Мартрал 13-нний ПаччахIлугърал Думалул цалчин дуккаврийну кьамул дурссар бувччу хьуну машина бачин баврихлу аькIри гьарза даврил хIакъиравусса закондалул проект. Утти бувччу хьуну кIилчингу машина бачин буллалаврийну 200 азарда къурушрал аьчIа дишайссар. Муния бувсун бур «Новости» РИА-лий. 

Га документрайн бувну, бувччу хьуну рульданух лякъирча, ккаккан буллай бур 30 азарда къурушрал аьчIа дишаву ва водительнал удостоверениялуцIа баву 2 шинайсса. Мукссара аьчIа дишин (ялунгу 10 азарда къуруш ххи дурну) ккаккан бувну бур увччу хьусса инсаннахьхьун цалва машина буллуманайгу. Агарда мира закон лияндавуртту дуллалисса машиналул заллу ириярча, аьчIа хьунтIиссар 50 азарда къуруш.
Агарда рульданух ириярча правардацIа увма, ягу права дакъама, ганай дишинтIиссар 30 азарда къурушрал аьчIа ягу 15 гьантлийсса административ аьчIа. Мукуннасса закон лияндаву тикрал хьурча, ганай дишинтIиссар 200 азарда къурушрал аьчIа (ягу ганал шинал доходрал дуциндалийсса аьчIа), ягу 480 ссятрайсса давуртту дуллан, ягу 2 шинай давуртту дуллали баву, ягу 6 зуруйсса дуснакь аву.