Уттигъанну Каспийскаллал 9-мур школалий хьунни ххарисса батIаву — ва школалун КIулшиву дулаву ва педагогикалул элмурду хьхьичIуннай даврил Дунияллул академиялул, АьФ-лул КIулшиву дулаврил ва элмулул министерствалул Лахъмур награда — К. Д. Ушинскийл орден «За вклад в развитие образования и педагогических наук» дулаврин хас дурсса.
Му орден дулаврищал ва школа лавсун бур Щалвагу Аьрасатнал «Лучшие социально значимые образовательные учреждения 2014 г.» Реестрданувун. Каспийскаллал 9-мур школданул директор ХIажиев Сергей РахIимовичлун тIурча дуллуну дур А.С. Макаренкол медаль. Ва шадлугъгу хьунни вай хъинсса иширттайн бувну.
Бадрижамал Аьлиева
Школданул коллективращал, дуклаки оьрчIащал ххаришиву кIидачIин, му барча дуван ва кьини 9-мур школданийн бувкIун бия Каспийскаллал шагьрулул КIулшиву дулаврил управлениялул начальник НурмахIаммадов Сулайман Аьбдуразакьович, «Трудовой Каспийск» кказитрал хъунама редакторнал хъиривчу ЯхIияев Аьзиз Мусаевич ва цаймигу. Школданул актовый залдануву, шадлугърал тагьарданий, дуллунни вай наградартту Сулайман Аьбдуразакьовичлул ва школданун ва ванил директор Сергей РахIимовичлун ва барча бунни школданул коллектив укун лахъсса кьиматращал.
Сергей РахIимовичлул цалвамур ихтилатраву барчаллагь увкунни шагьрулул УО-рахьгу, цанна ва ларайсса награда дуллусса Дунияллул академиялухьгу, кIицI лавгунни ванияр тинмай цивппа хъиннува ххуйну, хъиннува гужну зунтIишиву кIулшиву дулаврил даража лавай, хьхьичIунмай бавриха, оьрчIру патриот зумуну тарбия бавриха.
Шиккува «Единая Россия» партиялул кьюкьравун 27 учитель кьамул увну, миннан партийный билетругу буллунни.
Ва иширайн бувну, Сулайман НурмахIаммадов тIий ур:
— Ва школа шагьрулуву яла цIумур, яла «жагьилмур» хъанахъиссар. Уттисса тIалавшиннардайн бувну, лащу-щаллу бувну буссар техникалул, дуккавриву аьркинсса кьай-кьуйлул. Школа тIивтIуну 7-сса шинни. Гьашину хьунтIиссар цалчинсса 11-мур классрал дикIайкунсса щаллусса выпуск. Шагьрулул, республикалул лагрулий буллалисса бяст-ччаллавух, олимпиадарттавух гьуртту хъанай, вай шиннардий школалул дуклаки оьрчIал чIявуссалийла бувгьуссар цалчинсса ва хьхьичIунсса кIанттурду. Хъинну ххуйсса, цалла даву ххирасса директор ва учительтурал коллектив бур шикку. Ва ялагу, школалул директор цува биолог ухьувкун, хъуннасса къулагъас дур экологиялух. лагма-ялттусса тIабиаьтрах. Ца сезондалул дянив вайннал школалул лагма-ялтту бувгьунни 5 азарунния ливчусса мурхьру ва къатIри. Школалул ялув хъинну дакI цIуцIисса директор ур Сергей РахIимович. Мунихлуну хъунмасса хIурматрай ур цалва даврил уртакьтурал дянивгу, цалла каялувшиву дуллалисса коллективравугу. Вай наградарттащалгу барча буллай, чIа тIий ура ва школалул коллективран гихунмайгу тIайлабацIуртту, хьхьичIуннайшивуртту, — тIий ур Сулайман Аьбдуразакьович.
Цува Сергей РахIимович цалва ихтилатраву кIицI лаглай ур вай наградартту цанна аванс хIисаврай дуллушиву ва ванияр тихунмай кIилийнусса гужирдащал зунтIишиву.
