Лакку улча щавари хьусса кьини

srabatul_1Лаккуй шану нахIусса бияй. ЦIан-чаннаву бизарчагу, чурхгу таза-тяхъану бикIай. Амма ва кьинирив чурхгу кIуну бия, дакIгу къуману. ЧIавахьулу тIитIайхтува кIюрхнил дюхлулул ттюнгъану ках кунни лажиндаравух.

Бургъил тIинттугу дур зунттал мицIайн хъямала дагьлай. МарцIну някIсса ссавнийх ппив хьуну дур памма кунна кIукIлура-кIукIлусса ттуруллал къурхъру. Ххирар ттун Лаккуйсса кIюрх. Амма хIакьинумурдив дакъар вайминнуха лархьхьусса — чIаврдайх ккуру най бур мукьал кIунтIру. Тарихрал цIа ларгсса Ла­кку билаятрайн вилаххав душмантурал ккуллардал чявхъа бувтIусса кьинир хIакьину. Аьрщи-чарура щавари дурсса, гъидядизулий тIуркIу тIисса уртту-тIутIира някI микIиран даркьусса кьинир. Лакку улча ряха язисса арснацIа хьусса, жагьилсса 6 кулпатрал оьрмурдайх бурса бавкьусса, 15 оьрчI ятинну ливчIсса кьинир.
Цимил душларчагу, чатIа багьлантIисса хъякру райондалул тарихраву дагьсса кьинир. Кисайлулу кIучI дарча дакъасса, оьрмул-оьрмулухун хъин къахьунтIисса щавур, ссахун-дунугу дахчуну кисай ялтту дагьну чIаракIлу щурча, цIунтIисса, цIурхьхьу тIунтIисса. Так каленьдарданува дакъа, оьр­мулува руцан дан къахьунтIисса кьинир. ДакIнийн рутлангу ламусъсса, дакIнива дуккан дангу къахьунтIисса кьинир.
Ларгунни 2 шин, ларунни гьа­ттардий аьрщи. Амма лухIи ликкан бувасса ниттихъул, щахъами, ссурвал хьунабавкьукун, вайннал иттав бурган ттигу сислай бакъар яру. Ятинну хъуни хъанахъисса оьрчIру ккавктари ччучлайнна дур дакIру. Ци-цигу оьсса кьинирду дурхIусса Лакку улклул кьюлтI увкунни цилла къюкIливу хъуни бувминнал цинна дурсса ва лавмартшивугу. Ххассал хьувивавли лавмартътал хъин бивтсса шяраваллал агьлу Лакку улклул нааьналуща?
Зулайхат Тахакьаева