Май зурул 1-нний «Дагнефтепродукт» ОАО-лий личIи-личIисса жаваблувсса къуллугъирттай зий, хъунмасса захIмат бивхьусса, хIакьинусса кьинигу цала даву дакIмарцIну дуллалисса жул зузала Вагьаблул арс Давуд Идрисовлул оьрмулул 80-шин хъанай дур.
Дагъусттаннал промышленностьрал лайкь хьусса зузала, АьФ-лул Навтлил ва газрал промышленностьрал
лайкь хьусса зузала, хIукуматрал чулуха цикссагу хIурматрал грамотарду ларсъсса Давуд Вагьабович республикалий чIявучин ххуйну кIулссар. Ванал хIурмат лавайссар жул коллективравугу. ХIакьинусса кьинигу Давуд Вагьабович чIарав авцIусса, ванал кумаг бувсса инсантурал хIурматрай зумух ласай ванал цIа. Цала уздансса хасиятрайну, чумартсса тIуллайну бусрав хьуну ур ва щарнил жяматрангу, архIал зузиминнангу. Мури инсаннал яла хъунмур талихIгу.
ХIурмат бусса Давуд Вагьабович! Ва тIабиаьт чантIа тIисса, чаннасса гъилисса интнил гьантрай увну ура ина.
Ина кIулсса, ина ххирасса цинявнналагу цIанияту барча дуллай буру вил юбилей!
ЧIа тIий буру вин цIуллушиву. Вил дакIнийсса циняв мурадру бартлаганнав, арсналгу, арснал оьрчIалгу ххари уллай вина ччикун итаннав. ДакI ххари дансса бакъа хавар ялун къабияннав, ина бивзсса гьарцагу ша тIайлабацIусса хьуннав.
Вил хIурмат бусса дустал, даврил уртакьтал
——————————-
Вай гъилисса, чаннасса интнил зурул гьантрай бувну бур Кумиял шяравасса ХIусманов Надир ва мунал кулпат Раиля. Гьашину вай цачIу оьрму бутлайгу 32 шин хъанай дур.
Вай ххарисса кьинирду дакIнийхтуну барча тIий, чIа тIий буру ва ххаллилсса кулпатран цIуллушиву, тIайлабацIурду, цанная цаннал щалихханнинсса лахъисса оьрму. Куннал кув ххари буллай, дакIниймур бартлаглай, зунма ччикун талихI-тирхханнарай личIаннав.
Зуха дуаьлийсса гъан-маччами
————————————-
ДакIнийхтуну барачат дуллай буру жула лакрал ва Дагъусттаннал дянив цIа бусравсса инсан, жяматийсса ишруккакку, публицист, политолог, архитектор, ГьунчIукьатIрал шяраватусса КьурбанмахIаммадлул арс Керимов Жаруллагь увсса кьини.
ЧIа тIий буру Жаруллагьлун чIярусса цIуллусса шинну, цIу-цIусса ххаришивуртту ва ххуй-хъиншивуртту.
Вила оьрмулул дус Розащал архIал битаннав зу Заннал рахIатну яхъанай!
Дустал, гьалмахтал