Шиккува ца-кIива махъ цурда наградалиягу. К.Д Ушинскийл орден хъанай дур Миллатрал яла лахъмур награда педагогикалул элмурдаву ккаккан дурсса хьхьичIуннайшивурттахлу дулайсса. Ва хъанай дур Аьрасатнал Федерациялул КIулшиву дулаврил ва элмулул яла лахъмур награда. Оьруснал хъунасса педагогнал, отечественный педагогикалул реформаторнал орден дуккан дурния шиннай дуллуну дур СССР-данул ва Аьрасатнал язими педагогтуран, учебникирттал автортуран. Награда цурдарив дурккун дур 1946 шинал РСФСР-данул Министртурал советрал хIукмулийн бувну, Константин Дмитриевич Ушинский ивкIуну 75 шин хъанахъисса даталуцIун дархIуну. Гьарца шинал просвещениялул 54 азара зузалан дуллай бур Аьрасатнал Федерациялул КIулшиву дулаврил ва элмулул министерствалул чулухасса наградартту. Миннавух анжагъ 30 инсан икIайссар Ушинскийл медальданун лайкь хьусса. Награда ряхцIаллийсса шиннардил дянив мунин лайкь хьуну бур 1900-ннийн биявайсса педагогтал.
Ва ххуллух му наградалун лайкь хьуми цинявппагу, миннавух Каспийскаллал 9-мур школданул директор Сергей РахIимовичгу, бавтIун бур Москавлив Президентнал отельдануву. Шадлугърал тагьарданий дуллуну дур миннан наградартту.
ТIивтIуну дахьра 7-сса шин дусса 9-мур школалул ва орден ласавугу му школалул коллективрал гьарца кьини буллалисса дакIнийхтунусса захIматрал лишанни. Школалия циява тIурчаннив, хIакьинусса кьини шикку дуклай бур азаруннийн къабивсса дуклаки оьрчIру, коллективраву ур 108 инсан, миннавух — 76 педагог. Ва школалий хъуннасса къулагъас дуллай бур оьрчIал цIуллу-сагъшиву дуруччаврих. Му мурадрай, ишла дуллай бур цIуллу-сагъшиву дуруччаврил технологияртту, «Здоровье» программа иширайну щаллу даврил лагрулуву. Ттун, масалдаран, ва школданий дакъа, цамур школданий къаккарккунни оьрчIал хIачIлансса щин марцI дуллансса промышленный фильтрду дирхьуну. ОьрчIру физкультуралухух, спортрахух машгьур баву мурадрайгу дуллай бур чIярусса давурттив. Ва школданий бур хъунисса 2 зал, спортрал 7 площадка (2 баскетболданул, 2 волейболданул, футболданулсса, минифутболданулмур майдан, лечайсса дорожка), бур настольный теннисрансса 3 стол. Школданий бур психологический разгрузкалул къаттагу. Бур аьркинсса хIакинтурал кабинетру, чаннасса хъунмасса буфет. Дуклаки оьрчIру щаллуну бур дуки-хIачIиялул.
Школалийсса чIявуми кабинетирттаву бивхьуну бур компьютерду, ноутбукру, планшетру ва проектрал оборудование: интерактивный доскарду, проектный доскарду ва проекторду ва м.ц..
Ва школа тIивтIуния махъ, яни 2008 шинал мартрал 12-нния шинай, мунил директорну ур жула лаккучу – Ккуллал райондалийсса Хъюйннал шяравасса ХIажиев Сергей РахIимлул арс. «Заслуженный работник муниципальной службы РД», «Отличник образования РД», «Почетный работник общего образования РФ» ва цаймигу цIардан, «100 лет профсоюзам России» медальданун, утти А. С. Макаренколмур орден медальданун, цаймигу цIардан ва бахшиширттан лайкь хьуну ур чув зурчагу цалла даву лажин кIялану, кIанийн дуртун дуллай аьдат хьусса Сергей РахIимович.
Вай ларайсса наградарттащал барча буллай ва школа ва хIурмат бусса Сергей РахIимович, чIа тIий буру вания тиннай дуллалисса гьарцагу давривугу тIайлабацIу, цIу-цIусса хьхьичIуннайшивуртту.
