Январьданул 22-нний МахIачкъалалив хьунни Дагъусттаннал Халкьуннал Мажлисрал 45-мур сессия. Сессиялий гьуртту хьунни АьФ-лул ПаччахIлугърал Думалул депутатътал, исполнительный властьрал органнал, судирттал ва ихтиярду дуруччай органнал, политикийсса партиярттал, жяматийсса организациярдал, республикалул СМИ-рдал вакилтал.
ХI. Аьдилов
Сессия тIивтIунни Халкьуннал Мажлисрал Председатель Хизри Шихсаидовлул. Ганал бувсунни сессиялийн лавсун бушиву ца масъала – Дагъусттан Республикалул БакIчинал Халкьуннал Мажлисрайнсса Рисала (отчет).
«Ва республикалул оьрмулуву хъанахъи­сса хъинну агьамсса ишри. Рисала – республика хьхьичIуннай хъит учин даврил задачартту ккаккан буллалисса хъунмур программалул документри», — увкунни Х. Шихсаидовлул, Рамазан АьбдуллатIиповлухьхьун махъ буллай.
ДР-лул БакIчинал дурккунни республикалул парламентрайнсса Рисала. Ихтилат лахъи лавгунни 3 ссятраяргу ххишаласса чIумуй. Рисалалий дия шинал мутталий дур­сса давурттал отчет. Ганий ккаккан бувну бур властьрал циняв органнал къулагъас дуллан аьркинсса ххуллу-хха.
Дагъусттаннал БакIчинал бувсса ихтилатраву цаппара яла агьамми тезисру бур инсаннал ва бизнесрал мюхчаншиву щаллу даву. Жун жунма асар хъанай бур цаппара шиннардил хьхьичI бивкIсса кунмасса вас-ццах бакъашиву оьрмулуву, 2014 шин ларгунни террорчитурал ишру бакъа. Му хъуннасса агьамшиву дусса ишри, цанчирча инсаннан аьркинссар ганал цалла мюхчаншиву ва ганал бизнесрал ва хъуслил мюхчаншиву. Микку хъунмасса кIану личIи бувну бур паччахIлугърал властьрал органнан.
Къулбас дунни «О первоочередных мерах по опережающему развитию Республики Дагестан» тIисса АьФ-лул ХIукуматрал ХIукмулий, мунил хIакъиравугу бувсунни Рамазан АьбдуллатIиповлул. Му документ­рай ккаккан бувну бур давурттаву къулагъас дуллансса ххуллу-хха. Му хIукмулувусса положенияртту биттур баврил жаваблувшиву ласласиссар Республикалул ХIукуматралгу, федерал министртурал кабинетралгу.

(Хъиривмур номерданийгу буссар)