Рамазаннул арс Рамазанов МахIаммад-Рамазан увну ур июнь зурул 1-нний 1925 шинал ЧIяйннал шяраву хъудугьул кулпатраву.
Ванал ппу АьбдурахIманов Рамазан ва нину Сюлтанав бивкIун бур колхозниктал, шяраву бусравсса, яхI-намусрал щаллусса хьхьичIунсса захIматчитал.Вайннал бувну бур 4 кулпат: МахIаммад, АбутIалиб, МахIаммад-Рамазан ва Маржанат. Хъинну кьянатсса, ккашилсса, дахьра колхозру ччаннай дацIан дурасса шиннардий хъунмасса захIмат бувну бур вайннал, кулпатругу хъуни бувну, миннал дагьайсса кIулшиву ласун бан.
Уссу АбутIалиб, Буйнакскалийсса педагогикалул училищагу къуртал бувну, райондалийсса давурттай зий ивкIун ур. ЧIивима уссу МахIаммад-Рамазан, къатта-къушлилссагу буллай, дарсирайн занай ивкIун ур.
1941 шинал хушрай кIиягу уссу дяъвилийн лавгун ур. МахIаммад-Рамазаннул, къатлул маэшат щаллу баншиврул, 9-мур классраву дуклай унува, Ккуллал райондалул комсомолданул комитетрал учетный отделданул заведующийну зий ивкIун ур. Июль зуруй 1942 шинал ванал ХIурматрал грамоталущал къуртал бувну бур 10 класс, ЧIяйннал дянивмур даражалул школалул итабавкьусса 2-мур выпускрал оьрчIащал.
Школардай дарсру дихьлай бивкIсса ххаллилсса учительтал хушрай немецнал чапхунчитуращалсса дяъвилийн лавгун, щархъавусса байбихьулул школардай учительтал биял къахъанай бушиврийн бувну, райондалул хъуниминнал хIукму бувну бур 10 класс ххуйну къуртал бувсса цаппара 2-чинмур выпуск­рал учениктал щархъавун дарсру дихьлан тIайла буккан. ЗахIматсса, ккаши багьсса дяъвилул шиннардий цахьра дарсру дирхьусса учительтурал лахьхьин бувмур зия къахьун хъунмасса хIарачат буллай бивкIун бур вай ялув суратрай кIицI лавг­сса къинттуллухсса захIматчитал, дяъвилул арсурвавран кIулшиву дуллай, гайнная хIукуматран лайкьсса вирттал буллай. Вайннал бувсса захIмат зия хьун къабивтун, дяъвилул шиннардийсса оьрчIая бувккунни ххаллилсса пишардал усттартал, элмурдал доктортал, профессортал, аьлимтал, захIматрал вирттал ва мукунма цаймигу.
МахIаммадрамазангу, школагу къуртал бувну, 1942 шинал август­рая, 1946 шинал сентябрьданийннин дяъвилул иширттал дарсру дихьлай ивкIун ур райондалийсса школардай (ЧIяв, Ваччав, Хъювхъав, ЦIуйшав).
ЧIивисса оьрмулий ванал учительшиву дуллай 4 шин дурну дур.
Август зуруй 1950 шинал къуртал бувну УзбакIнаву Ташккантуллал юридический институтгу, МахIаммадрамазан увкIун ур Дагъусттаннал прокуратуралийн даврил хъирив. Ва ивтун ур МахIачкъалаллал прокуратуралул халкьуннал следовательну.
ЛичIи-личIисса давурттай зий Дагъусттаннал прокуратуралий МахIаммадрамазаннул дурну дур 17 шин.
1967 шинал партийный органнал хIукмулийн бувну, милицанал органнал даву ххуй шаву мурадрай, МахIаммадрамазан гьан увну ур МООП-рай зун МВД (Министерство общественного порядка). Мичча ва майорнал чиндалуву запасрайн тIайла увккун ур. Муния мукьах личIи-личIисса хIукуматрал идарарттай юристну зий 2006 шинайннин МахIаммадрамазаннул аьмну хъанай дур 65 шин захIматрал стажрал.
Миннувату РПО Дагрыбпромрай – 10 шинаяр ххишала, мичча пенсиялийнгу увккун ур.
Муния махъ зий ивкIун ур Дагъусттаннал элмийсса центрдай. Шикку зий ванан дуллуну дур Аьрасатнал элмурдал академиялул ХIурматрал грамота.
Чув зий ивкIун ухьурчагу, МахIаммадрамазаннул дуллай ивкIсса даврия хъинну пахру бансса характеристикартту дуллуну дур.
Лажин кIялану бувсса захIмат­рахлу ванан дуллуну дур Республикалул Прокуратуралул, ДАССР-данул Президиумрал Верховный Советрал ва цаймигу идарарттал ХIурматрал грамотартту ва цаймигу бахшишру, лайкь хьуну ур 8-рахъул медаллан ва хIурматрал лишаннан.
МахIаммадрамазан рязийну ур цалва бувтсса оьрмулул ххуллия, эшкьи-ччаврий бувсса ташулия, яру душ Аьйшатлущал (аьпа баннав цил) 62 шинай бувтсса хIалимсса, куннан кув ххирасса оьрмулия.
Вайннал бур арс Евгений ва душру Саида ва Галина. Шамунналвагу къуртал бувну бур Дагъусттаннал политехнический институт.
Ванийну гьашиву къадурну, буттал пиша ххуй бивзун, душнил Саидал къуртал бувну Ленинградский университетрал юрист шайсса отделениягу, зий бур адвокатну. Арснал къуртал бувну Аьрасатнал МВД-лул Лаваймур академия, зий ур Дагъусттаннай полковникну.
Барча уллай ина юбилейращал ттулва кулпатрал ва вилва мачча-гъаннал цIания, чIа тIий буру вин цIакьсса цIуллушиву, Аллагьнал вин буллусса оьрмулул гьантри гьаннав вания тихунмайгу цIуллу-сагъну, лайкьсса даражалий. Жу ххариру дакI марцIну захIмат бувну бувтсса вил оьрмулия.
АьвдурахIманхъал ТIалхIат Жабраиллул арс,
гъан-маччами