Ккуллал райондалийн зун лавгун махъ, на кIул хьу­ссияв шяраваллил хозяйствалул ххаллилсса пишакар, Лаккуйсса аьрщарал хIал кIулсса агроном, СумбатIуллал шяравасса Хизриев Жамалуттиннущал. СумбатIуллал ванайн кутIану Жамал учайва. Жамалуттин ия дакI хъинсса, инсантал ххирасса, чIявусса затру кIулсса, кIукIлуну ихтилат бувайсса аькьил, зунтталчу. Жамалуттин 2014-ку шинал декабрь зурул ахирданий ахиратравун лавгунни.
ХIажимурад ХIусайнов
Жамалуттин увссар 1931-ку шинал СумбатIуллал шяраву муххал ххуллул усттарну зузисса Хизрил ва шяраву колхозраву зузисса СахIибатлул кулпатраву. Жамалуттиннул шяраву 4, Ваччав 7, ЧIяв 10 класс къуртал бувну бур. ЧIивинияцIа шяраваллил кушурду ххирасса Жамалуттин дуклан увхссар Дагъусттаннал шяраваллил институтрал агрономтал итабакьайсса факультетрайн. Мугу къуртал бувну 1956-ку шинал, ва зий ивкIссар Ккуллал райондалул шяраваллил хозяйствалул управлениялул агрономну, хъунама агрономну, СумбатIуллал шяраваллил колхозрал агрономну, колхозрал председательну. Жамалуттин ия «Заслуженный работник сельского хозяйства Дагестана», захIматрал ветеран. Дуллуну дия ванан чIярусса бахшишру, грамотартту.
ВаначIан шавай лавгний, ттун ванал библиотека ххилтIу буллан ччан бикIайва. Шикку шяраваллил хозяйствалун хас бувсса бакъасса луттирду къабикIайва. Жамалуттиннул хIазран бакъархха СумбатIуллал шяраву цалва ахъуву гьивхьхьул мурхь ххяххан бувсса. ХIакьинугу ганий гьивхь ххяхлайннари дусса. Жамалуттиннул чIявуну тикрал бувайва: «На чIявусса кIанттайн, СССР-данул хIукуматирттайн ивссара, амма жучIара Лаккуй кунна зия къархьусса тIабиаьт хъинну чанну дакъа дакъар. Мунияту жучIара ччимур бакIлахъия ххяххайссар. Ттунмарив бувчIлан къабикIай шия, укунсса ххуйсса тIабиаьт дусса кIанавату, инсантал шагьрурдайнмай ливхъун нанаву. Му бигьану ччатI букан ччишиву духьунссар», — учайва.
Чан хъанай бур жулла шяраваллава зунттал кIанттай оьрму цукун бутлан аьркинссарив бусайсса аькьилтал. ХIайп. Амма бувсмур лаласун кIулманаща бюхъантIиссар Жамалуттиннул дарсру дакIнийн дичлай, жулла аьрщи дирчIан къаритан. Умуд бур мукун хьунссар тIий. Амин.