Шагьрулул бакIчи МахIаммад Сулаймановлул амрулийн бувну, цIана МахIачкъалаллал ва Каспийскаллал дянивсса ххуллул тиягу шиягу 600 метралул лахъишиврийсса металлопрофильданул чапар дихьлахьисса давурттив най дур.
Каспийскалийнсса бухмур ххуллуцI дакъасса, чапар дишин тIий бусса бур Ак-Гел бярнил зуманицIух дуллалисса объектру лакьингу. Ва даву дуллай бусса бур, ми дуллалисса объектру сававну, ххуллул чIалачIин ххуй дакъасса, заллу-зал акъа кьабивтсса кунмасса кIанттурдал тагьар хьуну дуну тIий. Чапар дишин багьлай бусса бур ми объектирдал заллухъруннал. Амма аьрщарал ва дуллалисса къатрал заллухъру лякъин бюхълай бакъа тIий, ва даву цала бакIрайн ларсун дур шагьрулул администрациялул. Лявкъуми заллухъругу рязи къашайсса бур цала харж-хуржлийну чапар дишин.
Шиккува кIицI лаган, кIива шагьрулул дянивсса паччахI ххуллуцI дуллалисса къатрал ва объектирдал хьхьичI чапар чIумуйссар дихьлахьисса.
Лажин хIадур дурссар
З. АьбдурахIмановал
