Дарбантуллал юбилейрайнсса хIадуршиннарал давурттавух гьуртту хьуну дур СКФО-рал цаппара регионнугу. Ва иширая бувсун бур СКФО-рал СМИ-рдал Ассоциациялул сакиншиннаралу хьусса хъунмасса пресс-конференциялий.

Залму АьбдурахIманова
Кьиблалул Аьрасатнал регионнаясса СМИ-рдал журналистътурал суаллахьхьун жавабру дуллуну дур «Дербент-2000» оргкомитетрал дирекциялул каялувчи Аьли НурмахIаммадовлул. Шикку мукунма гьуртту хьуну бур ДР-лул культуралул министр Зарема Буттаева ва ДР-лул печатьрал ва информациялул министр Азнаур Аджиев.
СКФО-рал СМИ-рдал журналистътал бакъасса, шикку гьуртту хьуну бур Ухссавнил Ккавкказуллал регионнаясса блогерталгу. Пресс-конференциялий гьуртту хьусса журналистътурал оргкомитетрал каялувчинахь Дарбантуллал юбилейрайнсса хIадуршинна цукун, ци даражалий душивриясса суаллу буллуну бур. Суаллан жавабру дуллай, Аьли НурмахIаммадовлул кIицI лавгун бур, хъунмасса кумаг ва давриву буллай бушиву чIаххуврайсса регионнал.
— Ставрополлал крайрал бакIрайн лавсунни Дарбантуллал цания ца кIичIиравалу бакьин бан. Умуд бур укунссара сипта вайми субъектирдалгу цайнна ласунссар тIисса. Мукунма кIицI лаган ччива шагьру юбилейрайн хIадур буллалисса давриву гьуртту къархьусса жулла республикалул цурда ца район къалирчIшиву. Гьарца райондалул цащава шайсса чIарахбацIаву дунни, — тIий ур Аь. НурмахIаммадов.
Мукунма ванал бувсунни шагьрулул кIичIирттавусса тарихрал къатри дакьин дуллалийни цал ишла буллалишиву, бухзаманалул тагьар даччан къадан, декоративрал чартту. Мукунма кIицI лавгунни цал даврий дакI къадакьлакьиссагу чансса бакъашиву, амма мунихгу къабурувгун цив зий бушиву.
Азнаур Аджиевлул шиккун бавтIсса журналистътурайн ва блогертурайн оьвчаву дунни «Дербент-2000» проект машгьур даврия чичлан ва халкьуннахь буслан шагьрулул тарихрая.
— Дарбант Аьрасатнал шагьрур. Шагьрулул юбилейрал шадлугъ кIицI лагавугу щалва билаятрал пахрур, — тIий ур Азнаур Аджиев.