ЦIусса шинал январь зурул 4-нния 7-ннин бияннин Къабардин-Балкьарнал республикалий Нальчик шагьрулий хьунни «Зажги свою звезду» тIисса Дунияллул халкьуннал фестивальданул конкурс. Фестиваль-конкурсрал сакиншинначитал хьунни Ккав­кказнавусса Мировой Артийский комитетрал представительство, Аьра­сатнал Халкьуннал Ассамблея, Дунияллул Халкьуннал творчествалул Академия. Ва конкурсрал агьаммур мурадгу бур гьунар бусса, итххявхсса оьрчIру аьлтту баву.
Шикку гьуртту хьунни Абхазнавасса, Кьиблалул АьсатIиннавасса, Адыгейнавасса, Дагъусттаннаясса, Къарачай-Чаргаснавасса, Къабардин-Балкьарнавасса, Чачаннавасса, Ингушетиянавасса ва чIярусса цаймигу регионнаясса ва шагьрурдаясса пагьму-гьунар бусса оьрчIал ансамбльлу.
ЦIуссалакрал райондалул администрациялул бакIчи ХIажи Айдиевлул чIарав ацIаврийн бувну, Дагъусттанная ва фестивальданий гьуртту хьунни «Эдельвейс» тIисса ЦIуссалакрал райондалул искусствалул школалул ансамбль. «Фольклорный танец» тIисса номинациялуву 1-мур кIану бувгьунни ДР-лул лайкь хьусса артист Мурад Сулаймановлул каялувшиву дуллалисса «Эдельвейс» ансамбльданул. Вай цивппагу лайкь хьунни Мусил медальданун.
«Народное пение» тIимур номинациялуву 3-мур кIану бувгьунни мува искусствалул школалул дуклаки душ Зайнаб Хутиевал.
Балкьарнал сахIналий цалчин гьуртту хьусса жулва оьрчIал лавайсса даражалий ккаккан дунни Дагъусттаннал халкьуннал культура, цалва пагьму-гьунар ва итххяххаву.
Фестивальданул жюрилулгу жула оьрчIал магьиршиврун багьайсса кьимат бивщунни.
Фестивальданий гьуртту хьусса циняв оьрчIру цIусса шинал дайдихьулий хьусса аьрххилия рязину зана хьунни.
Мукунна ва фестивальданул лагрулуву хъунив хьуминнал интернатрайгу ккаккан дунни чирилунсса концерт. Миккугу чялишсса гьурттушинна дунни ЦIуссалакрал райондалул искусствалул школалул оьрчIал.
Фестивальданий гьуртту хьуцири дакIнийхтуну барчаллагь тIий бур цивппа аьрххилий тIайла бувксса ЦIуссалакрал администрациялухь ва Жагьилтурал иширттал комитетрахь.
Ва ансамбль фестивальданий ххув хьуну зана хьуну мукьах вайннащал хьунаавкьунни ЦIуссалакрал райондалул администрациялул бакIчи ХIажи Айдиев. Бувсунни оьрчIал ва ххувшаву ласун Нальчик шагьрулийн лавгсса аьрххи-ххуллий хIасул хьусса асардая.
Райондалул бакIчинал ансамбльданул гьурттучитал барчагу бувну, махъ буллунни ва ансамбльданул уттиния тихуннайгу ишла дуллансса цIу-цIусса цаймигу костюмру машан ласунсса.