Каспийскаллал чIава натуралистътурал станциялул (СЮН — Станция юного натуралиста), мунил цилла даву ххирасса ва му дакIнийхтуну дуллалисса директор СалихIова Зинаида Аьбдуллаевнал каялувшиннаралу, дуккаврил шинал лахъишиврий дувайссар цикссагу байранну,
цал мяъна-мурадрунугу хъанахъисса махъа нанисса никираву тIабиаьтрахсса, экологиялухсса ччаву дишаву, жяматрал экологиялул масъаларттахсса ургъил лавай баву, кутIану учин, жулва инсантуран ххишала дакъа диял къахъанахъисса экологиялул тарбиялул мархри Каспийск шагьрулул чIава граждантураву бишаву. Мукунсса байран-конкурс хьунни вай гьантрайгу му станциялий. Му хас дурну дия щаллагу дунияллий кIицI лагайсса Щинал кьинилун.
Щинал рухI дусса цимурцаннул оьрмулуву цукун агьамсса кIану бугьлай буссарив буслан чара бакъашиву дакъар. Амма, му кIулну бунува, жунма чIалай бур марцIсса щин, щинал объектру цукунсса нигьачIавриву дуссарив. Ва кьинигу СЮН-лул тарбиячитал гьаз буллай бия ми масъалартту.
Щинал байран цурда хьунни оьрчIи бувну хIадур бувсса актовый залдануву. Ва байрандалийн оьрчIру хIадур бувну бия ЧIава натуралистътурал станциялул методист А. Исмяиловал. Ванил сакин бувну бия хъинну ххуйсса сценарий, цуппагу телепередачарттал журалий – «Доброе утро» ва «Водный приговор».
ЧIава юннатътурал гьунарданун ва кIулшивурттан кьимат бишлай бия Зинаида Аьбдуллаевна ва оьрчIал нину-ппу.
Байран хьунни тяхъасса ва мунивух гьуртту хьусса ва тамаша буллалисса оьрчIал кIулшивуртту авадан дувансса. СЮН-лул тарбиячитурал дурккунни щинахасса назмурду, увкунни щинахасса тяхъасса балайрду, ккаккан бунни хIазсса сценкарду ва миллатирттал къавтIавуртту.
Байран-конкурсрал ахирданий муний хьхьичIун ливчуми лайкь хьунни грамотарттан ва бахшиширттан.
Бадрижамал Аьлиева
