ОьрчIал байран Новостройрай

sra_14Июнь зурул 1-нний щаллагу дунияллий кIицI лагай ОьрчIру буруччаврил кьини. Му кьини цIакь дурну дур 1949-ку шинал ноябрь зуруй Хъаннил федерациялул конгрессрал хIукмулийну. ХьхьичIра-хьхьичI ОьрчIру буруччаврил кьини кIицI дурну дур 1950-ку шинал.

А. Аьбдуллаева
ЦIуссалакрал цIуминалийгу, Кулпатран ва оьрчIан социал кумаг баврил центр тIивтIуну махъ ва центрданул зузалтрал хIарачатрайну, гьарица шинах хъинну гурну, тяхъану кIицI дувайссар ва кьини. Гьар мудан кунма, гьашинугу оьрчIал байрандалун хас дурсса хъуннасса шадлугъ хьунни трестрал къатрал хьхьичI. Трестрал хIаят чIюлу дурну дия шардал, лагмара дия оьрчIал дирхьусса суратру ва поделкарду, миннал чивчусса шеърирду ва сочиненияртту лархъсса стендру. Байрандалийн бувкIун бия ЦIуминалийсса цинявппа школардал дуклаки оьрчIру, школалийн гьан бувасса мюрщулт. ОьрчIал байран барча дан бувкIун бия IMG_0757ЦIуссалакрал райондалул администрациялул хъунаманал хъирив­сса Аьвдурашид Буттаев ва Алик Исрапилов, Чапаевкаллал школалул директор Камил АхIмадов, ЦIуминалийсса ОьрчIал творчествалул къатлул хъунмур Саният ХIусайнова. Шадлугърал мажлисгу тIивтIуну, оьрчIахь ва байрандалия бувсунни Центрданул хъунмур Аьбидат Аьбдуллаевал. Гихунмай мажлис бачин бувну бия Центрданул зузалт Милана Адамова ва Ханум МахIаммадова. ОьрчIахь ххарисса байран барча дуллалисса ихтилат бунни Аьвдурашид Буттаевлул.
-Ххирасса оьрчIрув! Зу ххарину, тяхъану ккавккукун, жулгу дакIру ххари шай. ХIукуматралгу, оьрчIал масъаларттаха зузиминналгу, учительтурал ва нитти-бутталгу хьхьичIва-хьхьичIсса къайгъурду зухассар. Зуятур хъар хъанахъисса жулва бучIантIимур. Ттун ччива зуяту жулла райондалул цIа бюхттул дансса, куртIсса кIулшивуртту дусса, хьхьичIунсса пишакартал хьуну, спортраву ва элмулуву зул гьунарду ялун ливчуну. Зул оьрмулуву байранну, ххарисса кьинирду чIяру даннав, — увкунни ванал.
Дуклаки оьрчIал бувккунни шеърирду, увкунни балайрду. Дуклаки оьрчIал дянив баян бувну бия сурат дишаврил ва сочинениярттал конкурс. Утти му конкурсраву ххув хьуминнан дуллай бия бахшишру. Шадлугъ наниссаксса хIаллай оьрчIайх дачIлай бия мороженое, лимонадру ва цаймигу нацIу-кьацIу, личIи-личIисса игрушкартту. ОьрчIру тирхханнарай бия, миннан буниялагусса байран хьуна. Му хъиннура чIюлу дурна райондалул культуралул отделданул зузалтралгу, тамашачитуран нукIува ххира хьусса Лауритал ва Ямлихан ХIажиевлул балайрдал. Дуклаки оьрчIалгу ккаккан дунни къавтIавуртту, бувккунни шеърирду. Шадлугърал мажлис аргъиравусса чIумал сахIналийн цIунилгу бувккунни Аьбидат Аьбдуллаева. СахIналия ванил дакIнийхтуну барчаллагь увкунни мушакъатсса, чани бакъасса, чIу къабаллали­сса душ цилашиврий бивхьуну, хъунма буллалисса ЦIуссаккуллал шяравасса ХIусайнова Суджанахь. Центрданул хIадур дурну дия му душнинссагу бахшиш – хъунна­сса кIукIлу игрушка. Виричусса хъамитайпалун савлугъран цинявппа хъатру ришлан бивкIунни. Хъирив Аьбидат Аьбдуллаевал барчаллагьрай кIицI ларгунни ва хIакьинусса оьрчIал байран дан арцуйнусса кумаг бувсса инсантурал цIарду.
Ахирданий, мюрщимигу, хъунимигу хIала бувххун, къавтIун бизлай, диялсса дялахъру дунни.