Апрельданул 7-нний МахIачкъалалив хьунни республикалул конкурс «Юные вокалисты». Мунил сакиншинначи хьунни ДР-лул Культуралул министерствалучIасса магьирлугърал, музыкалул ва художествалул школардай каялувшиву дуллалисса Учебно-методический центр. Конкурс бия кIива номинациялуву: ансамбльданул учайсса балайлул ва цалвалусса балайлул.
Конкурсрай кIивагу номинациялуву гьуртту хьунни Мариян Дандамаевал цIанийсса Гъумучиял оьрчIал магьирлугърал школалул дуклаки душру.
Ансамбльданул учайсса балайлул номинациялуву гьуртту хьунни Абуева Закират, Аьлишаева Фаина, ХIаммадаева Регина, Закаржаева Диана ва Садикьова Аида. Вайннал увкунни кIива балай: ца – конкурсрал тIалавшиннарайн бувну, дяъвилул темалун хасъсса, цагу – цала язи бувгьусса.
Цалалусса балайлул конкурсраву учин ккаккан бувну бия кIива балай: ватандалухасса ва халкьуннал. Муний гьуртту хьунни Аида Садикьова. Амма, щалла республикалийсса шагьрурдал ва районнал балайчитал гьуртту хъанай, конкурсран дурагу ца кьини ккаккан дурну духьувкун, цивппалу балай тIутIиминнан багьлай бия цания ца балай учин. Аидал увкуна халкьуннал макьандалухун лакрал чичу Рамазан Рамазановлул мукъурттийсса «Марияннухасса» балай. Ва номинациялуву жюрилул яла лавайсса кьимат бивщунни Аидал балайлун ва лайкь хьунни 1-мур даражалул дипломран. Ансамбльданул цачIусса балайрдангу буллунни 2-мур даражалул диплом.
КIирагу номинациялуву жулва душварал балайрдахун макьанну руцлай бия магьирлугърал школалий дарс дихьлахьисса Арсен Ханов, ХIасан МахIаммадов, Амир Сулайманов ва Нурислан ЧIивиев. Жюрилул вайннангу дуллунни ХIурматрал грамотарду.
Шиккува дакIнийн бутан, Гъумучиял школалул 6-мур классрал дуклаки душ Садикьова Аида ттининнингу ххув хьуссар цаппарасса конкурсирдай. 2013 шинал «Щунудагъ» фестивальданий «оьрчIал балайлул» номинациялуву ванил бувгьуссар 1-мур кIану, душварал ансамбльданулгу бувгьуссар 3-мур кIану.
