ДР-лул Печатьрал ва инфор­мациялул министерствалул баян бувну буссия республикалул СМИ-дал дянив террорданийн къаршисса теле – ва радиопрограммардал, телефильмардал ва журналистурал материаллал конкурс. Уттигъанну му конкурсрал хIасиллугу дурну, март зурул 3-нний Миллатрал библиотекалуву хьусса Печатьрал ва информациялул министерствалул коллегиялий хьхьичIунсса кIанттурду лайкь бувсса журналистуран дипломру ва арцуйну­сса бахшишру дунни.
Конкурсраву ххув хьуну, премиялун лайкь хьуминнавух бур «Илчи» кказитрал корреспондент Андриана Аьбдуллаевагу.
«Тай кIирисса сентябрь зурул гьантрай» тIисса, 1999 шинал ЦIуссалакрал аьрщарайн чапхунчитал ххявхсса чIумал «Телевышка» дуручлай къучагъшиврий жанну дуллусса Вирттавраясса макьалалух Андриана Аьбдуллаевал лайкь бунни 3-мур даражалул диплом ва арцуйнусса бахшиш.
Конкурсраву ххув хьусса журналистал барчагу бувну, миннахьхьун бахшишру дуллай ия ДР-лул ХIукуматрал Председательнал Цалчинма заместитель Анатолий Карибов.
Террорданийн къаршисса, терроризм дащуй дихьлахьисса Андриана Аьбдуллаевал цимирагу макьала дуркссар «Илчи» кказит­рай. Мура темалийсса конкурсраву ванил хьхьичIвагу бувгьуссия хьхьичIунсса кIанттурду. Цилва коллегахъул ПатIимат Рамазановащал ва Имара Саидоващал щалагу Аьрасатнал журналистурал дянив хьусса «Журналисты России против террора» конкурсравух гьуртту хьуну вайннал лавсъссия 2-мур даражалул диплом ва арцуйнусса бахшиш.
Мукунмасса диплом ва бахшиш Андрианал ларсъссия «Пат­риот Дагестана» республикалул конкурсравугу.
ДакIнийхтуну барча буллай буру жула дус ва коллега Анд­риана Аьбдуллаева конкурсраву лайкь дурсса бахшишращал.
ЧIа тIий буру тIайлабацIу, цIу-цIусса ххувшавуртту ва хьхьи­чIуннайшивуртту.
Даврил уртакьтал