Январьданул 16-нний Кировский райондалул бакIчи СалихI Сагидовлул ЖКХ-лул масъаларттал ялув ивтсса хъиривчу МахIаммад Юсуповлущал архIал райондалул цаппара кIичIирттал тагьар ххал дунни.
Шагьрулул районнал бакIчитал ва пишакартал укунсса аьрххирдай бувккун, кIантту-кIанттурдай ци диялдакъашивуртту дурив дакъарив ххал дуллан МахIачкъалаллал бакIчинал амрулий дуллалисса давур.
КIичIирттаву ци тагьар дурив ххал даврицIун, районнал бакIчитурая тIалавну буссар дахху-ласу дуллалисса ттучаннал ва цаймигу цалла ишбажаранчишиву дуллалисса объектирдал заллухърунная ттучаннал, дялахърурду дувайсса заллал ва цаймигу цалва маэшат буллалисса кIанттурду лази-лавкьуну, микку низам дуваврил ялув бацIаву. Масалдаран, Цалчинмур МахIачкъалаливсса Маяковскийл кIичIиравусса ттучаннал заллухъруннащал СалихI Сагидовлул багьайсса ихтилатгу бувну, тIалав бунни нюжмардул дянив, цивппа заллусса ттучанну налограл сияхIрайнгу лахъан бувну, ттучаннал хьхьичIсса цIинцI-ччюрк дуркьун, гиччалу марцI буллан.
Мукунма ва кIичIираву чан къашай, цIинцI дичинсса контейнерду диял къахъанай, халкьуннал ду-дунийн ччюрк дирчусса ишругу. Райондалул бакIчи ялтту уклакисса кьинигу дия вара тагьар. СалихI Сагидовлул кIичIиртту лакьлакьисса «Каспий-Инвестрайн» оьвкуну, баян бунни мугьлат бакъа ччюрклицIа кIичIиравалу лакьира куну.
Хъирив Кировский райондалул бакIчи ивунни Научный городокрай дурсса цIусса къатрал чIарав «стихийно» хьусса ччюрклил свалкалийн. Га кIаная 50 метралул тиннай дирхьусса контейнердачIан халкьуннал ччюрклил кьуцуртту биян къабуллай хьусса свалка дусса дур ва. Мукунма вайннан ччай бакъасса бур Управляющий компаниялущал цIинцI-ччюрк дукьлакьаврих арцу къадулланшиврул кьутIирду чичингу. Ччюрклил бакIулучIа чан къашайсса бусса бур чIарах нанинайн хъап учин хIадурсса шярал ккаччив, пухпусур канакисса гъаттара. ЦIинцI лакьаврих дулунсса арцуй мяш хъанахъисса халкьуннан кьамулну дусса дур цала чIавахьулттал кьатIувсса къаххуйсса тагьар.
СалихI Сагидовлул бусаврийну, ва свалка, администрациялул зузалтгу гьурттуну, лази-ларкьуну диркIун дур апрельданий хьусса субботникрал гьантрай. Ванал, мукунма, баян буннива зурул ахирданий цинявннал аьмну субботникру дувайсса махъра-махъсса ххуллун кьини шикку хъуннасса субботник дувантIишиву.
Лажин хIадур дурссар
З. АьбдурахIмановал
