мария бия жул шяравун бивтсса баргъ ва чаннал къатта.
Тай шиннардий, та Хъун дяъвилул биян бувсса балардал халкьуннал ахIвал хъинну кIюла буккан бувну бия, лаххансса янна-ус къадикIайва, дукиялул кIюлану, мискинну бия. Мариягу жу кунма, жущал архIал ялапар хъанай бия. Ванин къакIула лакку маз, жун къакIула оьрус маз. Амма жу цаннан ца хъинну бувчIайвав. Мария бия жул пахру, жул ххаришиву. Учительница школа чIалачIисса кIанайн бияйхту, циняв учениктал танил хьхьичIун левчуну лагайва, лавчIун, ххира байва. «Здравствуйте, учительница!» тIий, цаннаяр ца хьхьичIун буклай, лечлай лагайва. Учительницал жуха аякьа дайва, ниттил кунма ххирагу байвав. Дуклаки оьрчIру хъинну вичIидирхьуну бикIайва ванил дарсирдай, ванил бувсмур лахьхьин гъира бия.
ХIурмат бусса Марияй! Ина жунма лахьхьин бувмур, жу хъинну дакIний битарду, жулва оьрчIан, оьрчIал оьрчIангу цIанакулгума ми лахьхьин буллай буру. Жун ина тачIав хъамакъабитара. Вил хIурмат, вийнсса барчаллагь хъинну хъунмассар жул дакIурдиву. Вил учениктурая хьунни яхI-намус, инсаншиву дусса инсантал. Зий бур ххуйсса къуллугъирттай. Учительтал, банкиртал, бизнесментал, инженертал, чичулт, кулпат, ичIалу бачин бувсса дадахъул. Ина эбратран лавсун, ттул шанмагу душ учительницахъулну зий бур.
Жул ххирасса цалчинсса оьрус учительницай! БучIайвав ина жучIан гьарца кьини, оьрус маз, тIул-тIабиаьт лахьхьин дан, дунияллул хаварду бусан. Жугу ххари шайссияв, ина пиш куний, пашман шайссияв, ина пашманну буний. Жун вил дяъвигума къаччан къабикIайва. Ниттил кунма жу ххирагу байвав, жу дарс лахьхьирчан, марцIну чичирчан, янна-ус марцIну бучIарчан, ина хъинну ххари шайвав. Аман, дияча царай чIунну, лаххансса янна дакъанугу, бачIва ччаннахь занарчангу, буччиннин букан ччатI бакъанугу, дакIру дикIайва ххарину.
Биялсса захIмат бивхьуссар жул цалчинсса учительницал, ва кунмасса цайминнал кIул бакъасса кIанай, цамур маз, цамур культура дусса инсантурал дянив зий. ХIазран дакъархха Мария Григорьевна кунмасса оьрус учительницахъан Дагъус­ттаннал хъуншагьрулий гьайкал дацIан дурсса. Вайннал бувмургу жунма хъамабитан къабучIир, къалайкьри!
Жул шяраву зий Мариял 12-13 шин дурна, лавхьхьуна лакку маз. ЦIанакулгу ххуйну гъалгъа бай лакку мазрай. Цилва оьрчIангу, оьрчIал оьрчIангу лакку маз лахьхьин бунни.
Мария шяраву ххира хьуна хъуниминнангу, мюрщиминнангу.
Жул бутталгу, шяравусса оьрмулул бугьарасса инсантуралгу учайва: «Ва оьрус душнил мяърипатрал, яхI-намусрал ххуйшиву, тарбия бувсса ххуйну. Къумасса кIичIираву хъунасса инсан чIарах гьаннин, тинмай хьуну, ххуллу булай, бивзрув, бурув учай. Аман, хьурдай жула ва душ буцинсса оьрчI», — тIун бикIайва. ТалихIгу Мария Григорьевна Коноваловал хьуссар жул шяраву, хIурмат лавайсса, Совет Союзрал Виричу Ризван Сулайманов хъуна хьусса кулпатраву. Мария щар хьуссар Ризваннул уссин Насруллагьлун.
Мария Григорьевнан 20-мур июльданий хъанай дур 85 шин.
Жул ххирасса Мария Григорьевнай! Барча буллай буру ина ниттил бувсса кьинилущал. ЧIа тIийгу буру цIакьсса цIуллушиву, 100 шинайсса оьр­му, Насруллагь Башировичлущал. Я Аллагь, зу зулва оьрчIал, оьрчIал оьрчIал талихIрал, цIуллу-сагъшиврул ххари буллай битаннав. Зул симандалия пиш, ххаришиву тачIав чан къахьуннав. Зу уттинин бувсса хIат-хIисав дакъасса захIмат хайрданийн букканнав.
Щалвагу дунияллул неъматру вингу, вил ичIуссаннангу чIа тIисса, КIулушацIрал шяраватусса вил учениктурал цIания Зоя ХIамидова