Аьдатравун багьсса куццуй, гьарица шинал ахирданий оьрмулуву хьусса дахханашивурттая, асар хьусса, дакIний личIансса иширттая цIухху-бусу бару жу махъ нанисса, сий дусса миллатрал вакилтурахь.
Ва даву дуллалисса чIумал чIалан бикIай гьарицагу инсан, архсса зунттал шяраву ялапар хъанахъимагу, дазул кьатIувмагу, хъунасса къуллугъчигу, укунасса зузалагу миллатрай дакI цIий ушиву, жулва маз, культура дуруччаврил буруккинттарай ушиву.
Укунсса ххаллилсса арсру, душру миллатраву буссаксса, чаннасса бучIантIимунийнсса хьулгу ххишала шай. Я Аллагь, щалагу миллатран даркьусса, барачатсса шин хьуннав. Жува тIимур Залгу тIий лякъиннав.

АхIмад АхIмадов, балайчи, Дагъусттаннал халкьуннал артист:

Ларгсса шин оьрмулуву ва давриву ттун тIайлабацIу бусса дия.
Яла дакIний личIансса ва ххарисса иш хьунни ттунна «Дагъус­ттаннал халкьуннал артист» тIисса бусравсса цIа дулаву. Мукунма Туркнал ХIукуматрал чулуха ттуйн бувкIунни тюркнал культура ва литература хьхьичIуннай дан бивхьусса захIматрахлу барчаллагь тIисса чагъар.
Ларгсса шинал ттун унни кIилчинсса арс. Мугу жул кулпат­раву хъуннасса ххаришиву хьунни. Ттун ччива цIусса шинал гьарицагу кулпатраву укунсса ххаришивуртту чIярусса хьуну, арсру, душру буллай, жулва миллатрал аргъ дизаннав.
Ххирасса, аьзизсса, тачIав дакIния къабуккайсса, инава чIивинугу, чIан хъинну куртIсса, ттул Лакку жямат! Ихтияр дулара ва жулва «Илчи» кказитрайхчIин барча дуван зухь ЦIусса 2015 шин. ЧIа тIий ура зун ххаришиву, тархъаншиву, дяъви бакъасса дуниял. Жагьилминнан ххуллурду тIитIиннав, мурад­ру щаллу хьуннав. Нитти-буттал ялун биллан, кIай ххари буллан, жулла Лакку мина хъамакъаритан чув бухьурчагу жулва лакрахьхьун цIуллушиву дулуннав, жува тIиний Залгу лякъиннав.

Мусалан Тахманов, ДР-лул БакIчинал администрациялул ва ХIукуматрал хъунаманал хъиривчу:
Гьарица жуятура нанисса шинал цила ша кьабитай билаят­рал бикIу, республикалул бикIу тарихраву.
Ларгунни ца шин ттигу. Му жула агьалинан дакIний лирчIунни бюхттулсса даражалий ларгсса кIинтнил Олимпиадалийну, мукунна жула билаятран хъуннасса агьамшиву дусса цамургу иширайну – бикIлилла жула диркIсса Къиримнал аьрщи ва Севастополь шагьру АьрасатнацIун цIакь шаврийну. Республикалийгу хьунни социал-экономикалул ва культуралул ара хьхьичIуннай дансса хъунисса дахханашивуртту. ХьхьичIми шиннардих бурувгун, Дагъусттаннай мадара паракьатшиву хьунни. Ттулва оьрмулувусса иширттая тIурча, ЦIусса шин ттулва кулпатрал ва нава, оьрчIал ва оьрчIал оьрчIал хьунадакьин тIий буру цIусса, гьарта-гьарзасса къатраву. Жу ссавур духларгун ялугьлай бу­ссияв вай къатри къуртал дурну, шивун бизаннин. Утти жул хиял бартлавгунни. ЦIусса шинал гьарицагу инсаннал хиял жулмур кунма бартлаганнав, гьарицама цала-цала дакIнийсса мурад­райн ияннав. ЦIусса шинал Аьрасатналгу, Дагъусттанналгу халкьуннал оьрмулуву цIу-цIусса хьхьичIуннайшивуртту хьуннав. Дуллалимунил ахир хайрданийн дукканнав. Бивзсса ша тIайлабацIусса хьуннав. Ххаришивуртту чIяру даннав.
Зувагу, зулва гъан-маччамигу цIуллуну, сагъну, куннал кув ххари буллай битаннав.

