Март зурул 4-нний Расул ХIамзатовлул цIанийсса Миллатрал библиотекалуву хьунни гъинттул дунияллия лавгсса яруссаннал гьунар бусса прозаик, драматург, публицист ГъазимухIаммад ГъалбацIовлул «Суракъат» тIисса луттирал презентация.

П. Рамазанова
Му Дагъусттаннай ислам­рал дин цIакь хьуннинсса чIуннар­диясса тарихийсса роман бур. ГъазимухIаммад 15 шинал лажиндарай чичлай ивкIсса, Яруссаннал ца яла оьхIалма паччахIнаясса, Суракъатлуясса лу бур. Лавмартсса цIуцIаврил ххяппурттаща ххассал хьун къавхьусса авторнаща му лу чивчуну къуртал бан къахьурчагу, яруссаннал литературалуха зузиминнал му лу дунияллийн буккан бувну бур. ГъазимухIаммад ГъалбацIовлул творчествалун кьимат бищун, муная бусласимуних вичIидишин чIявусса агьлу бавтIун бия Миллатрал библиотекалувун. Дагъусттаннал паччахIлугърал университетрал доцент Муса ХIажиевлул, ГъалбацIовлул творчествалул анализ дуллай, кIицI лавгуна му дагъусттаннал проза хьхьичIуннай дурсса, щихачIав къалавхьхьусса, ляличIисса чичрулул кьяйда, стиль дусса прозаик ушиву. ГъазимухIаммад ГъалбацIовлул дагъусттаннал драматургия ва проза авадан дуршиврия бия чичултрал, аьлимтурал ва даврил уртакьтурал ихтилатругу.
Дагъусттаннал Чичултрал союзрал вакил Марина АхIмадовал кIицI лавгуна гьашину мунан 55 шин хьун най диркIнавхьур, му дакIнийн утлатисса литературалул мажлис буван дакIний бушиву.
ГъазимухIаммад ГъалбацIов дагъусттаннал агьалинан кIулссар гьунар бусса драматург ва прозаик хIисаврай акъагу, гьунар бусса тележурналист хIисаврайгу. Мунал луттирал презентациялий кIицI лаглай бия гьарцагу хамис кьини яруссаннал агьали мякьну ялугьлай бивкIшиву ГъазимухIаммадлул телепередачарттах. ХIатта яру­ссаннал маз къакIулмигума мунал вичIидишин гъира бутлатисса чIуния, гьунардания неъмат ласлай бивкIшиву. Мунал ца передача дунугу ххалдурманан ГъазимухIаммад цалла даву хъинну кIулсса, дуллалисса даву мудангу лавайсса даражалий дувайсса гьунарданул заллу ивкIшиву исват шайшиврия бия ихтилатру. Цува дунияллия гьаннин ГъазимухIаммад зий уссия «Дагестан» РГВК-лий, миллатир­ттал программардал дирекциялул хъунаману.
Му ия Дагъусттаннал культуралул лайкь хьусса зузала, ларгсса шинал лайкь хьуна Дагъусттаннал паччахIлугърал премиялун.
Гьаманки «Илчилул» редакция ца зивулий цIакь хьун бувашиву хьуна ттул ГъазимухIаммадлущал дусшиву дансса тIайлабацIулул багьанану. Таний «Илчилул» редакциялул кабинетру ца зивулий бакъассия, ттунгу ГъалбацIовлул кабинетрайн лажинсса кабинет багьуна. 1994 шинал «КIиннал яру» тIисса ттул назмурдал жуж дунияллийн буккайхту, цалчинсса луттирал презентация дуллан ламусрихха тIисса нагу дан аьркиншиврий мукIру бувну, мунал «Илчилул» редакциялий ххуйсса презентация дурна, дустал-гьалмахталгу лагма лаган бувну. Яла мудангу хIайп тIий икIайва, гукун ххуйсса презентация хьунсса кIулну, телевидениялийн оьвчинссияхха, тIий. «Дагъусттаннал правда» кказитрай ттул шеърирдал подборка бу­ккайхту, ми шеърирдал хIакъираву цалвамур пикри чивчуну увкIуна ттучIан. Ттул назмурдансса яла ххуймур хьхьичIмахъ гьаманки ГъалбацIовлулмурди.
Презентациялий ца зумату кунма чичулт ва аьлимтал бия ГъалбацIовлул тарихийсса роман чара бакъа оьрус мазрайн таржума буван аьркинссар, цайми миллатирттал агьалинащагу буккингу, кьимат бищунгу хьуншиврул тIий. Му лу таржума буван, бакIрайн ласун ччимигу чансса бакъая. Ялугьланну. Ларг чIуннардий дагъус­ттаннал миллатирттал дянивсса дахIавугу куртIсса диркIнавхьур, ГъалбацIовлул луттиравугу ми дахIавуртту лякъинссар жуннагу тIисса мурадрай.