Арцу датIай ххуржинтту ялугьлагьиссар

Аьрасатнал хIукуматрал дурар вари чинсса хъинчулиннай­сса дахханашивуртту дайдишин гьашину агьалинал оьрмулуву: бувар харжру, пенсияртту гьаз бан, дуки-хIачIиялухсса, гьарзатрахсса багьри кIилийну-шамлийну ххи хьурчагу. ЖучIанна дучIаймур ххи къадулларчагу, жучIатура нанимур ххи дувансса чараннуми циван къаляхълави?!

Январь зуруя тIайла хьуну, ЖКХ-лул услугарттахсса багьраву ххи хьун тIий бур ца цIусса бутIа: чIяру зивурдайсса къатраву капремонт дансса республикалул программа дузрайн дуккан дуваншиврул, гьарцагу квартиралул залуннан дулун багьлай бур зуруй 5 къуруш ва 20 кIапIикI квадратный метралух хIисавну. Масалдаран, 2 къатта бусса квартиралуву яхъанахъисса ттун зуруй 250 къуруш дулун багьлай бур. ХIисав барча, гьарманал капремонтрансса арцул ххуржинттавун дичавантIиссар зуруй 135 къурушрая тIайла хьуну 620 къурушрайн дияннинсса. Ми ххуржинттал заллугу – капремонт­рал дагъусттаннал некоммерческий фондри. Уттива баян бунни му идаралул вакилтурал февраль зурул 10-ннин гьарцагу квартиралул залуннал дагьайссаксса арцу капремонтрансса ххуржинттавун дичин аьркиншиву. Къадичланну тIий махъаллил хъанахъимигу судрал низамрайн кIункIу бувантIишиву.
Гьаннайсса, ялугьлай дуссар жухра арцу датIай ххуржинтту. Най бунува учинна, квадратный метралух ххюра къурушраха лирчусса арцу хIисавну къачIярур. Гьакссагу тIайласса давур, подъездру ва подваллу, къатрал хьхьичIсса майданну мурдал буву паччахIлугъ дакъар, инсанталли ми чапалгу, мурдалгу дуллалими, тIутIиссагу бур. ПаччахIлугъ агьали биттунмуних хьуну дур, цукун биттурчагу, биривсса къаз биттунну тIисса кьяйдалий щуруй дур тIутIиссагу бур. Ссаву ци буссарив най бунува чIалангу къабикIай. Ттувугу чIявуминнавусса тамахI бур – гьай-балики, ттивагу подъездру, подваллу ремонт буллан, чIяру зивурдай къатрал диц-куц, чIалачIин ххуй дуллан.
Гьай – балики… Амма му тамахIрайх ххач буклай бур гацIана цамур пикрилулгу: зуруй 250 къуруш дулару «Техническое обслуживаниялух». Амма ца стояк ххуйну къазий буну, жуща, я чIаххураща къавхьунни му «техническое обслуживаниялул» заллухъру бучIан бувну, му стояк зузи буван бан. Вана укун. Капремонтралмур иш цукунсса бикIанссарив къакIулли. Миннал ххуржинттуми ялугьлай дуссар адархъун жухра.