Ккурккуллал шяравасса дур­ккучу Аьбдуссалан Магьдиев­лул «Илчи» кказитрай укун чивчу­ссия:«Халкьуннал кIулшиврул ми­нис­терствалучIа бур мазралсса, чичрулулсса, учительтуралсса буллалисса кIива идара.

Вайннул цалва буржру хъирив лавну, щаллуну биттур буллай бивкIссания, мазрал ва чичрулул вайксса цанийн къабукIлакIисса оьзрурду къаби­кIанссия. Универ­ситетир­ттавусса миллатирттал мазурдиха зузисса группардугу вай масъаларттал хъирив лавсса учительтал итабакьлай чIалай бакъар» («Илчи».№ 36,2011). ТIай­лассар, цалийн къа­букIлакIисса оьзрурду гьарзану бур. Луттирдаву хаснува. Жунма кIулссар гъалгъалул бутIа причастиялул шаннагу чIумуйсса даву ккаккан дайшиву( глаголданул лишанну хIисаврай). 150-сса лажиндарай («Лакку маз»,5-6 кл.,2011) кIива чулух «Причастие» тIисса темалун хасну чирчуну дур цаппарасса калимартту. Мичча чичинна причастиялун хасми: кIяла бишлашисса, щюлли хъанахъисса, ккуркки лаглагисса, гьарта хъанахъисса. Шикку -ССА суффиксирттащалми мукъурттил ккаккан дуллай дур чIумуй хъанахъисса даврил лишанну. Вай бур причастиярду. При­лагательнирду личIири. Миннул дур затрал муданнасса лишан: щюллисса… Мура темалун хасну, мува луттирал 178-мур лажиндарай дур укунсса чичрурду: «ДакIний битияра: прилагательнирал затрал муданнасса лишан ккаккан дай­ссар, масала: хъахъисса чIапIив (муданма хъахъисса), хъахъи бишлашисса чIапIив (цIанасса чIумал хъахъи бишлашисса чIапIив, ягу хьхьичIва хъахъи бивщусса, ягу махъату хъахъи бищунтIисса чIапIив)». Ванийн учайссар прилагательнирал ва причастиялул ца­чIусса ккурч. «Бишлашисса», «бивщусса», «бищунтIисса» шаннагу чIумуйсса причастиярдур, прилагательнирал лишаннавух хIала бакьлангу къааьркинссар. Вана «Оьрус мазрава лакку мазравун бувхсса прилагательнирду чичаврил кьяйдарду» тIисса параграф («Лакку маз».6-7 кл. 2011, лаж.75-76.). Шикку 3-мур абзацрай укун тIий бур: «Бюхъайссар цаппара прилагательнирду кутIа бувну чичингу: Коммунист партия, ятIул ттугъ, щюлли уртту. «Коммунист» тIимур махъ бур оьрус мазрава жулва мазравун бувхсса кутIа прилагательное. «ЯтIул, щюлли» тIими махъругу оьрус мазрава жулва мазравун бувхми кунма, архIал чивчуну бур. Вара тагьар дуссия ванияр хьхьичI итабавкьумур луттирайгу. 8-9-сса классирттан итабавкьусса «Лакку маз» учебникрай ( лаж. 51, 2009) дуссар укунсса правило: «ЦIанил кутIа дур связька дусса чIумал, подлежащилул ва сказуемилул дянив тире (хъун аьш) къадишайссар, масала: Муса хIухчур, кIилла кIива мукьвар». Шикку «хIухчур», «мукьвар» кусса му­къурттивусса Р-рду связькардур. Укунсса правило дунагу, ванил тIалавшинна дурурччуну дакъар вай лажинтирттайсса калимарттаву: 58,11, 43, 189, 20, 109, 144, 44, 42 («Лакку маз»,10-11кл.) ; 37, 5, 204,15, 143 («Лакку маз», 8-9 кл.). Шикку «кIилла» тIисса махънияр хъинну бакьинссия «кIилва» куну, чичирча: кIилва кIива мукьвар. Луттирай дур укун дурсса чичру, яни «лахъаву» тIисса махъ бутIрайх бавчIуну бур укун: лахъ-а-ву. Лахъ-(мархха), -а-(суффикс), -ву (дайлитIу) («Ла­кку маз», 2012, 5 кл., лаж.138). Мукун бутIрайх бачIаву къатIай­лассар. Ласунну цалавхьхьусса махъ: аьтIаву. Му мукъуву (ца тIайлабацIулун!) -АВ суффиксну, -У дайлитIуну ккаккан бувну бур (5 кл., лаж.35). Мури тIайламур. Цанбакъарча, кIа махъ падежир­ттайх баххана буллалийни, ахирданийсса –У баххана хъанай бур: аьтIаву – аьтIав-ри-л( гъ.