Юсуп Губулов, Республикалул ортопедиялул ва травматологиялул центрданул ортопедиялул отделениялул хъунама, цIуллу-сагъшиву дуруччаврил отличник, лавайсса категориялул врач
Жуятура нанисса шин хьхьичIра-хьхьичI ттун дакIний лирчIунни жулва кулпатраву хьусса хъуннасса ххаришиврийну. Ттул арснан душ бунни. Ва жул кулпатраву цалчин­сса оьрчIал оьрчIри.
Ялагу шин дакIний лирчIунни ттулва пишалуцIун, даврицIун бавхIусса мюнпатсса аьрххилийну. Шинал ахирданий Москавлив ларгунни Аьрасатнал ортопедтурал ва травматологтурал 10-сса съезд. Цайми билаятирттаясса хIакинталгу гьуртту хъанахъисса му съездрал делегатну нагу увчIунна. Нава зузисса центрданийгу цIу-цIусса технологияртту ишла дуллай, артроскопический операцияртту буллан бивкIру.
Сустав баххана байсса операцияртту булланссагу пикри буссия, амма цаппарасса мунин аьркинсса затру щаллу дан къархьуну, му даву дайдишин къабювхъунни. Жулва халкь сустав баххана бан тиху-шихунмай занази къабувну, жучIава буллан ччай буру, хIадурнугу буру. ЦIусса шинал байбишин умуд бур.
ЦIусса шинал жулва халкьуннан хьхьичIра-хьхьичI цIуллушиву чIа тIий ура. Чан хьуннав бала-апатIру, цIунцIияртту. Жулва ххуллурдай гьарза хьуну бур машинартту, чIяру хьуну дур ДТП-тту. Мунияту, инсантуран апатIру, цIунцIияртту хьусса ишру ялу-ялун чIяву хъанай бур. На чIа учивияв, аьрххи-ххуллийн увксса гьарца инсан сагъ-саламатну цала кулпатирттавун зана хьуннав, куну.

МахIаммад ХIусманов, Буйнакскаллал агрегатру бай завод­рал хъунама конструктор:
— Ларгсса шинаву яла нава рязину ливчIсса зат му хьунни, чIярусса шиннардий данну тIий бивкIсса, Щурагь ялапар хъанахъисса чIяй­ннал ккуран сакин дарду. Ноябрь зуруй ккурандалул цалчинсса батIаву хьунни. Жяматрал дянивсса масъалартту бивхьуну, ми щаллу бансса ххуллурду ляхълахъисса ихтилатру хьунни. Ва ккурандалул хъунаманугу увчIарду жяматрачIа бусравсса, цIана пенсиялийсса аьраличу Юсуп Юсупов. Мунал цалчинсса хъиривчуну увчIарду Гъазлаев Гъазиибрагьин-хIажи. Буйнакскалий диндалул, бивкIу-буккулул иширтталсса буллан жу ванайнгу, ванал кулпатрайнгу тапшур барду. Жун пикри буссар Буйнакскалий ялапар хъанахъисса цайми лакращалгу хьунабавкьуну, шийх хъуннасса лакрал ккуран дансса масъала гьаз бан.
Инсаннал оьрмулуву, жунма цуксса къаччайнугу, пашмансса ишругу хъанай бур. Вай гьантрай ттул аьзизсса кулпат дунияллия лавгун шин хьунни. Мунил дуллай бивкIсса, шагьрулуву уртту-тIутIив дугьаврил даву шагьрулул администрациялул ттуйн тапшур дунни. ХIарачат банна, ттулва кулпатрал кунна ххуйну ва даву дуллай, ттуйнна дурсса вихшала лайкь дан.
Нава рязисса иш хьунни, ялагу, ккурандалул батIаврий маслихIат щавщун, Буйнакскалий, МахIачкъалалив, Москавлив ва цаймигу шагьрурдай ялапар хъанахъисса чIяйннал кумаг бувну, хъинну къашавайсса жула шяравудуш хъин хьун Москавлив тIайла буккан бюхъаву. Жун му къулай хьусса ххарисса хавар бавунни. Уттигъанну хьусса ккурандалул батIаврий, жулва оьрчIан лакку маз лахьхьин баврил, Буйнакскалий ялапар хъанахъисса гьарица лакрал къушливун «Илчи» кказит бучIан баврил масъала гьаз барду.
Ххуй чулиннайсса дахханашивуртту хъанан най дур 40-хъайсса шиннардий нава зузисса (хьхьичI – хъунама технологну, цIана – хъунама конструкторну) Буйнакскаллал агрегатру бай заводрай.
ХIакьинусса чIунгу, чил хIукуматирттащалсса арардугу хIисавравун ларсун, жул завод хъуннасса къулагъасралун лавсун бур ХIукуматрал. Микку производство цIудуккан дурну, цIусса агрегатру буллан, инсантал давурттал дузал буллан ккаккан бувну бур. Жулва заводрал сий хьхьичIра кунна гьаз хьунссар тIий ура.
ЦIусса шин барча тIий, щалва лакрал жяматран цIуллушиву дулуннав тIий ура. РахIатсса, бигьасса шин хьуннав. КIама бивщусса кунма щаллагу дунияллийх ппив хьусса лакрай, Дагъусттаннал халкьуннай Аллагьнал цIими бишиннав. Бала-апатIру арх баннав. Цанма ччикун оьрму бутансса кашигу, цIуллушивугу дулуннав.

