Профсоюзирттал бияла цIакь хьун аьркинссар

asru_7Совет заманнай профсоюзирттал кутакгу, цIакьгу, личIия, гьай-гьай. Цамур цичIав бакъахьурчагума, зузалаща, санаториялийн, курортрайн игьалаган, хъин хьун гьан шайсса замана бия. ЗахIмат буллалиманан путевка укра дия. Гьаннайсса, профсоюзру зузалал чIарахбацIулт дия, миннул сийгу дия, кьиматгу бия. Ттизаманнайгу дур цалва зузалтрал мурадру буруччин хIарачатрайсса профсоюзру.

ПатIимат Рамазанова
Дагъусттаннал балугъирттал хозяйствалул зузалтрал профсоюзрал председательну зий ур ЧIурттащиял шяравасса Мирзал арс МахIаммадов Магьди. Му увчIуну ур февраль зурул 7-нний Сочилий хьунтIисса, щилчIав биялдарай дакъасса Аьрасатнал профсоюзирттал федерациялул 9-мур съездрал делегатну (Федерация Независимых профсоюзов России — ФНПР). Уттива му съездрайн хIадур хъанай, федерациялул программардал проект ххалдигьлай ур. ВаначIан 13 резолюция дуркIун дур, дурккуну цалвамур пикри бусаншиврул.
«Жул агьаммур мурад – хьхьи­чIа­ра Дагъусттаннай тIутIайх дирчуну диркIсса чавахъирттал хозяйство ччаннай дацIан давур. Реформарду хъанан хьхьичI Дагъусттаннай балугъирттал отрасль – щаллу-ккурккисса, хъуннасса комплексъя, балугъирттал консерварду, жамирдал ремонт, цимурца хIала-гьурттусса.
Кьуния ххюазара инсан зий икIайссия му отраслилуву, шинай 60 азарда тонна чавахъирттал паччахIлугъран дулайссия, — тIий ур Магьди Мирзаевич, — укунсса ккаккияртту диркIсса хозяйство пуч-палачат дунни, балугъирттая дучIаймур ацIлийну чан хьунни. Аьрасатнал обществалун, ва аьрасатнал профсоюзир­ттан хьхьичIунсса, цашиврул, цачIу бакьаврил, цачIу нахIуну зузаврил принципру бирибат дуллай бур бизнесрал. Ххуймур чара бакъа ласаван аьркинссар лавгзаманалува. Профсоюзрал мурад – биялсса зузи кIантту дузал шавур. Экономика лябукку буну ва сантирай хьхьичIуннай хъит тIуншиврул зузи кIанттугу биялну, зузиминнангу лайкьсса хIакь бикIан аьркинссар, мури жул тIалавшиннагу».
Магьди Мирзаевичлул Аьрасатнал балугъирттал хозяйствалул зузалтрал федерациялийн тIайла бувккун бур чагъар, Аьрасатнал Независимыйсса профсоюзир­ттал Федерациялул программалий укунсса суаллугу бишин: Аьрасатнал Президент В. Путиннухь Аьрасатнал Федерациялул балугъирттал хозяйствалул Министерство хIасул дуваву тавакъю буваву ва 2015 шинал Къиримнал ва Севастопольлал курортру, агьали хъин байсса, бигьалагайсса учрежденияртту Аьрасатнал профсоюзирттахьхьун дулаву.
«ХьхьичIава социал страхованиялул фондру профсоюзирттал биялдарай бикIайссия, агьалинан бигьалаган курортирдайн путевкагу дикIайссия, утти ми так мушакъатминнан дуллай бур путевкарду. Зузалтрал къайгъурдалссагу буллан аьркинссар ми фондру, амма буллай бакъар, мунияту жугу тIалав буллалиссару ми фондру профсоюзирттахьхьун зана буваву, — тIий ур Магьди Мирзаевич. – Профсоюзирдал финансирдал база цIакь буваву – цIакь бусса, кутак дусса проф­союзру хIасул дувавринсса шартIри. ЦIакь бусса профсоюзирттал иширайну профсоюзрал члентурал экономикалул ва социал ихтиярду дуруччин бюхъантIиссагу, цал профсоюзирттал цалла дикIан аьркинссар финансирдал ресурсру – луртанну. ХIакьину зузалт цавагу чулуха бурувччуну бакъар, минналсса байсса, миннал масъаларттах бакI дугьайсса акъар. Чара бакъа профсоюзирттал кутакгу, биялагу цIубуккан бан багьлай бур».
Магьди Мирзаевич буслай ур, агар ччясса мутталий балугъир­ттал хозяйствалул министерство хIасул къадарча, иш оьчулий багьан бюхъайшиву. Цимурца бизнесрал ххяппурттахьхьун итадакьаврил агьалинан хайр-мюнпат бакъашиву. Мигу, миннухава лавхьхьусса цайми-цайми масъалартту гьаз бан тIий бур Сочилий хьунтIисса Аьрасатнал профсоюзирттал съездрай.
Лак личIинува чIявусса зий бикIайссия балугъирттал отраслилуву, «Дагрыбпромрай» чIявусса лак буссия, балугъирттал консерварду дай заводрай, гьар кIанай лак лажин кIялану захIмат буллай, зий буссия тIий ур. ХIалу дагьну дунура, ЦIусса шинащал барча буван ччай ур чув, ци даврий зурчагу, бюхъу-хIарачатрай, яхI-къириятрай зун бикIайсса лак. Барча буллай ур мукуна балугъирттал хозяйствалул ветеранталгу.
«Зузиманал кьимат лахъну гьаз хьусса чIунну дучIаннав, ЦIусса шин ххуйчулиннайсса дахханашивурттал хъиндайдихьулул шин хьуннав. Дагъус­ттаннай оьрму гьарца чулуха ххуй хъананнав, лакралмур кьинигу дюхъаннав!» — тIий ур бусравсса Магьди Мирзаевич. ДацIанхьуви зунтталчунал дакIнийхтунусса дуаь!