п.). Му­къул бутIрая тIий уна, ласунна ца­ппарасса суффиксру ттигу. ЧIявусса цалий къабавцIусса гъалгъарду бур жулва луттирдай -ШИВУ ва -ШИВ суффиксирттал хIакъираву. Масала, лакку мазраву существительнирду хIасул шайссар тIий бур -ШИВУ суффиксрал кумаграй: марцI-шиву, оьрчIшиву, цашиву. Суффикс -шиву ( лаж. 10), суффикс -шиву ( лаж.137) ( «Лакку маз», 2012, 5 кл.) – укун къатIайлану ккаккан бувсса суффиксру чIявуну хьунабакьлай бур луттирдай. ТIайла­шиврул чулуха (мяйжаннугусса суффикс -шив бушиву ккаккан буллалисса), эбратрансса кIира таблица дур луттирдай ( лаж.172, 5 кл.), (лаж. 11, 6-7 кл.). ЦачIу бишинну: «Суффикс -ШИВ лакку мазраву чIявуну ишла баймурди, ва суффикс лачIун бувну сакин байссар махъру существительнирдая, прилагательнирдая, наречиярдая ва глаголлая: марцIшиву, оьрчIшиву, хIаллихшиву, тIайлашиву» («Лакку маз», 2008, 10-11 кл. лаж.50). Бур ва правилолун хасъсса мисаллу: лахъ-шив-у (лаж.11), паракьат-шив-у (лаж. 37), ссят- кар-шив-у (лаж.45) (Буржунов Гь., Аьбдуллаев М. «Лакку маз» 6-7,2011). Вай цимурцаннул ахирданий учин бюхълай бур (на хьхьичIмур бутIуву къаувкуссия) «суффикс цIусса махъ хIасул бан ишла байсса мукъул бутIар» (хаснува «мархлул хъиривсса» къатIийна). ДайлитIулул определение хIисаврайгу «Мукъу­вусса баххана шаймур бутIуйн дайлитIу учайссар» къатIийна (хаснува ца махъ гамуницIун бахIайни дакъа мукъул мархлуву­сса тIиртIу хIарпругу даххана къахъанай духьувкун: мачI-мучIал, барцI – бурцIил, мяр – мюрал…), учин аьркинни «мукъул ахирданийсса баххана шаймур бутIуйн», куну. «Мукъувусса» учин кIанттай «мукъул ахирданийсса» тIий. МахIатталсса затру бур жулва учебникирттай. Къаххуйри тIий­кун, аьлимтал гьалак бичлай бур. Жунгу укунсса луттирдая жулва оьрчI-душварахь дарсру дихьлай ччай бакъар. Цукун кьамул хьунтIиссар вай чичрурду: «1965 шинал буккан бувну бур П.К.Ус­лардул сакин бувсса лакку мазрайсса цалчинсса букварь: « Казикумухская азбука». …1965 шинал П.К. Услардул литографиялий бивщуну буккан бувну бур «Лакку маз». Ва лу кIилчин бивщуну бур Ттуплислив 1890 шинал»? ( !).