Дагъусттаннал БакIчи Рамазан АьбдуллатIипов гьуртту хьунни Аьрасатнал Федерациялул Мюхчаншиврул советрал секретарь Николай Патрушевлул Пятигорскалий дурсса совещаниялий.

Совещаниялий ххалбивгьунни Ух­ссавнил Ккавкказуллал федерал округрал регионнай миллатирттал дянив ва диннал дянив къалмакъаллал кюртти хIасул шаврил хьхьичIалу кьукьаврин, террорчишиврул ва экстремистшиврул профилактикалун хасъсса масъалартту.
Федерациялул субъектирдал каялувчитурахь бувсунни экстремистшиврул ва террорчишиврул профилактикалул регионнал программартту биттур дуллан аьркиншиву, миннунсса арцулгу щаллу дуллан программалувусса давуртту.
Совещаниялий гьуртту хьуминнал бувсунни СКФО-рай дакъашиву аьчухну чIалачIисса миллатирттал дянивсса къалмакъаллу, учиннуча, 1990 шиннардий куннасса. Амма, Николай Патрушевлул мукъурттийн бувну, Ухссавнил Ккавкказуллал региондалийсса цаппара регионнай миллатирттал ва диннал дянив чIалачIисса, кьюлтIсса чIурушиву уттигу дурар.
Цалва ихтилатраву Н. Патрушевлул бувсунни дазул кьатIув ялапар хъанахъисса миллатирттал диаспорарттал бандформированиярттан тIайла дуклакисса арцул ххуллурду щаллуну лавкьуну бакъашиву. Региондалий къабигьасса душиву социал-экономикалул тагьар. Тагьар оьлукъин дуллай душиву экстремистшиврул идеология интернетраву ппив дуллалаврилгу.
«КьюлтIсса зад бакъар, цIана Аьрасатнавасса наемниктал (арцух талатими) талай бушиву дазул кьатIув бандитътурал кьюкьравух. Ватандалийн зана хьувкун тайннал жулла аьрщарай террорданул ишру буллан тIий бур, ИГИЛ-данул кунмассагу. Миннул исламращал хIаласса цичIавгу бакъассар. Ми гьарзат хIисавравун ласун аьркинссар оператив-розыскрал иширттаха ва профилактикалул давурттаха зузиминнал», — увкунни Совбезрал секретарьнал.
Яла совещаниялий гьуртту хьуминнал ххалбивгьунни Ухссавнил Ккавкказуллал федерал округрал регионнай «Безопасный город» тIисса аппаратно-программный комплексру лябуккан баврин хасъсса чаранну. Ми комплексру дузал буллалиссар Аьрасатнал Президентнал 2007 шиная шинмай. ХIакьину билаятрай дузал бувну бур 200-яр ххишаласса АПК-рду. 766 шагьрулий бивхьуну бур 164 азарва видеонаблюдениялул камера.
Ухссавнил Ккавкказуллал федерал округ­рал регионнай зий бур анжагъ 8 мукунсса комплекс. Ингушетиянаву ва Ухссавнил Осетия-Алания республикарттай «Безопасный город» бакъар. Дагъусттан Республикалий, Кабардин-Балкьарнал, Къарачай-Чаргаснал ва Чачаннал республикарттай бивхьуну бур так ца-ца комплекс.
Совещаниялий ххалбивгьунни темалий ккаккан бувсса масъаларттан хасъсса, властьрал регионнал ва кIанттул органнал давурттал мюнпат ххи бансса балжисса чаранну.
Жулла республикалийсса иширттал тагьарданул хIакъираву ихтилат бунни Дагъус­ттаннал БакIчи Рамазан АьбдуллатIиповлул. Ганал бувсунни паччахIлугърал властьрал органнал ва кIанттул цилакаялувшиврул органнал ххалбигьлагьисса масъалалун хасну дуллалисса давурттая.
Совещаниялий гьуртту хьунни Аьрасатнал Президентнал СКФО-райсса вакил Сергей Меликов, АьФ-лул Силистталул комитетрал председатель Александр Бастрыкин, АьФ-лул Ухссавнил Ккавкказуллал иширттал министр Лев Кузнецов, СКФО-равун бухлахисса субъектирдал бакIчитал, Аьрасатнал Генеральный прокуратуралул, МВД-лул, МЧС-рал ва цаймигу ведомствар­ттал вакилтал.
ХIадур бувссар ХI. Аьдиловлул