ЦIуссалакрал райондалул администрациялул бакIчи ХIажи Айдиевлул цалва хъиривчутуращал дунни ларгсса шинал дурсса даврил хIасиллу дуллалисса ва гьашинусса шинал дантIисса давурттая бусласисса совещание.
ХIажи Айдиевлул барчаллагь баян бунни ларгсса шинал дурсса давурттахлу ва кIицI лавгунни цаппарасса давурттал ккаккияртту уттигу ларай дан аьркиншиву.
ЦIуссалакрал райондалий налогру датIаврил ккаккияртту 105% щаллу хьуну дур. «Налогру датIаврил ккаккияртту гьаз дурну дунагу, жущава бювхъунни му план щаллуну биттур дан. Аьрщарал ва строительствалул объектру сантирай зузи давриву жу хьхьичIунминнавух буру, му нирхиравун дагьсса даву уттиния тихуннайгу дуллан дакIний буру», — увкунни ванал.
Ва совещаниялий ХIажи Айдиевлул чIурчIав дунни терроризмалийн къаршисса комиссиялул даву чялиш дуккан даврий. Ва масъалалул хIакъиравусса ялув ацIаву тапшур дунни цала хъиривчу Гъайирбек Мусаевлуйн.
Мукунма ХIажи Айдиевлул кIицI лавгунни Шяраваллил хозяйствалул управлениялул давриву диялдакъашивуртту дакъашиву, амма бур уттигу цаппара масъалартту щаллу бан аьркинсса. Бувсунни мукунма гьашинусса шин республикалий Багъманчитурал шинну баян бувшиву, ва му ара цIудуккан даву мурадрайсса давурттив чялиш дуккан дан аьркиншиву.
Ва совещаниялий шяраваллил хозяйствалул давриву ххуйсса ккаккияртту чIалачIи дурсса зузалтран хIукуматрал наградартту дуллунни. Аьрасатнал Федерациялул Шяраваллил хозяйствалул барчаллагьрал чагъар буллунни Лениннул цIанийсса СПК-лул механизатор Ахсар Аьбдуллаевлун, ДР-лул ХIукуматрал чулухасса ХIурматрал грамота дуллунни Орджоникидзел цIанийсса СПК-лул председатель ТIагьир Давдиевлун.
Гьаз бунни совещаниялий шяраваллава ччюрк дуккан даврил хIакъиравусса масъаларттугу. Вай масъалартту дузал баврил ялув ацIан тапшур бувну буссия администрациялул бакIчинал заместитель Хизри Рамазановлуйн.
Шиккува райондалул бакIчинал бувсунни ЦIуссалакрал райондалул Культуралул управлениялул хъунмурну бивтшиву хьхьичIва ва управлениялул хъунмунил заместительну бивкIсса ХIабибат Буттаева.
Администрациялул аппаратрал каялувчи СултIанат Цунтаевал дакIнийн бувтунни гьашину жулва билаятрай кIицI лаглагишиву Ххувшаврил юбилейрал 70 шин ва мунийн бувну байрандалийнсса хIадуршинна дуллансса оргкомитет сакин буван аьркиншиву.
Ахирданий райондалул бакIчинал цалва заместительтурайн тапшур бунни цайнма тапшур бувсса бигарду щаллу буллан.
Лажин хIадур дурссар
И. Саидовал
