Ларгсса нюжмардий, хамис кьини, МахIачкъалаллал аэропортрай цалчин кьамул дунни Лоукостер «Победа» авиакомпаниялул Боинг 737-800.

И. Саидова
ЦIусса шинал январь зурул 15-нния байбивхьуну ва авиакомпаниялул цIуну тIиртIунни Москавлия МахIачкъалалийнсса ва махъуннайсса рейсру. Ми рейсру цирдагу дуллан тIий бур гьарица кьини.
Ва компаниялул чулухасса информациялийн бувну, цIуну тIиртIусса рейсрайнсса электрон журалийсса билетру бахлай байбивхьуну буссар. Москавлия МахIачкъа­ла­лийн­сса рейс дайдихьлахьиссар кIюрххил ссят 09: 05. Му рейсрай МахIачкъалалийн биллали­ссар ахттайн ссят 11:30.
МахIачкъалалия махъуннайсса рейсгу дайдихьлахьи­ссар ссят 12:20. Ва Боинграй МахIачкъалалия Москавлийн биллалиссар ссят 14:55. Москавлия Дагъусттаннайн ва махъуннай лехлахисса Боинграй бур 135 пассажирнансса кIантту.
ХIакьинусса кьини ва авиакомпаниялул тIиртIусса, Мос­кавлия МахIачкъалалийнсса ва махъуннайсса рейсирдайн­сса яла кьювкьуми билетир­ттал багьа бур 999 къурушрая 1999 къурушрайн бияннинсса. Ялув кIицI лавгсса билетрал багьлувун къадагьлагьиссар авиакомпаниялул чулухасса хIа­л­лихшиннарду.
Ва рейсрая цалчин Москавлия МахIачкъалалийн бувкIсса пассажиртал билетрал багьраягу, цурда Боинг леххавриягу рязисса хаварду буслай бия.
Шиккува кIицI лаган, хIа­кьинусса кьини ва авиакомпаниялул дуллалиссар агьали кьювкьусса багьлуй ххилаххисса рейсру.
«Победа» авиакомпаниялул Москавлия укуннасса рейсру дуллай буссар Волгоградрайн, Самаралийн, Екатеринбурграйн, Тюменнайн, Белгородрайн, Сургутлив, Владикавказрайн, Челябинскалийн, Сочилийн, Минводылийн ва Пермьлив. МахIачкъала хъанай бур ва авиакомпаниялул чулухасса рейсру тIиртIусса Аьрасатнал 12-сса шагьру.