Дагъусттаннай хьунабавкьунни СКФО-рал субъектирдал бакIчитал

der_12Январьданул 12-нний ДР-лий хьунабавкьунни БакIссавнил Ккавкказуллал Федерал округравун бухлахисса субъектирдал каялувчитал. Хьунабакьаврий гьуртту хьунни АьФ-лул Президентнал СКФО-райсса вакил Сергей Меликов.
БавтIминнахь аьла-ссалам буллай, ДР-лул БакIчи Рамазан АьбдуллатIиповлул бувсунни, укунсса хьунабакьавурттай субъектирдал бакIчитал хъиннува кIул хъанахъиссар цаннащал ца, мунияр ххишалагу ххалбигьин хъанай бур яла агьамми масъалартту ва лякъин ми чулийн буккан бансса чаранни.
«Жулла хьунабакьаврий Сергей Аьлимович гьуртту шаврил барашин дуллалиссар жува шикку ххалбигьинтIисса масъалартту хIисавравун ласуншиврий властьрал федерал органнал ва полномочный вакилханардал. Мунияр ххишалагу, аьямну чIалай бур жула дянив хIала-гьурттушиву лавайсса даражалий дакъашиву, жучIара чанну дур цачIусса экономикалулгу, культуралулгу проектру, шикку хьунссар ххалбигьин чIявусса масъалартту. ДакI дарцIуну ура муния хъунмасса хайр хьуншиврий жунма гьарцаннангу, жулва регионнангу, жулва Аьрасатнангу», — увкунни Рамазан АьбдуллатIиповлул.
Ганая махъ ихтилат бувсса Сергей Меликовлул тасттикь бунни хьунабакьавурттая хайр хьунтIишиву СКФО-райсса масъалартту ххалбигьаврин: «Ккавкказуллан агьамшиву дуссар хIакьинусса ихтилатирттая, утти­гъанну хьусса ишругу хIисавравун лавсун, мюхчаншиву дуруччаврин хасну. Буниялагу, географиялул чулухасса архшиврухгу къабурувгун, чIявуми масъалартту БакIссавнил Ккавкказуллайн багьайсса бур, шикку ялапар хъанай бур чIявусса бусурман. Жува аьркин­ссар диндалул хIурмат бан, диндалущалсса ара бусрав дан, Аьрасатнал ччима инсаннал миллатралгу, имандалулгу асарду хIурматрай бикIан».
С. Меликовлул бувсунни аьркинну душиву дузал дан региондалий туристшиву гьарта-гьарза дансса шартIру, къабигьасса экономикалул тагьаргу хIисавравун ларсун, дазул кьатIаллил курортирттайн занан аьра­сатлувтуран хьхьичIва кунма бигьанугу бакъахьувкун.
Сергей Меликовлул увкусса куццуй, хIакьину СКФО-рал циняв регионнал биттур буллай бур Билаятрал Президентнал бивхьу­сса ца аьмсса задача – БакIссавнил Ккавкказ мюнпатну хьхьичIунмай хъин учин баврил задача.
Полпреднал бивщусса кьиматрайн бувну, Дагъусттаннай тамансса давуртту дуллай бур, амма захIматшивурттугу къачансса дур. Ми захIматшивуртту духлаган даншиврул, задачартту биттур баншиврул, жунма цачIун хьуну, зун аьркинссар.
Хьунабакьаврий мукунма ихтилатру бунни БакIссавнил Осетия-Алания Респуб­ликалул БакIчи Теймураз Мамсуровлул, Ставрополлал крайрал Губернатор Владимир Владимировлул, Кабардин-Балкарнал БакIчи Юрий Коковлул, Ингушетиянал Республикалул БакIчи Юнус-Бек Евкуровлул, ДР-лул Халкьуннал Мажлисрал Председатель Хизри Шихсаидовлул.