Миллатирттал мазурдил клуб тIивтIунни

gtas_5Вай гьантрай Расул ХIамзатовлул цIанийсса Миллатрал биб­лиотекалуву билаятрай баян бувсса Литературалул шинан хасну тIивтIунни Дагъусттаннал миллатирттал мазурдийсса клуб. Шикку гьуртту хьунни ДНЦ РАН-далул Мазрал ва литературалул институтрал директор МахIаммад МахIаммадов, ДР-лул Чичулт­рал союзрал председатель МахIаммад АхIмадов,
Республикалул миллатирттал библиотекалул директор Аьли Аьлиев ва мукунма чIявусса цаймигу, ниттил мазру ххирасса, ми ябаву ва буруччаву мурадрай хъунмасса захIмат буллалисса шаэртал, чичулт, студентътал ва чIявусса цаймигу, творчествалул интеллигенция.

И. Саидова
Лакрал, даргиял, яруссаннал, лазгиял, къумукьнал, табасараннал, нугъайнал мазурдийсса клуб сакин бунни Миллатрал библиотекалул краеведениялул ва дагъусттаннал мазурдийсса литературалул отделданул сипталийн бувну. МаслихIат ккав­ккунни, зуруй цал клубравун бавтIун, мазру буруччаву, ябаву мурадрайсса ххуллу-чаранну ляхълан ва шикку хьусса мюнпатсса ихтилатру, агьалиналгу буккин бюхъаншиврул, библиотекалул сайтрайнгу лахъан буллан. Миллатирттал мазру ябаву, буруччаву дакъассагу, клубрал агьамсса даву ялагу хъанахъиссар Дагъусттаннал чIяву миллатирттал халкьуннал дянивсса дусшиврул арарду цIакь даву. Клубрал давривух гьуртту хьун ихтияр дуссар ни­ттил маз ххирасса, ниттил мазрай гъалгъатIун ччисса ччима инсаннаща.
Дагъусттаннал миллатирттал вакилтурал ва ДНЦ РАН-далул зузалтращал цачIуну сакин дунни клубрал даврил гихуннайсса план. Ихтилатру буллалими циняв кIицI лаглай бия, хаснува шагьрурдай ялапар хъанахъисса дагъусттанлувтал оьрус мазрай гъалгъатIий бушиврийну, ниттил мазру хъамабитлатисса, нигьачIийсса тагьарданий бушиву, ва мунияту укунсса журалул клуб сакин баву чара бакъа аьркинсса, агьамсса даву душиву.
Миллатирттал мазурдий­сса клубрал даву дайдихьлай, ихтилат бунни библиотекалул директор Аьли Аьлиевлул.
— Жува жулва мазрай гъалгъа къабуллай, жулва шаэртурал ххаллилсса поэзия ва проза къакIулну, ниттил мазрайсса кказит-журналлу къаккалакки­сса чIумал бухлаглагиссар жулва миллатгу, жулва мазгу. Дагъус­ттаннал халкьуннан цалчинва цалчин кIулну бикIан аьркин­ссар жулва ниттил маз, миллатирттал багьу-бизу. Ми цимурца хIисавравун ларсун, жун пикри хьунни ва клуб сакин буван. Вай батIавурттай жува буллан аьркинссару мазрал хIакъиравусса мюнпат бусса ихтилатру. Ши­кку ккавксса маслихIатру дузрайн буккан баву мурадрай, Республикалул ХIукуматрайгу бишавантIиссар. Республикалул КIулшивуртту дулаврил министерствалул школардай, ниттил мазру лахьхьаву мурадрай, зузи дурну дур агьамсса программарду ва ми мазру лахьхьаврин ккаккан дурну дур нюжмардий 2-3 ссят. Ттул пикрилий, школардай оьрчIан ниттил маз лахьхьин бан ми хъинну чанссар. Мунияту, жува циняв цачIун хьуну, мазру буруччаву, ябаву мурадрайсса давуртту дуллан аьркинссару, — увкунни Аьли Аьлиевлул.
ДНЦ РАН-далул Мазрал ва литературалул институтрал директор МахIаммад МахIаммадовлул цалва ихтилат­раву чIурчIав дунни оьрчIан оьрус маз кунма ниттил мазгу чара бакъа кIулну бикIан аьркиншиву бувчIин баврий.
— Уттизаманнул агьали хъинну ят бувцун бур цалва миллатрая, цалва мазрая ва хьхьичIавасса жула буттахъал багьу-бизулия. Студентътуран, дуклаки оьрчIан ниттил маз къакIулшиврия цукунчIавсса къумашиву дакъар. Цимилгу гьаз барду оьрчIал багъирдава байбивхьуну ниттил мазру лахьхьин буллай байбишин аьркиншиву исват буллалисса масъалартту. Мюрщиссаксса оьрчIан бигьану ва ччяни лахьхьайссар мазру. Махъсса ппурттуву ттун хъинну кьувтIунни жулла респуб­ликалийсса 1700 школалува 400 школа ниттил мазрал дарсру дишаврия мурахас хьуну бушиву. Вай школардайсса хъуниминналгу, учительтуралгу дуллали­сса хъуннасса тахсиркаршивур. Гьай-гьай, цIанасса оьрмулуву ингилис мазру лахьлай, ниттил маз сийлий бакъасса кIанттурду хIисав хъанай бур. ХIакьинусса кьини Дагъусттаннал миллатирттал 32 мазрава 18 маз бур ЯтIул Луттиравун лавсун. Жул институтрал, мазру ябаву ва буруччаву мурадрай, словарьду, луттирду сакин бувну, итабакьлай, буниялагу хъунисса давур­тту дуллай буссар. КIицI лаган ччай ура хIакьинусса кьини мазурдил хIакъиравусса закон кьамул къадурсса республика так ца Дагъусттан душиву. Укунсса тагьар дусса чIумал, ниттил мазгу ябан хъинну захIматссар. ЧIяву миллатру бусса вайми республикарттай миллатирттал мазурдил хIакъиравусса закон танийра кьамул дурну дур. ЖучIава, 32 маз бусса республикалий, тIурча 32-лий ххишала му закон кьамул дан аьркинссар. Вайксса миллатру ялапар хъанахъисса республикалий тIурча нажагьсса дакъа миллатирттал мазурдийсса передачарттурагу дакъар. На кIицI лавгсса вай цинявгу масъалартту, учительтуращал, шаэртуращал, чичулт­ращал цачIуну зий, чан-чанну бунугу дузрайн буккан булларчан, мазру ва тагьарданува итххяхханссия ва хьхьичIунмай хьунссия, — увкунни МахIаммад МахIаммадовлул.
Ва батIаврий ляличIину пасихIну ва усттарну миллатир­ттал мазурдий шаэртурал назмурду дурккунни Ленинккантуллал школалул дуклаки оьрчIал.