Вай гьантрай ЦIуссалакрал райондалул культуралул центрданий Дагъусттаннал эстрадалул чанна цIурттал украсса концерт ккаккан дунни. Концерт хIадур дурну дия ЦIуссалакрал райондалул культуралул управлениялул. Концертрал программа тIитIлай, Дагъусттаннал паччахIлугърал филармониялул хъунаманал хъиривмур Софья Разуевал барча бунни ДР-лул лайкь хьу­сса артистка ХIабибат Буттаева райондалул Культуралул управлениялул хъунаманал къуллугърай битаврищал ва чIа увкунни ва давриву тIайлабацIу.
Укун авадансса, ярг-яргми балайчитал гьуртту хьусса концертрал программа райондалул агьалинан хар-хавар бакъасса хъуннасса тирхханну хьунни.
Концерт дачин дурну бия республикалул тамашачитуран нукIува ххира хьусса артистал Луиза Шахдилова ва Саният Рамазанова. Машгьурсса Жамал Абакаров ва Арслан Шахмарданов сахIналийн бувккукун, тамашачитурал ми кьакъабагьавай хъатру ришлай, ххарину, бусравну кьамул бунни.
ЦIанихсса лакрал балайчитал бакъассагу, концертрай гьуртту хьунни машгьурсса Лаурита Аьшу­ева, Хадижат Жамалуттинова, Жанибек Рамазанов, ва м.ц. Цинявппагу артистурал ххари бунни тамашачитал нукIува ххира хьусса ва цIусса балайрдайну.
Тамашачитуралгу къавтIун буклай, хъатру ришлай ххирасса артистуран хъунмасса хIурмат бунни.
Концерт къуртал хьуну махъ ЦIуссалакрал райондалул Культуралул управлениялул хъунмур ХIабибат Буттаевал барчаллагь увкунни хъамаллурахь ва тамашачитурахь цала дуллалисса даврил чIарав бавцIуну, райондалул агьалинан укунсса тирхханну дурну тIий.