Лакрал райондалул актовый залдануву хьунни райондалул Жяматийсса палаталул батIаву. Муний гьуртту хьунни райондалул администрациялул бакIчинал хъиривчутал Юсуп Рамазанов ва Ансар Къажлаев. БатIаврий цIунил увчIунни Жяматийсса палаталул хъунама.

Цинявппа рязину увчIунни Гъумучиял лицейрал директор МахIаммад Хъунбуттаев. МахIаммад Хъунбуттаевлул барчаллагь увкунни цайнна дурсса вихшалдарахлу. КIицI лавгунни Жяматийсса палата зун тIий бушиву райондалул администрациялущал цачIуну.
«Жяматийсса ялув бацIаврил система хьхьичIуннай даврийну, жяматрал вакилтал райондалул администрациялул давриву чялишну гьуртту хъанахъаврийну лахъ хьунтIиссар властьрал даврил даража», — увкунни МахIаммад Хъунбуттаевлул.
Лакрал райондалул Жяматийсса палата сакин бувну бур 2008 шинал, райондалул бакIчинал хIукмулийн бувну. Жяматийсса палаталувун ухлай ур 22 инсан, миннава 11 – райондалул бакIчинал увчIусса, 11 – райондалул депутатътурал увчIусса.