Аьли МахIаммадов, Австриянал музыкалул университет­рал студент, ш. Вена

Ларгсса шин ттул оьрмулувугу, творчествалувугу хъуннасса агьамшиву дусса иширттацIун дархIусса, чIявусса тIайлабацIуртту хьусса, шин дия. На увхра дуклан Австриянал Вена шагьрулийсса музыкалул ва прикладной искусствалул университетравун. Ва Австриянаву яла лаваймур даражалул кIулшивуртту дулайсса университетран ккалли­ссар. ЛяличIинува дакIний личIансса иш хьунни нава шийх «Вольный стрелок» тIисса немецнал опералул агьаммур партия щаллу даву. Ва опералул командалущал на гъирарай зий ивкIра. Репетициярдал чIумал хъиннува гъанну кIул хьура шиву гьуртту хъанахъиминнащал. Куннан кув бувчIлай, кунная кув рязину бивкIру. Спектакльгу хъинну ххуйсса хьунни. Дуклан увххун хъунма хIал къавхьуну ттуйн оьвкунни Вена шагьрулийсса ца яла хьхьичIрамур архитектуралул гьайкалну хъанахъисса Петерскирхе тIисса концертирттал залдануву ттулалусса балайрдал ва оьруснал композитор П. И. Чайковскийл музыкалийсса дуэтру тIутIисса концертрал программа хIадур дан.
Укун агьамсса концертрал программа хIадур дан ттуйнна вихшала даврия на хъинну ххарира. Ва концерт ккаккан дурну махъ ттуйн оьвтIий бур Германнавун. Вай концертирттайн хIадур хъана­хъисса репетициярдай на кIул хьура Австриянал хьхьичIунсса композитортуращал, музыкантътуращал. Миннащалсса хьунабакьавурттая ттул творчествалун хъунмасса кумаг хьунни.
Ларгсса шинал ттулва оьрмулуву хьусса иширттаву яла дакIний ливчIмур ва ххаримур хьунни нава Дагъусттаннайн ттула концертращал учIаву. Ва аьрххи бия ттун ца чулуха Ватандалийн учIаврия ххарисса, гамур чулухагу Да­гъусттаннал халкьуннал нава цукун кьамул авивав тIий вас-ццахлийсса. МахIаттал хьуну ивкIра зал тамашачитурал бувцIуну ккаккайхту. Хъинну ххуйну кьамул увра на ттулла Ватандалий. Хъунмасса барчаллагьрай ура буттал шяраваллил агьулданийн – Бархъаллал жяматрайн ттула чIарав бавцIусса. ЦIусса шинал чIа тIий ура лакран, цинявппагу Дагъусттаннал халкьуннан барачат, буллугъшиву. Цаннал ца бугьаву, куннан кув бувчIлачIаву. Гьарза хьуннав ххарисса, чаннасса асардал бувцIусса лахIзарду. Хъинну ччива уздансса, хьхьичIунсса лакрал миллатрая, Дагъусттанная щалла дунияллун кIул хьуну. Дуссар жучIара цайминнан ккаккан данмур, пахру-ххара бан лайкьмур.

Камил ХIажиев, Файт-Найтс компаниялул генеральный продюсер, тренер:
— Ларгсса шинаву ттунма дакIний ливчIсса агьамсса иш хьунни Сочи шагьрулийсса Олимпиада ва му Олимпиадалий Аьрасатнал Сборная ххув шаву. Му ххувшаврил аьрасатлувтурал дакIру тирх учин дунни, Ватандалухсса ччаврил вибуцIин бунни.
Нава рязисса иш хьунни Москавлив, Къалмукьнаву, Брянскалий Файт-Найтсрал единоборствардал академияртту тIитIаву. Ва жулва нас­лу цIуллу-цIакьсса бикIаншиврийн вихшала дишинсса иш хьунни.
ЦIусса шинащал барча буллай, чIа тIий ура гьарца инсаннан цIуллу-цIакьшиву, тIайлабацIу. Каширду ххи хьуннав, дуллалимур дузрайн дукканнав.