( «Лакку маз», 10-11 кл., лаж.88). Цалчин, «букварь» кусса мукъул махъ кIикIунтI бишаврил сававгу дурчIлай дакъар. КIил­чингу, туну, 1965 шинал итабавкьусса лу кIилчин бивщуну бур 1890 шинал (!). Ци къашай ва дунияллий! Магьлуву кунмасса хавар бур. Ласунна ца предложение чIяру­ссаннува: «Ттун дахьва утти бувчIуна, (ци? ) инсан кIул хьуннин, цIил гьиву дукайссар тIисса учалалул мяъна» («Лакку маз», 10-11 кл. лаж. 190). Шикку тIайласса лакку маз хьунтIиссар, укун чи­чирча:«Ттун дахьРА утти ДУР­чIуна (ци? ), «Инсан кIул хьуннин, цIил гьиву дукайссар» тIисса учалалул мяъна». Дахьра дурчIуна мяъна – укунни жува учайсса, «дур» группалий бакьин бувну. Ттун къадурчIуссар титульный чIапIуй укун чичаврил мяънагу: «Дагъусттан Республикалул ду­ккаврил ва элмулул министерствалул цIакь бувссар» ( 10-11-кл., «Лакку маз»). Шикку запятая ххишалассар. Цайми луттирдай «дуккаврил» кусса махъ хъунмур хIарпирай (Дуккаврил) чивчуну бур. Ялавагу шикку муданма хъунмур хIарпирай чичин аьркинмур махъ хъанахъиссар, цумур кIанттай бухьурчагу, «Министерствалул» тIи­мур. Юх, луттирдайсса гъалатIру вайннуйну къуртал хъанай бакъар. Причастиялуву прилагательнирал хасиятру дуссар тIий, чивчуну бур: «Прилагательнирал: затрал хасият ( зузисса инсан), группа ва число хIисаврай баххана шаву (увкIсса оьрчI, бувкIсса душ, бувкIми оьрчIру (душру)»( «Лакку маз»,6-7 кл. лаж.177). «Зузисса инсан» кусса мукъурттиву «зузисса» тIимур хасият ккаккан дуллалисса прилагательное бакъархха. КIа махъ бур причастие. Ялунгума затрал цу­кунчIавсса хасият мунил кка­ккан къадуллалирча, дуллалисса даву (глаголданул лишан хIисаврай, цур­гу причастиялун хасъсса) кIицI лаглай, инсан зий ушиву буслай бур. Хасиятру укунссар дикIайсса: иминсса, адавсса, тяхъасса, тарсъсса, танмалсса… «УвкIсса», «бувкI­сса», «бувкIми» тIисса махъругу группа ва число хIисаврай баххана хъанахъисса прилагательнирду бакъар. ЦачIу бишинну: «…причастиярду группа ва число хIисаврай существительнирдацIун бавкьуну бикIайссар: увкIсса оьрчI, бувкIсса душ, дуркIсса щарсса…» («Лакку маз», 6-7 кл. лаж.188). Причастиер­дан хасну ца зат ттигу кIицI бан багьлай бур. «Причастие существи­тельнира­цIун бавхIуну, ганил хьхьичI бикIайссар. Масала: бусай хавар, чичай чагъар, учай махъру» («Ла­кку маз»,10-11 кл. лаж. 108-109). Укунсса правило хьхьичI дунагу, ялавай бур укун тIий: деепричастиерду буслай, чичлай, ласлай существительноердал хьхьичI буний — причастиярдур. Чичлай ча­гъар экьи бувтунни. Буслай хавар бацIан бунни. Вай тунтну чивчусса махъру кутIа причастиердур тIий бур. Вай махъру кутIа причастиердуну би­кIайсса укунсса чIумалли: чичай, чивчу, чичинтIи (чагъар тIисса мукъущал); бусай, бусласи, бусантIи (хавар тIисса мукъущал). «Наре­чиярду сакин шаву» тIисса параграфран хас дурсса таблицалий «существительнирдал зунххи падежирттаяту» куну, чивчуну бур укунсса мисаллу: кIюрх-кIюрххил, кIюрххицIун; хьхьу-хьхьувай, хьхьудяризал; гъе- гъенттул. («Лакку маз», 10-11 кл. лаж.117). Шикку цавагу махъ бакъар зунххи падежрал пурмалий существительное кка­ккан буллалисса.. « Предложение сакин шайссар личIи-личIисса мукъурттия. Ми махъру мяъна ва грамматикалул кьяйдартту хIи­саврай кунницIун ку бавхIуну ягу бавкьуну бикIайссар», — укун чивчуну бур 10-сса лажиндарай («Ла­кку маз»,8-9 кл., 2009). Микку банмур