Дунияллул халкьуннал театрдал институтрал IХ-мур конгрессрай 1961 шинал цIакь дурну, муния мукьах гьарца шинал мартрал 27-нний кIицI лагайссар Дунияллул халкьуннал театрдал кьини. Лахъа-хъунну дувай му байран 12 паччахIлугърал театр бусса Дагъусттаннайгу.

Зулайхат Тахакьаева
Театрдал зузалт барча бан га кьини Къумукьнал театрданувун бувкIун бия ДР-лул ХIукуматрал Хъунаманал цалчинма хъиривчу Анатолий Карибов, ДР-лул культуралул министр Зарема Буттаева, ванил хъиривчутал Елена Гьарунова ва Мурад ХIажиев, ДР-лул жагьилтурал иширттал министрнал хъиривчу Анна Безрукова, ДР-лул Чичултрал союзрал хъунама МахIаммад АхIмадов, цинявппагу театрдал каялувчитал, магьирлугърал ишккаккулт.
Дагъусттаннал БакIчинал цIания театрдал зузалт пишакаршиврул байрандалущал барча бувуна Анатолий Карибовлул. Ванал кIицI лавгуна республикалул магьирлугъ хьхьичIуннай дан Рамазан АьбдуллатIиповлул агьамсса къулагъас дуллай ушиву ва му аралуву кIира шинал лажиндарай хъуннасса даву дуршиву. «Человеческий капитал» хьхьичIунсса проектрал лагрулуву сакин бувну бушиву подпроект «Культура и традиции народов Дагестана». Билаятрай Литературалул шинну баян бувсса гьашинусса шиналгу Республикалул БакIчинал Дагъус­ттаннай тIитIин ккаккан бувну бур Поэзиялул театр.
«Гьарцагу инсаннал бюхъурду аьч бавриву ляличIиссава кIану хасну театрал магьирлугъралли бугьлагьисса.
ЦIанасса чIумал Дагъусттаннал театрал майданнив ялапаргу хъанай, хьхьичIунмай хъанай бур 12 паччахIлугърал театр. Жула республикалий хьхьичIунну зий дур Аьрасатнал театрдал ишккаккулт­рал Дагъусттанналмур отделение. Гьашину 90 шин там хъанай дур М. Горькийл цIанийсса Оьруснал театр зий байбивхьуния шихуннай. 80 шинал юбилей дуллан хIадур хъанай бур Лакрал, Яруссаннал ва Лазгиял театрду. Республикалий гьарца шинал лайкьсса даражалий шай республикалул, Аьрасатнал ва дунияллул фестиваллу. Да­гъусттаннал театрдал коллективрду чялишсса гьурттушинна дуллай бур Аьрасатнал театрдащал ба­къассагу, кьатIаллил билаятирттал театрдащалссагу магьирлугърал дахIавуртту цIакь дан», — увкунни Анатолий Карибовлул.
Ванал ялагу кIицI лавгунни театрал магьирлугърал тарихраву чан­сса дакъашиву хIакьинусса кьинигу Дагъусттаннал пахру бан лайкьсса бюхттулсса цIарду. Цинявппагу театрдал биттур буллалиссар миллатрал культуралул центрдал мурадругу.
«Цин лавхьхьусса кIану бугьлагьиссар театрдал хъун хъанахъисса никираву мяърипат тарбия давривугу. Мунияту театрду хIарачат буллан аьркинссар оьрчIру театрдавун кIункIу буллан. Гьарцагу театрданул репертуардануву бикIан аьркинссар оьрчIансса спектакльлу», — увкунни ванал.
Цалва ихтилатрая махъ Анатолий Карибовлул Республикалул БакIчинал цIания сайки гьарцагу театрданул каялувчинахьхьун дуллунни цIусса автобусрал кIулли. Миннавух бия Лакралмур театргу.
Театрдал зузалт барчагу бувну, цаппарасса актертуран ДР-лул Культуралул министерствалул чулухасса ХIурматрал грамотарду дуллуна министр Зарема Буттаевал.