Карина ХIусайнаева, ДР-лул юстициялул управлениялул хьхьичIунсса специалист-эксперт
Янил ляпI учиннин ларгунни шин. Ттунна му шин дия яргсса, личIи-личIисса ххари­сса иширттацIун ва тIааьнсса асардацIун дархIусса. Учин бучIир, тIайлабацIусса шин дия давривугу, даврил кьатIувгу. Отпуск гьан дав караматсса тIабиаьт ду­сса кIанттурдайсса санаториялий. Ччарча вацIлуву сайр бавай, ччарча бярув гьузун бучIавай, ччарчагу велосипедрай бигьин лагавай ца ххуйну бигьалавгун бувкIра.
Давривугу ттул хIарачат хъуниминнан хIисав хьуну, ххуйсса кьимат бивщунни. Ттун дуллунни ХIурматрал грамота.
ЦIусса шин! Караматсса байран дур. Хъунимигу, мюрщимигу тамашалух ялугьлагьисса ва мунийн вихсса. ЦIусса шинаву хьуннав гьарица инсаннал оьрмулуву дакI ххари дансса чIивисса бунугу ссихIир. ТалихI бусса, тIайлабацIусса шин хьуннав!

Мадина Абачараева, филологиялул элмурдал кандидат, Дагъусттаннал педуниверситетрал ингилис мазрал кафедралул хъунмур преподаватель:
Ларгсса шин ттулва оьрмулуву хьусса агьамсса ва ххарисса ишир­ттайну дакIний лирчIунни. ИЯЛИ РАН-луву аспирантурагу къуртал бувну, лакку мазрайн дагьайсса диссертациягу лайкьну дурурччуну, кандидатнал цIа ласав. Нину-ппу шагьрулий мина дирхьусса бунугу, нава хъунма хьуссара Ккурклив, ниттил нину УммухIабибатлучIа. Диссертациялул темагу «Язык песенного фольклора лакцев» тIисса, ттулла дакIнил ларсъсса, лакку мазрацIун, лакрал культуралуцIун ва аьдатирттацIун дархIусса дия. Мунияту гъирарай зий бивкIра му давриха. Ттул диссертация хъанай дур лакрал балайрдал фольклорданул цалчинсса ахттаршиннардава­сса ца. ДакIниву хъуннасса ххаришиву дур му нара дурсса даврицIа.
Хьунни ттул оьрмулуву цамургу ххарисса иш. Диссертация дурурччуну ца зурува дунияллийн увккунни ттул кIилчинсса арс Анзор.
Ялагу, ттул нитти-буттал – чIявучин кIулсса аьлимчу, Ххюлуссуннал шяравасса Муса Абачараевлул ва цилва оьрму оьрчIан кIулшивуртту дулаврин хас бувсса Ккурклиятусса Мисай Аьвдурашидовнал, цинявппа гъан-маччамигу лагма лавгун, кIицI дунни мусил хъатIул юбилей.
Ялун нанимур шингу жулва кулпатрангу, цинявппа лакрангу тIайлабацIусса хьуннав тIий бура.
Жува, лак, чIявусса бакъару. Куннал чIарав кув бацIияра, жула культурагу, аьдатругу дуруччияра, гъалгъа тIутIияра ичIува лакку мазрай, лахьхьин бувара лакку маз зулва оьрчIан. Жулва буттахъал зумувну яхI-къириятрай оьрму бутансса цIуллушиву дулуннав гьарица лаккучунан. Гьарица лакку ужагърай барачат ликканнав.

