Уттигъанну, 2014 шинал ахирданий, Дусшиврул къатлуву хьусса шадлугърал батIаврий Дагъусттан Республикалул БакIчи Рамазан АьбдуллатIиповлул Дагъусттаннал оьрмулуву, политикалул, социал-экономикалул, культуралул, спортрал ва цаймигу арардаву хьун дурсса ккаккиярттахлу цIарду дуллуминнавух «Орден за заслуги перед Республикой Дагестан» тIисса паччахIлугърал награда дуллунни жула лакрал миллатрал дяниву акъа, цайми миллатирттал дянивугу сий дусса, хIурмат хъунмасса, Аьрасатнал ва Дагъусттаннал лайкь хьусса строитель, ДР-лул Жяматийсса палаталул председательнал хъиривчу Аьбдуллаев Ссапарбаг Аьлиевичлун.
Хъиривва, мива цIусса шинал хьхьичIсса гьантрай, Дагъусттаннал строительствалул оьрмулуву хъунмасса бутIа бивхьусса Ссапарбаг Аьлиевичлун дуллуссар «Почетный строитель России» тIисса орден ва лайкь хьуссар Дагъусттаннал Жяматийсса палаталул чулухасса ХIурматрал грамоталунгу.
Ца жулва «Илчи» кказитрал редакциялул чулухатугу, цинявппагу буккултрал чулухатугу, щалва лакрал миллатрал цIаниягу барча уллай, Ссапарбаг Аьлиевичлун чIа тIий буру цIуллушиву, ялуннайгу хъин-хъинсса давурттив дуллансса каши-кьудрат ва тIайлабацIу.