Цилва ихтилатраву ванил кIицI лавгуна республикалул театр­дал бивтшиву захIматсса ххуллу, муницIунма республикалул театрдал бушиву захIматран лавхьхьусса даврил опыт ва хьхьичIуннайшивуртту. Цинявппагу театрдал коллективрду буссар Дагъусттаннал магьирлугърал лавай бавцIуну, халкьуннаву ватан ххирашиврул, дусшиврул ва мяърипатрал асарду тарбия буллай, буттахъал аьдатру дуруччин кабакьу буллай, — увкунни культуралул министрнал.
«Зул сипталийну, зул творчествалийнусса ша ласаврийну ларгсса шин хьунни авадансса ва яргсса иширттайну дакIний личIансса. Бивхьунни чIявусса премьерарду, лайкьсса даражалий хьунни хъуннасса театрал фестиваль.
ДакI дарцIуну бура гихунмайгу жулва театрдал захIмат тIайлабацIусса хьунтIишиврийн», — увкунни Зарема Буттаевал.
Дагъусттаннал Театрал деятельтурал союзрал хъунама Айгум Айгумовлул кIицI лавгуна ДР-лул Культуралул министерствалул хъуннасса къулагъас дуллай бушиву миллатирттал театрдал кадрардал потенциал хьхьичIунмай баврихгу, жагьилсса пишакартал гьарца шинал тIайла буккайшиву билаятрал хьхьичIунсса вузирдавун.
Ванал дурккуна Аьрасатнал Театрал деятельтурал союзрал хъунама Александр Калягиннуясса барча буллалисса телеграмма.
Дагъусттаннал Чичултрал союзрал хъунама МахIаммад АхIмадовлул бувсуна чIал къавхьуну республикалий тIитIинтIишиву Поэзиялул театр. Цаппарассаа шаэртуран дуллуна ХIурматрал грамотарду.
Театрдал зузалт барча бувуна Ссихьрал театрданул каялувчи Аминат ЯхIияевалгу.
Барча бавурттая мукьах респуб­ликалул гьарцагу театрданул кка­ккан бувуна тамашачитуран ххира хьусса спектакльлавасса бутIри. Лакрал театрданул ккаккан бувуна «Ханума» спектакльданувасса яла хIазмур бутIа, Ханума ва Кабато базаллуву куннищал кув бивсса. Шиккува кIицI бан, так ца жула ва Даргиял театрданул бивхьунни ниттил мазрай. Вайми цинявппа театрдал представленияртту дия оьрус мазрай. Лакку мазрай бихьлай, тамашачитуран бувчIлай-къабувчIлай бунувагума зал бия цал хъяхъаврил, яла хъатурдил лавсун най. Яла ххуйну лак бувккунни, Лак мудангу хьхьичIунну бикIай, тIий бия куннахь кув. Ттунгу, туну, пахру багьлай бия.
Тамашачитал сахIналий хъанахъимуних буруглагиссаксса хIаллай Анатолий Карибов, Зарема Буттаева, Мурад ХIажиев ва Елена Гьарунова, Айгум Айгумов ва рес­публикалул театрдал каялувчитал ххалбигьлай бия республикалий театрал магьирлугъ хьхьичIуннай шаврил ххуллурду. Микку хIукму бунни ДР-лул Театрал деятельтурал союзрал дуллалисса давурттаву (творчествалул лабораториярдай, смотрдай, фестиваллай, гъинттулсса школарттай, мастер-классирдай) республикалул театрдал гьурттушинна чялиш дан, спектакльлу бишин цайми кIанттурдая бучIан буллан гьунар бусса режиссертал, классикалул драматургия ва пьесарду театрдал репертуарданувун бичин, спектакльлал декорациялул ва чIунил даража лавай бан.
Мукунма хIукму бунни оьрчIал ва жагьилтурал театрал студияртту сакин бансса жяматийсса инициативардан кабакьу буллан ДР-лул КIулшиву дулаврил ва элмулул, Культуралул, Жагьилтурал иширттал министерстварттугу, шагьрурдал ва районнал администрациярттугу кIункIу бан.