Дилара Базаева, АьФ-лул 3-мур классрал юстициялул советник, Верховный судрал отделданул хъунмур
Куннил хъирив кув шинну ккуру най, духмур ялату лаглай, цIумур ялун диллай най бур оьрму.
Гьар мудангу, шин ялату ларгукун, мунил лажиндарай дурмур, хьумур дакIнийн дичлай, хIасиллу дуллан бикIару. ЦIусса шинацIун бахIлан бикIару цIу-цIусса хьул-умудру.
Ттуятува тIурча, оьрмулуву хьусса иширттай бацIлан, миннуя буслан къаччива. Учинна так ларгсса шин ттунна оьккисса дакъая. Ххарира даврий хьусса хьхьичIуннайшивурттая. Яла хъунмур тIайлабацIулун ккалли бувара ттулва гъан-маччами сагъ-саламатну бушиву.
ЦIусса шинал гьарца инсаннал дакIниймур бартлаганнав, ва шин тIайлабацIурдащал, ххаришивур­ттащал дуркIун лякъиннав. Гьарица кулпатран чIа тIий бура нахIу-хIалимшиву, талихI-тирхханну.

ХIабибат Буттаева, ЦIусса­лакрал райондалул Новостройрайсса культуралул отделданул хъунмур, ДР-лул лайкь хьусса артистка:
Инсаннал оьрмулуву ххаримургу, пашманмургу архIал най бур. Ларгсса шин жул кулпатран къумасса иширая дайдирхьуна. Оьрмулул къаувччуну дунияллия лавгунни жул куяв, хъинсса дакI-аьмалданул заллу, чIявучин бусравсса, ДР-лул культуралул лайкь хьусса зузала ХIабибуллагь Къаллаев. ХIабибуллагь жущала акъа­сса кьурчIисса асарду цукунчIав дакIнива буклай бакъар. Оьрму най бур, ци чулийгу зун-занан багьлай бур.
Жунма кIулсса куццуй цIусса миналий цIусса оьрму дузал буллан бигьану бакъар. Ми иширттацIун бавхIусса жулва инсантурал дакIру тирх учин дан, жущава шаймур буллай хIарачатрай бивкIру.
Ларгсса шин Культуралул шин духьувкун, ва аралуву зузиминнан цинявннан, мукунма жунгу, цахъи ххишалану хIарачат буллан аьркинну бия. Республикалул хъунамагу культуралул бияла кIулсса, муних ххишаласса къулагъас дуллалисса инсан ур.
ЦIуссалакрал цIусса миналий культуралул кюру бивзун 2 шин бартларгунни. Мунин хасну МахIачкъалалив, Яруссаннал театрдануву жу ккаккан дарду жулла даврил хIасиллу дуллалисса отчетный концерт. ЩапI куну бувцIусса зал ккавккукун, дакI ххари хьунни. ЩябикIансса кIанттурду биялсса бакъа, концерт бавцIуну ххал дуллан багьнугу, цуя ца инсан залданува къалавгунни. КьунуцIун бивсса чIумал зал баххана бан багьну, инсантуран мукунсса сант дакъашивуртту хьунни. Мунихлу, жува ххирасса тамашачитурахь багъишла битияра тIий буру.
Жува ххираминнал хIурматран жу вара концерт укра ккаккан дарду ЦIуссалаккуй.
Шинал лажиндарай мадара цаймигу давуртту дан бювхъунни. Зузалтралгу, ттулвагу хIарачатрайну, чIюлу барду жува щябивкIсса къат­ри. Райондалул администрациялул арцу итадаркьуну, 11 зузалан дуруххарду авурсса магьрал персонажирттал костюмру. ЦIусса шинал байрандалул шадлугърай утти концерт ккаккан даврицIун, 2 магьагу бишинтIиссар жул зузалтрал. Вайннулгу байран хъиннура чIюлу данссар, тяхъа данссар тIий бура.
ХIакьинусса заманнай, цуксса жунма къаччайнугу, пашманмур щилчIав чIарах буклай бакъарча, му лялиян бансса ххаришивуртту ялун дияннав учин ччай бура. Жулва ЦIуссалакрал агьулданул оьрмулуву байранну, шадлугъру чIярусса хьуннав, ЦIусса миналий буруккин бакъасса, бигьа-рахIатсса оьрму дузал хьуннав тIий чIа тIий бура.

