Гьар мудангу Новостройрайсса школардай дуллалисса мероприятиярттайн лавгукун, хIайп тIун бикIару жулва оьрчIру вай школардай дуклай бакъашиврий. Тарбиялул, оьрчIан ххишаласса кIулшивуртту дулаврил даву шийхсса гьарицагу школалий лавайсса даражалий дирхьуну дур. Бакъар цавагу школа оьрчIру итххяххан баву, миннал гьунарду ялун личин баву мурадрайсса личIи-личIисса кружокру ва секциярду къазузисса.
Мунияту вай школардай дуклакисса оьрчIал гьарца шинал хьхьичIунсса кIанттурду бугьай райондалий ва республикалий хьусса личIи-личIисса конкурсирдаву.

ЦIусса шинал байрандалул гьантрай жу хьуру ДучIиннал школалий (№2).
«Просвещенный Дагестан» тIисса приоритет проектрал лаг­рулуву, «Англоязычный Дагес­тан» тIисса программалун хасну, шикку ларгунни «Бавцусса елкалиясса ЦIусса шинал магьа» тIисса шадлугърал мероприятие. Байрандалун хасну чIюлу бувсса школалул залданувун бавтIун бия Новостройрал цинявппагу школардаясса ингилис мазрал учительтал, цанма-цанма лавхьхьуну чIюлуну лархсса, магьрал персонажру хьусса дуклаки оьрчIру. Шадлугърал мероприятиялий гьурттушинна дан бувкIун бия ЦIуссалакрал райондалул КIулшивуртту дулаврил управлениялул инспектор ХIасанова Светлана Рамазановна. Ва мероприятие хIадур дурну дия ДучIиннал школалий (№2) ингилис мазрал дарсру дихьлахьисса Валиева Зарина ХIажиаминовнал ва байбихьулул классирттал учительница Аьзиева Аьйшат ЯхIияевнал.
Мероприятиялул мурад бия оьрчIан ингилис мазрал гъира бутаву, му итххяххан баву, чил билаятрал культуралущал кIул баву, миннан ххишаласса кIулшивуртту дулаву. Мероприятиялий гьуртту хъанахъисса 3-мур классрая 11-мур классрайн бияннинсса цинявппагу дуклаки оьрчIру гъалгъа тIий бия так ингилис мазрай.
Шадлугъ тIитIлатIисса ихтилат бувна Зарина ХIажи­аминов­нал.
ОьрчIал ккаккан бантIисса инсценировкалул хIакъираву бувчIинбавуртту дуллай, ванил бувсунни Англиянаву аьдат диркIшиву елка ххурттамалул бацайсса.
Мукун бавцусса елкалух луг­лай бур магьрал персонажру. Миннан кумагран букIлай бур ковбойтал. Ххассал бувсса елка буккан буллай бур сахIналийн. Ххарисса оьрчIру елкалул лагма лавгун балай тIий, къавтIий бур. Яла вайннал оьвчай цалла шадлугърайн Санта-Клауслуйн. Укун ххарисса хьунни ва магьлул ахир. Шикку оьрчIал буллалисса ихтилатру, тIутIисса балайрду бур ингилис мазрай.
Хъирив оьрчIал ккаккан бунни цаймигу магьравасса парчри.
— Дуклаки оьрчIаву хъунма­сса гъира бур ингилис мазрах. Бур гьунар бусса, му чулухунмай итххявхсса оьрчIругу. Ми канища къабуккан, миннал гьунар ялун личин бан, чIарах бацIан аьркинни. Жу, учительтал, жущава шаймур буллай буру. Амма жугу гьарица аьркинсса техникалул дузалну бакъару. Лингофонный кабинет бивкIссания, жун хъуннасса бигьашиву хьунссия, — тIий бур Зарина ХIажиаминовна.
Шадлугърал мероприятие къуртал хьуну махъ ингилис мазрал учительтал цачIун бавтIун, цалла-цалла дарсирдая ва кьяйдардая буслай, оьрчIан ингилис маз ххуйну лахьхьин бан чаран лякъинсса маслихIатру щашлай бия.