бакъассар: къашайссар ца цуппалусса махъ, цувгу предложениелун ккаллисса, «кьяйдартту хIисав­рай» кунницIун ку бахIин. КIюрх. Гъарал. УвкIунни. Ларсунни. Вай махъругу батIу-батIулсса предложениерттан ккаллиссар. Башттан­на дакъа хьуну дур жулва луттирдава (5-6-7-8-9-10-11 кл.). «Ца ягу цаппара къуртал хьусса мяъна ккаккан дуллалисса мукъурттийн предложение учайссар» тIисса определение. Башттанна (сайки 30-40 шинай) цIакь хьуну дур жулва луттирдай укун къалпсса чичру: «Гьа­нулулмур мукъухун суал бишайссар гьанулул бакъамуния» («Лакку маз». 5 кл., 2012, лаж.25). Башттанма цIакь хьуну бур луттирдаву универсальный махъру: «жула», «цила», «цала», «щала», «ттула». Жулва мазраву бувагу бакъасса хханссар «жулла», «жулва», «цилва», «щалла», «цалла», «цилла», «ттулва»,» «ттулла» тIими махъру. Ми учебникирттаву хьунакъабакьай. Цай­миннан дарсруну хъанахъисса учебникирттай цимирагу предложение дур дагьайний лишанну къадирхьусса. Ласунна ца. «КIукун предложение сакин дуллалисса предложениялул бутIрину ккалли хъанахъисса цачIун хьусса ку­нницIун ку бавхIусса кIива ва ххишаласса мукъуйн бавхIу махъру учайссар» («Лакку маз», 8-9 кл. 2009, лаж.10). Шикку запятойрду щил дишинссарив къакIулли. Вай лувми предложениярдава аьркин дакъасса запятойрду щил дукьан дантIиссарив – мугу къакIулли: Хьхьувай ххуллулссаннал хъунма­сса тIаннул къувтIи бивчуна, ва щала вацIа чаннал пперхха тIун бивкIуна. Ссут гъан хъанай дия, ва мурхьирдайсса чIапIив хъахъи лаглан бивкIуна. Цалчинмур журалул мисаллавусса сложносочиненный предложениярду хъанай дур, ва кIайннувусса простой предложениярду…(«Лакку маз», 8-9 кл. лаж.138). ХIатта союз «ВА»-лул махъ запятая дирхьусса кIанттугу кIа ялув чичав. «ЦIаку предложениярду» тIисса параграф дусса лажиндарай (10-11 кл. лаж.84), цIаку предложениердур тIий, мисалдаран ларсун дур укунсса калимар­тту: Баргъ пар-пар тIий бия. Дур­кIуна дарусса кьинирду. БакIуйгу дур ца ххюцIалва къатта бусса мащи (лаж.85). КIулсса куццуй, цIаку предложениердал ларгсса ягу дучIантIи чIун ккаккан къадайссар. «Масала: ссут дия, ссут дур, ссут дучIантIиссар учирча, вай цIаку предложениерду къахъанахъиссар», — укунсса був­чIин бавугу дурну дур мура параграфрай. Дакъархха личIишиву: ссут дия – мащи дия — баргъ бия (ларгсса чIун); дуркIуна – ларгсса чIун. Хаснува цачIун хьусса (сложные) предложениерттая чичларча, тамансса чIун харж хьунссар. Аьр­кинну бур учебникру багьайсса куццуй «кIучIин». Укунсса тагьар дакъассар цайми миллатирттал учебникирттаву. Луттирду вайва гъалатIирттащал ялагу-ялагу бишлашаврин багьайкунсса къадагъа дан дур. Сакин буллалиминнаяту­сса тIалавшиннагу кьянкьа дан. Къачирчусса рецензиярттугу (ми чирчумагу акъассар), «чирчу­ссар» тIий, къачичлан. Чирчуну диркI­хьурча, мисалдаран, ци тIий бурив ххал бан, ца дунугу рищун аьркинни «Илчи» кказитрай.

Исмяил ХIусманов,
отличник народного
просвещения
ш. Бархъал — ш. Москвав