Декабрьданул 29-нний Дагъусттаннал БакIчи Рамазан АьбдуллатIиповлул Дусшиврул къатраву хьхьичIунсса, республика тIутIайх дичавриву захIмат бивхьусса дагъусттанлувтуран дуллунни паччахIлугърал наградартту.
ХI. Аьдилов
БавтIминнал хьхьичI махъ лахълай, Р. АьбдуллатIиповлул республикалул каялувчитурал цIанияту барчаллагь увкунни бавтIминнахь ххуйсса давурттахлу, Да­гъусттаннай хъанахъисса дахханашивур­ттан кумаг баврихлу.
Республикалул хъунаманал бувсу­нни лаглагисса шинал хьун дурсса хьхьичIуннайшивурттаяту. Ганал му­къурттийн бувну, дан ккаккан дурсса давурттава чIярусса дурну дур, амма ялун нанисса шиналгу дуван аьркинсса давуртту къачансса личIлай дур.
Ганал дакIнийн бувтунни 2014 шинал Аьрасатнал ххуйсса даражалий бувну бивкIшиву Олимпий тIуркIурду, гайннуву ххувгу хьуну бивкIшиву, щалла дунияллун тасттикьгу бувну бивкIшиву жува цIакьгу хьуну, кьянкьану ччаннай бавцIунугу бушиву. «Ттул пикрилий, аьмну ларсун ларгсса шин даркьусса, барачатсса хьунни Дагъусттаннангу, Аьрасатнангу. Жура гьашинугу дуллай бивкIру республика «марцI дуккан даву» ва «цIудуккан даву». Жунма багьунни чIярусса дахханашивуртту дуван, уттара дуккан дуван», — увкунни Республикалул хъунаманал.
Р. АьбдуллатIиповлул бувсунни, ку­тIасса мутталий республика хьхьи­чIунсса кIанттурдайн дуккан дан бювхъуну бушиву экономика ва промышленность лядуккан даврин хасну. Дагъусттан Республикалул исполнительный властьрал органнал давурттал мюнпатшиврун бивщусса кьиматрайн бувну, республика 56-мур кIанавату 36-мур кIанайн лархъун дур.
«Цавагу субъектраща къавхьуссар муксса хьхьичIунмай буккан. Дагъусттан ччянива ялугьлай бивкIссар мукунсса дахханашивуртту даврих, низам дишаврих, законну биттур дуллалаврих, инсаннал ихтиярду ва илкиншивуртту дуру­ччаврих», — увкунни ДР-лул БакIчинал.
Рамазан АьбдуллатIиповлул га кьини ацIрахъул наградартту дуллунни респуб­ликалул хьхьичIунми инсантуран.
Орден Мужества дуллунни цалва даврил бурж биттур буллай ливтIуминнал мачча-гъаннахьхьун.
АьФ-лул Президентнал ХIукмулийн бувну, Орден Дружбы дуллунни цIа дурксса композитор, ляличIисса пагьму бусса оьрчIансса школалул директор Мурад Къажлаевлун.
«За заслуги перед Отечеством II степени» медаль дуллунни ДР-лул ФСБ-лул Дазул къаралданул ветерантурал советрал председатель МахIмуд Гьаруновлун.
АцIвахъул цIа дурксса актертуран, художниктуран, шаэртуран, чичултран, строительствалул зузалтран, журналистътуран дуллунни цалва бутIран хасъсса хIурматрал цIарду.
«За заслуги перед Республикой Дагестан» Орден дуллунни ДР-лул ХIу­куматрал Председатель Аьбдуссамад ХIамидовлун. Мукуннасса орденну дуллунни цайминнангу.
Республикалул каялувчинал ХIур­матрал грамотартту дуллунни чичу Шапи Казиевлун, ДР-лул физкультура­лул ва спортрал министр МахIаммад МахIаммадовлун, КФХ-рдал каялувчитуран, цаппара журналлал редактортуран, Хъунзахъиял, Къизлардал районнал бакIчитуран.
Гьашину лачIун буккаврил дунияллул чемпионтал хьусса спортсментал Аьбдуссалам ХIадисовлун ва Аьбдурашид Сяъдуллаевлун дуллунни квартирарттал кIулли.