Январьданул 28-нний ЦIуссалакрал райондалул цинярдагу кIулшивуртту дулаврил идарарттай ларгунни ДАССР (Дагестанская Автономная Советская Социалистическая республика) сакин хьусса кьинилун хас дурсса мероприятияртту.

ОьрчIру Ватан ххирану тарбия баву, Дагъусттаннал халкьуннал культура ва аьдатру ядаву мурадрай, школардай дунни классный часру, дирхьунни хасъсса дарсру.
94 шинал хьхьичI, 1921 шинал январь зурул 20-нний сакин хьуссар ДАССР Ва Дагъусттаннал кьадардануву хъуннасса агьамшиву дусса ишну хьуссар.
Ва иширан хасну школардай хьусса мероприятиярттай учительтурал бувсунни оьрчIахь Да­гъусттаннал тарихрая, лавгмуния ва хIакьину республикалийсса тагьардания. «Маленькая традиция великого Дагестана», «Край мой – Дагестан», «Образование Республики Дагестан», «Очаг мой Дагестан», «Я дагестанец», «Великие люди Дагестана», «Культура и традиции народов Дагестана», «Языки – богатство Дагестана». Укунсса личIи-личIисса темардайсса классный часирдай оьрчIру цила бикIайкун кIул хьунни Дагъусттаннал тарихраву хьусса агьамсса иширттащал, мукIру хьунни Дагъусттаннал халкьуннал бюхттулшиврий, пагьму-гьунарданий, миллатирттал культурардал аваданшиврий.
Школардай мукунна вара кьинилун хас дурсса линейкарду ларгунни. Микку ихтилатру бунни школардай тарихрал дарсру дихьлахьи­сса учительтурал, дуклаки оьрчIал, жагьилтурал цачIушиннардал активистурал, шяраваллал хъуни­сриннал. Ихтилатчитурал бувсунни 94 шинал лажиндарай Дагъусттан Аьрасатнал субъект хIисаврай цIакь хьушиву ва хIакьинусса кьини Дагъусттаннал халкь яла захIматсса ва жаваблувсса масъалартту щаллу бансса даражалий бушиву.
ДАССР сакин шаврин хасну райондалул школардай хьунни оьрчIал дурсса давурттал выставкарду. «Резьба по дереву», «Ювелирные изделия», «Папье-маше», «Вышивка», «Умелые руки» кружокирдай дуклаки оьрчIал дурмур лархъун дия школардал фойердавун.
Школардай мукунна ларгунни викторинарду, сочинениярттал ва сурат дишаврил конкурсру. Вай мероприятияртту дуллалиний ххуйну дучIи ляркъунни райондалул музейрал экспонатру ва библиотекалул литература.