Ларгсса нюжмардий МахIачкъалаллал администрациялучIасса Культуралул управлениялул сакиншиннаралу, «Белый дом» ресторандалуву, кIицI ларгунни Культуралул зузалал кьини.
Ва кьини кIицI лагайссар творчествалухун машхулсса, кинематографиялул, полиграфиялул, луттирду итабакьайсса ва магьирлугърал аралуву зузисса пишакартурал. Вайннал жулва билаятрал культуралул ирс ябавриву буллалисса хъунмасса захIматран кьимат бищун къабигьари.
2007 шинал августрал 28-нний Аьрасатнал Президент В. Путиннул цIакь бувсса «О Дне работника культуры» №111 хIукмулийн бувну, мартрал 25-сса кьини кIицI лагайссар Культуралул зузалал кьини. Ганиннин ва аралувасса пишакартурал личIи-личIисса кьинирдай кIицI лаглай бивкIсса цала-цала пишакартурал кьинирду, хIукмулий ккаккан бувсса куццуй, цинявннан аьмсса ца кьини ккаккан дурну дур.
МахIачкъалаливгу шадлугърал вечер тIитIлай, шагьрулул бакIчинал хъиривчу Рафик Буттаевлул барча буллалисса махъгу лавхъун, культуралул аралуву чялишсса гьурттушинна дуллалисса зузалтран администрациялул чулуха ХIурматрал грамотарду, цIа кусса ссятру ва Барчаллагьрал чагъарду тапшур бунни.
Концертрал программалуву гьуртту хьусса шагьрулул магьирлугърал школардал дуклаки оьрчIал щаллу бунни ххуй-ххуйсса балайрду, къавтIавуртту ва усттарну рурцунни музыкалул инструментирттай личIи-личIисса миллатирттал макьанну.
Шадлугъ ларгунни культуралул зузалт цаннащал ца жаплий, тIааьнсса тагьардануву, культуралул ва цайми-цаймигу арардал масъалартту ххалбигьлай.
