Жунма кIулли заманалул иш цукун багьарчагу, ци чIунну дучIарчагу дуккаврил сий тачIав яларай къахьунтIишиву. ЧIявусса нитти-буттахъул бур мунияту оьрчIан цIакьсса ва куртIсса кIулшивуртту дулун хIарачатрайсса. Чансса бакъар нитти-буттал хIарачат дузрайн буккан буллалисса оьрчIругу.
П. Рамазанова
ЧIяйннал шяравасса АьбдурахIманнул душ МахIаммадова Саида школалий дуклай бунува дарсирдал итххявхсса, кIулшивурттал хъирив багьсса душ бия. Школагу марцIну ххювардай къуртал бувну,
Саида дуклан бувххуна Дагъусттаннал паччахIлугърал университетравун, юристътал хIадур байсса факультетрайн. Миккугу Саида хьхьичIунми студентътуравух бур. МарцIну ххювардай дугу-дуклай, университетрал оьрмулул иширттавух чялишну гьуртту хъанай бур.
ЦIанакул Саида дуклай бур 4-мур курсирай. Октябрь зуруй университетрал ректор М. Рабадановлул ва факультетрал декан Ш. МахIаммадовлул чулухасса ХIурматрал грамота дуллунни Саидан, марцIну ххювардай дугу-дуклай, хьхьичIунми студентътуращал архIал элмийсса давурттавугу, факультетрал иширттавухгу хьхьичIунну гьуртту хъанай тIий.
Саидал дуккаврия цIа дуллалисса Барчаллагьрал чагъар бувкIунни университетрал ректоратрая Саидал нитти-буттачIангу.
«ХIурмат лавайсса АьбдурахIман ХIамидович ва ПатIимат Илиясовнай! ДГУ-рал ректорат ва юридический факультетрал деканат зущал ххаришиву кIидачIлай буру, зул душ Саида дуккавривугу хьхьичIунсса, студентътурал элмийсса хъиривлаявурттавугу чялишну гьуртту хъанахъисса, хIарачат бусса, цилва пиша куртIну лахьхьин ччисса душ бушиврийн бувну. Жул умуд бур Саидая ххаллилсса юрист хьунссар тIисса. Преподавательтурал ва архIал дуклакиминнал дянив му сийлий бур, юриспруденция куртIну лахьлахьиминнавух бур. ДакIнийхтуну барчаллагьрай буру зуйн Саида укун ххуйну тарбия баврихлу», — укун чивчуну бур му Барчаллагьрал чагъарданий.
ДакIнийхтуну барча буллай буру жугу Саидагу, мунил нину ва ппугу. ЧIяру-чIярусса бахшишру, грамотарду ласланнав, Саидай, ина уттиния тинмайгу. ТIайлабацIу баннав гьар дуллалимуниву!
