Саха (Якутия) Республикалий уттигъанну хьуссар регионнал дянивсса конференция «Роль матери в развитии институтов гражданского общества» цIанилусса конференция. Мунивух гьуртту хьун Да­гъусттанная лавгун зана хьунни «Матери России» Щалвагу Аьрасатнал жяматийсса суккушиннарал Регионал отделениялул председатель МахIаммадова Таиса.

Бадрижамал Аьлиева
Ваниял бусаврийн бувну, конференциялул давривух гьуртту хьуну бур му суккушиннарал 12 региондалул отделениялул вакилтал, мукунма Дальневосточный ва Сибирнал Федерал округирттаясса.
Июльданул 8-нний конференциялувух гьуртту хъанахъими хьунабавкьуну бур Москавлив, хъиривмур кьини щалва делегация Москавлия левххун бур Якутскалийн. Хъамал «Якутск» аэропортрай хъинну ххуйну кьамулгу бувну, гостиницардай рахIат бувну бур.
Хъиривмур кьини, яни июльданул 10-нний, конференциялул лагрулуву, ХIукуматрал Къатраву Саха (Якутия) Республикалул БакIчи Егор Борисов хьунаавкьуну ур «Матери России» Щалвагу Аьрасатнал жяматийсса суккушиннарал Председатель Валентина Петренкощал, мукуна му суккушиннарал регионнайсса отделенияр­ттал каялувчитуращал.
Мура кьини хьуну дур конференция шадлугърай тIитIлатIисса батIавугу. Конференциялий Таиса Билаловнал бувну бур доклад «Роль Регионального отделения Всероссийского общественного движения «Матери России» в жизни Республики Дагестан» цIанилусса.
Му кьини хьуну бур хъунмасса «ккуркки столгу», «Ответственное родительство – как механизм защиты прав и законных интересов ребенка» цIанилусса. Мунивухгу гьуртту хьуну бур Таиса Билаловна, «О практике реализации Закона Республики Дагестан «Об ответственности родителей за воспитание и обучение детей» темалущал.
Конференциялул хIасиллайн бувну, дурну дур рекомендацияртту.
«Роль матери в развитии институтов гражданского общества» конференциялувух гьуртту хьун Аьрасатнал личIи-личIисса регионная бувкIминнан хIадур дурну диркIун дур хъуннасса культуралул программагу. Мунийн бувну, вай бивну бур Якутскаллал культуралул Центрдайн, Ниттил скверданийн, Ниттил гьайкалданучIа тIутIив дирхьуну дур, сайр бувну бур «Михаил Светлов» теплоходрай, бивну бур «Сокровищница Якутска» выставкалийн, «Царство вечной мерзлоты» туристический комплексравун, Ярославскийл цIанийсса музейравун, Медициналул Национальный Центрданул РБ №1 Перинатальный центрданийн.
Саха Республикалул БакIчинал резиденциялуву гьанттайнссаннуйн бавтIсса кIанай Валентина Петренко бувккун бур якьутнал хъуни алмазирттавасса цаннин «Матери России» суккушиннарал цIа дизарча хъина тIисса пикрилущал ва мунищал махъмигу рязий хьуну бур. Егор Афанасьевичгу му пикрилуцIун авкьуну ур. Цалва ихтилатраву ванал лавайсса кьимат бивщуну бур «Матери России» ВОД-рал даврин ва кIицI лавгун бур му суккушиннарал дуллалисса даврил бияла, гуж хъунмасса бушиву.
Валентина Александровнал барчаллагь увкуну бур «Роль матери в развитии институтов гражданского общества» конференциялувух гьуртту хьусса цинявн­налвагу цIания ва республикалий кулпатрал политика щаллу даву, жяматийсса суккушиннардил чIарав бацIаву мурадрай дуллалисса давурттахлу.
Ахирданий Егор Борисовлул Валентина Александровнан дуллуну дур Саха Республикалул ларайсса награда – Знак отличия «Гражданская доблесть». ЧIа увкуну бур конференциялувух гьуртту хъанахъиминнан буллугъсса даву, тIайлабацIу.
Ххишала бакъа тIааьнсса, дакIнийхтунусса асардал вибувцIуну, чаннасса, ххарисса пикрирдащал зана хьунни ва республикалия Таиса Билаловна.
— Саха (Якутия) Республикалий бувсса 4 гьантлий бигьалавгунна щаллусса зуруй кунма, мукссава хIаллай къабатIинуксса чаннасса, гъилисса асардал дакIгу дурцIунни. Ттун тукунсса «прием», бургаву, хъамал ххирашиву, минначIансса личIлулшиву чувчIав ккарккун бакъара. Конференциялул гьарцагу гьурттучинацIун цIакь увну ия ца-ца инсан. ТтуцIун цIакь бувну бия му республикалул оьрчIал ихтиярду дуруччаврил уполномоченный. Москавлийсса, Москавлия Якьутиянавунсса, миччагу цалла-цалла регионнайнсса ххуллул харж-хурж щаллуну цайнна ларсун дия вайннал. ХIатта аэропорт­рая гостиницардайн биян буллайгума машинартту бия, мукунсса къулагъас вайми кIанттурдайн лавгни къадикIай. Республикалий мукунсса аваданшиву, мукун авадансса культура дияхха, жух мукунсса бургаву дияхха, махъругума биял хъанай бакъар ми цимурцаннуя бусансса. «Матери России» ВОД-лул му республикалийсса Регионал отделениялул председатель Прасковья Петровна бур Республикалул БакIчинал кулпат. Амма хъинну хIаласса, хъуннасса дакI, пахру-ххара бакъасса хъамитайпа бия, махъсса гьурттучитурая хъис личIи бакъа, хIалану-гьурттуну бия цимурцаннувух.
Хъунмасса ва дакIнийхтунусса барчаллагь ва Рес­публикалул каялувшиннаран, ва конференция хIадур бувминнан, — буслай бур Таиса Билаловна.