Сталинградрахлусса талатаврин хас дурсса дарсру

IMG_8ЦIуссалакрал райондалий­сса школарттай хьунни Сталинградрахлусса талатаврин 72 шин шаврин хас дурсса личIи-личIисса мероприятиярду. Сталинградрай хьусса талатавриву Совет аьралуннал немецнал аьрал ххит бувсса талатаврин хас дурну ЦIуссачIурттащиял 2-мур школалий хьунни «Переломные сражения ВОВ» тIисса цIанилусса классный час. Ва мероприятиялий ихтилат бунни Аьли Асламхановлул.

Ванал бувсунни Сталинградрай хьусса талатавриву хъинну чIявусса инсантал ливтIушиву. Сталинград­рай талатаву най диркIссар 200 гьантлий. Тай гьантрай дяъвилул тарихраву яла къизгъинсса ва рахIму бакъасса талатавуртту най диркIссар. КIилчинмур дяъвилий Сталинградрай хьусса талатаву ккаллиссар ца яла хъуннасса талатаврин. Муния махъ немецнал аьралуннан гихунмай талансса умудгу левшссар.
ЦIуссачIурттащиял шярава ва талатавриву гьуртту хьуминная бувсунни тарихрал дарсирдал учитель Пайнусат Аьбдуллаевал.
Вава школалий дунни жулва билаятрал тарихрал лавгмунил ва бучIантIимунил кьадру буну, Буттал КIанттул цIанийсса дяъвилий виричушивуртту дурми дакIнийн бичлачисса ва Ватан ххирану оьрчIру тарбия баву мурадрайсса мероприятие.
Мукунма ДучIиннал школалий хьунни, «Дорогой мужества» тIисса, дяъвилул шиннардин хас бувсса шеърирду буккаврил конкурс.
Тарихрал дарсирдал учитель ПатIимат Кьурбановал 9-мур классраву дунни мува Сталинградуллахлусса талатаврий жулва аьралуннал дурсса чувшивурттан хас дурсса мероприятие. Ва дарсирай оьрчIал ххалдунни «Сталинград» тIисса художествалул фильм.
Вара темалун хас дурсса классный часру ва тIиртIу дарсру дирхьунни ЦIуссалакрал райондалийсса Банайюртуллал школалийгу.
ЦIуссалакрал райондалийсса школардай гихуннайгу хьунтIиссар Хъунмасса Буттал КIанттул цIанийсса дяъвилуву Ххувшаву ларсун 70 шин шаврин хас дурсса агьамсса цаймигу мероприятиярду.
ЦIуссалакрал райондалий цIусса школа ва оьрчIал багъ тIитIин хIадур хъанай бур