Майрал 29-нний ЧIяйннал шяраваллил школалий райондалул школардал байбихьулул классирттал дуклаки оьрчIал дянив хьунни «Пагьмурдал аваданссар жулва Дагъусттан» цIанилусса конкурс. ОьрчIал цалва пагьмурду ккаккан бувна балай учавриву, цалла дурсса къавтIаву ккаккан давриву, инструментирттай макьан руцавриву, шеърирду буккавриву, каруннах дурсса давурттаву. ОьрчIру Дагъусттаннал миллатирттал, хасну лакрал, яннардаву бия.

Конкурс байбишаврищал оьрчIру барча бувна райондалул бакIчинал цIания ва цала чулуха Ккуллал райондалул бакIчинал пресс-секретарь Хизриев Шам­ххаллул. Конкурсрая бувсуна Ккуллал райондалул КIулшиву дулаврил управлениялул хъунмур Альбина ХIаммакуевал.
— Ххирасса оьрчIрув! На зу барча буллай бура ва хIакьинусса байрандалущал ва дуккаврил шин къуртал хъанахъисса кьинирдащал. Ттун кIулли ва конкурсраву гьур­тту хьун бувкIми, зу цинявппагу, пагьмурду бусса оьрчIру бушиву. БакIраятува кIицI буван, хIакьину шикку цалчинсса, кIилчинсса кIанттурду къабикIантIиссарча, ххуйминнава яла ххуймири бикIантIисса. Жун пикри хьунни ва конкурс буван байбихьулул классирттаву дуклакисса оьрчIал дянив. Бугьараминнал дянив жу цакьнивагу бувайссия конкурсру. Ккаккан бувара зувувасса пагьму-гьунарду.
Байбивхьуна конкурсру. Ш­икку гьуртту хьуна Хъусращиял, Ккуллал кIивагу, СумбатIуллал, Ваччиял, ЧIяйннал, Хъюйннал, Хъювхъиял, Вихьуллал, Къяннал школарду ва Хъусращиял музыкалул школа.
Конкурсрал ахирданий чIалан бивкIуна ххуйминнавагу ххуйми язи бугьан жюрилун захIматну бушиву. Балай учавриву хьхьичIун ливчуна Хъусращатусса Аюбова, Вихьлиятусса Исмяилова, хорданий балай учавриву Хъювхъиял, Ваччиял, Хъусращиял коллективрду, хореографиялуву – Ваччиял, ЧIяйннал, Вихьуллал коллективрду, фольклорданул къавтIавурттаву – Хъусращиял, Вихьуллал коллективрду, шеърирду буккавриву – Къяннал, Хъюйннал ва Ваччиял оьрчIру, канил давурттаву – Ккуллал 2-мур школа, Хъювхъиял, Ваччиял школарду. Бахшиширттан оьрчIан дуллуна грамотартту ва циняв гьуртту хьуминнан хъинну чIюлу бувсса магьрал, хавардал луттирду. Циняв рязину ливчIуна.