Нюжмар дакIний лирчIунни…

Укунсса суал ва мунинсса жаваб дулару жу лях-карах жулва кказитрай

Лайла ХIамзатова, учительница:
— Ларгсса нюжмар дакIний лирчIунни ттун шофертурал шагьрулувухсса маршруткардал багьри гьаз къабувну даврийн къабукканну тIий дуллалисса митингирттайну. Миннал тIимургу бувчIлай бур, бензиндалул багьа лахъ шаврицIун, газрал багьагу лахъ хьунни. Ялагу ми бур маршруткардай — глонасс- спутникрал цIушиннарду дишин багьлай бур, хIасил арцу харж дан багьлай бур тIий. Му митинграй гьаз бунни миннал цалва циняв масъалартту. Миннал чулухасса тIалавшиннарду биттур дуллай, шагьрулул администрациялул хъунама МахIаммад Сулайманов рязий хьунни декабрь зурул 1-нния тинмай маршруткардайсса багьа 17 къурушрайн бутан, хьхьувай ссят 8-нния тихунмайсса багьагу 20 къурушрайн бутан. КутIану учин, бигьанма гьаз бунни маршруткардай багьа. Хьхьувай ссят 8-нния тихунмай 20 къуруш тIисса мугу ци хаварди. Ссят 8-нния тихунмай миния укунмагу нажагьсса бакъа къабачайва. ХIасил му жува цIуру-кIуру къатIуншиврул, вардиш хьуннин хIадурнува лахъ бувсса багьагу чIаравва бушиву бусласисса иш хъанай бур.
Гьай-гьай, миннал даврийн къабукканну, жун хайр бакъар тIий митингру дуллай, цалва тIимур бацIан бунни ца бигьану. Ца миннаннив бензингу, газгу, цайми-цаймигу продукция ххира хьусса. Цири буван аьркинсса миннал бачIикссавагу харжру бакъасса учительтурал, оьрчIал багъирдал тарбиячитурал, студентътурал, дуклаки оьрчIал. Укун вай маршруткардай заназисса агьалигу хъунмурчIин ахIвал-хIал кIюласса халкь бур. Утти ца кулпат­рава ца нюжмардий 1000-хъайсса къурушру дахьва ца ххуллух лаглан най дур.
Аьркинну бур утти пассажиртурангу митингру дуллан. Респуб­ликалул хъуниминналгу цимилгу бувсунни ва тагьар къулай даву мурадрай автобусру машан ласлай бушиву. Чуври утти ми цавагу.
Так ца багьа гьаз баву бакъа шагьрулул хъуниминнан къачIалай дур ми маршруткардавусса чапалшиву, бияйнийн бивсса, тачIав къашюшайсса скамейкартту. Цуя ца акъассар миннул марцI-чапалшиврул низам ххал дурну, ялув ацIлацIисса. Нажагь гъараллу ягу марххалтту бувну, микI-чIикI дусса чIумалгу маршруткардал шофертал буссар цалва машинартту зия къахьуншиврул даврийн къабуклай, агьали инжит буллай. Аммаки ца бигьану багьрими лахъ буллайнма буссар.
Марат Мирзоев, Дагъус­ттаннал учительтурал даража лавай байсса институтрал элмийсса зузала:
— Вай гьантрай жул институтраву хьунни «Шаг в будущее» тIисса Щалвагу Аьрасатнал лагрулийсса элмийсса 20-мур конференция. Щаллусса шинал лажиндарай най диркIссар ва конкурсрал финалдануву гьуртту хьунсса, оьрчIру ва душру хIадур буллалисса, миннава яла гьунар буми язи бувчIлачIисса конкурсрал этапру. Гьашинумур конкурсрай бия республикалий­сса аьлимтурал каялувшиннаралу хIадур бувну 16 журасса элмийсса секция. Ва конкурсрай кьимат бищун дуркIун дия 275 даву. Шиккува кIицI лаган, «Шаг в будущее» тIисса элмийсса конференция хъанахъиссар «Одаренные дети» тIисса цIакусса программалувасса ца яла агьаммур направление. Шикку ххув хьуминналгу гьурттушинна дувантIиссар Бауманнул цIанийсса Москавуллал ПаччахIлугърал Технический университетраву хьунтIисса конкурсрал махъва-махъмур этапрай.
ХIадур бувссар И. Саидовал