Аьбидат Аьбдуллаева, ЦIуссалакрал райондалул Кулпатирттан ва оьрчIан социал кумаг баврил центрданул хъунмур:
2014 шинал республикалий хьу­сса оптимизациялуцIун дархIусса дахханашивуртту жул Центрданунгу асар хьунни. Кьувкьунни Центрданул бюджет, чан бунни зузи кIанттурду. Амма ми иширттал жул даврихсса гъира лещан къабунни. Ялунгума ххишаласса гьавасращал зий, цалла даву лавайсса даражалий дуллай бия Центрданул зузалт. ЦIусса миналийсса агьлу шиная шинайн гьарза хъанай бур. ЧIяву хъанай бур жул аякьалух мюхтажмигу. Шинал лажиндарай миннахсса аякьа чан къахьун хIарачат буллай бивкIру. Дуварду личIи-личIисса мероприятияртту, творчествалул конкурсру. Жу дуллалимунил хIасиллугу оьккисса къархьунни. ДР-лул ЗахIматрал ва социал иширттал министерствалул баян бувсса «Детства яркая планета» тIисса республикалул конкурсраву гьуртту хьуну, Социал центрдал аякьалулун лавсъсса оьрчIаву жул оьрчIан 1-сса кIану буллунни «Полет в детство» тIисса поделкалух, 2-сса кIану бувгьунни «Дюймовочка» тIисса поделкалул. Ми давурттив дурсса оьрчIан Центр­данул чулуха ххуйсса бахшишру дарду.
Культуралул шинну баян бувсса 2014 шин оьрчIавун творчествалул гьавас багьсса шин дия учин бучIия. Ларгсса шинал чIяву хьунни Центр­данул спонсортал. Мунийнугу чIалай бур жулва халкьуннаву ка тIиртIусса, дакI хъинсса, чумартсса инсантал чансса бакъашиву. Муниягу дакI ххари хъанай дур.
Ялагу, ларгсса шинал жул Центр­данул пишакартуран гьаз бунни харжру.
Кулпатравусса иширттая тIурча, арс Муртазяли ва душ ПатIима студентътал хьунни. Минная ххуйсса хIакинтал хьунссар тIисса умуд бур.
ЦIусса шингу барча тIий, барчаллагь учин ччай бура мудангу ттула чIарав бацIлацIисса, нара дуллалимунин кабакьу буллалисса уссурссуннахь, гъан-маччанахь, дус­турахь ва коллегахъахь.
ЦIусса шинал жулла хIукуматран, жулва агьалинан экономикалул кризис асар къахьуннав тIий бура.
Аьрасатнал президент В. Путиннул лавсъсса ххуллу – шяраваллил хозяйство, промышленность, элму хьхьичIуннай даву, жулва агьалинал оьрмулул даража гьаз баву мурадрайсса бур. Гьарицагу хъиндайдихьулул ахир хайрданийн дукканнав.
ЦIусса шинаву гьарца инсаннан чIа тIий бура цIуллушиву, талихI-тирхханну. Гьарица ужагъраву барачат чан къахьуннав. Дуниял паракьатну личIаннав.

Нураттин КIулуша­цIинс­­кий (Юсупов), «Лакку билаят» центр сакин бувма.
Ларгсса шинал яла нава рязисса иш хьунни «Лакку билаят» тIисса культурно-прос­ветительский центрданул гьану бизаву.
Ва центрданул агьаммур мурадгу хъанахъиссар лакку маз, миллатрал аьдатру ва культура дуруччаву. Укунсса центр жунма чара бакъа аьркинну бия, жува, ахиргу, бакIрай бавцIуну, жулва маз ябансса чаран ляхълан бивкIру. Центрданул сипталий, Лакрал театрдануву дихьлай буссар лакку мазрал дарсру. Ми дарсругу дихьлай буссар лакку маз пасихIну кIулсса Лакрал театрданул артистал.
Дахьра шин ва цаппара барзру хьунни центр тIивтIуну. Цалчинсса шаттирду бигьасса бакъая. ХIалли-хIаллих ва центрданул даву цилла нирхиравун дагьанссар, ва даврил агьамшиву, аьркиншиву бувчIлай, жула чIарав бацIланми ялу-ялун чIяву хъананссар тIий ура.
ЦIусса шин барча тIий, цинявппагу лакран чIа тIий ура цIуллушиву, талихI-тирхханну. Гьарица лаккучунан бувчIлай ччива цивппа ххаллилсса тарихгу, культура ва аьдатругу дусса уздансса миллатрал арсру-душру бушиву.
Ччива гьарица лаккучу цал унугу цала-цала шяравун ивну. Ччива ва жура хIасул дурсса «Лакку билаят» тIисса центрданул давриву оьрмулул хъуниминналгу гьурттушинна дуллай, миннал цалва опыт жагьилминнащал кIибачIлай, ми мюнпатсса, тIайласса ххуллийх бачин буллалисса насихIатру буллай. Так хъуниминналгу, жагьилминналгу цIакьсса дахIаврийну, хIала-гьурттушиврийнур жущава жулва мазгу, культура ва аьдатругу ядан хьунтIисса.

Андриана Аьбдуллаева