Ларгсса нюжмар кьини МахIачкъалалив Оьруснал театрдануву хьунни Культуралул шинал хIасиллу дуллалисса шадлугъ.

Муний гьуртту хьунни Рес­публикалул БакIчи Рамазан АьбдуллатIипов, ДР-лул Халкьуннал Мажлисрал хъунама Хизри Шихсаидов, ДР-лул ХIукуматрал хъунама Аьбдуссамад ХIамидов, ДР-лул ХIукуматрал хъунаманал хъиривчу Анатолий Карибов, МахIачкъала шагьрулул чIумуйнусса мэр МахIаммад Сулайманов, ДР-лул культуралул министр Зарема Буттаева ва цаймигу министртал, депутатътал, магьирлугърал ишккаккулт.
Рамазан АьбдуллатIиповлул барча бунни магьирлугърал зузалт. КIицI лавгунни Магьирлугърал шин дуваву щалва билаятран агьамсса ишну хьушиву. ДакIнийн бувтунни Дагъусттаннал цIа машгьур дансса цIанихсса шаэртал, композитортал, художниктал, магьирлугърал усттартал жулла республикалия чIявусса бувкшиву. Экономика ва магьирлугъ канил ка дургьуну нанисса шяраваллуну ванал кIицI ларгунни художествалул производство хьхьичIун лирчусса Оьргърал ва Бархъаллал шяраваллу.
«Совет Союз ппив хьуну махъ жува экономикалухун машхул хьунну. ХьхьичIазаманнул философтурал тасттикь бувсса куццуй, оьрмулул гьарца арарду, миннувухра экономикагу, хьхьичIуннай шаврил бияла культуралухьри бусса. Магьирлугърахсса, рувхIанийшиврухсса баччибакъулшиву сававнур жулла республикалийгу, аьмну щалва билаятрайгу чIявусса буруккинтту салкьи хьу­сса. Культура гъагъаврийну, чапал шаврийнур жулла обществалувун фанатизм, аьвамшиву, щялмахъ багьсса. Жула хьхьичI бихьлахьи­сса мурадирттава яла агьаммурну ккаклакиссар инсаннал капитал цIубуккан баву», — увкунни Респуб­ликалул БакIчинал.
Культуралул шинал чIярусса давуртту дан бювхъуну бур магьирлугърал аралуву. Бувсунни Культуралул шинал хIасиллу дуллалисса батIаву хьунтIишиву декабрь зурул 24-нний билаятрал Президент Владимир Путиннул каялувшиннаралу. Муний ПаччахIлугърал советрал члентурал ххалбигьин тIий бусса бур паччахIлугърал магьирлугърал политикалул гьанурдан хас бувсса ихтилатру.
«Багьлай бур хьхьичIуннай дуллан аьдатсса культура. Му мурад­рай Дагъусттаннал районнай бух хьусса, кьабивтсса магьирлугърал къатраву сакин буллай буссар Аьрасатнал халкьуннал аьдатсса культуралул центрду. Шяраваллаву яла ябацIанми къатрину хьун аьркинссар магьирлугърал къатри. Мукунсса къатри жучIава цаппарасса районнай буссар.
Культуралул шинал Дагъус­ттаннай къуртал шавай дуссар дагъусттаннал культуралул политикалул программалуха зузаву. Жунма багьлай бур сантирайн рутан магьирлугърал идарарттал даву. Республикалул культуралул министрнаща чIярусса давуртту дан бювхъуссар ва шинал. Ххуйну зий бия мунил хъиривчутал, зузалт, районнал магьирлугърал идарарттал ва центрдал зузалт. В. Путин властьрачIан увкIния махъ арийлла ххи хьунни магьирлугърансса арцу итадакьаву. Дагъус­ттаннайгу чIярусса давуртту дуллалиссар магьирлугърал ирс ябаншиврул. Культура дакъахьурча, жува кьяркьараву бюкьантIиссару, духлагантIиссар оьрмулул мяъна-мурад. Культуралул инсан бюхттул уллалиссар, муная личность уллалиссар», — увкунни Республикалул БакIчинал.
Ванал ихтилатрая махъ Зарема Буттаевал наградартту дуллунни республикалул магьирлугъ хьхьичIуннай давриву захIмат бивхьусса зузалтран. Миннавух бия лакгу. Дагъусттаннал лайкь хьусса артистнал цIа дуллунни балайчи Рашид Багатаевлун; Дагъусттаннал магьирлугърал лайкь хьусса зузалал цIа дуллунни Республикалул халкьуннал творчествалул къатлул отделданул каялувчи Ирина АхIмадован.
Культуралул министрнал бувсунни Культуралул шинан хасну дурсса давурттая: «ЦIакь бувссар магьирлугърал идарарттал материал база, хъунисса проектру зузи бувссар театрал магьирлугъраву. Лавайсса даражалий хьуссар фестиваллу, конкурсру».
Республикалул Халкьуннал творчествалул къатлул директор Марита МухIадовал, музейрал директор СалихIат ХIамзатовал, Дагъусттаннал паччахIлугърал филармониялул каялувчи Ирина Нахтигальлул бувсунни Культуралул шинал ккаккан бан бювхъушиву цуксса хъунмасса буссарив жулла республикалул творчествалул потенциал.
Хъирив экрандалий буслай бия Культуралул шинал республикалий дурсса давурттая.
Хъуннасса къулагъас дурну дур миллатирттал театрдах. Культуралул шинал лагрулуву республикалул цаппарасса театрду лавгун бур Дагъусттаннал кьатIув гастроллай: Лакрал театр – Ухссавнил АьсатIиннал Владикавказ шагьрулийн; Оьруснал театр – Къазахъисттаннал Астана шагьрулийн; Яруссаннал театр – Грознайлив; Къумукьнал театр гьуртту хьуну бур Турциянаву хьусса дунияллул халкьуннал фестивальданий. Яла тIайлабацIусса хьуссар жуятура лаг­лагисса шин Ссихьрал театрданун. Финляндиянаву хьусса дунияллул халкьуннал ссихьрал театрдал фестивальданий ххув хьуссар 3 номинациялуву.
Культуралул шинал Дагъус­ттаннал магьирлугърал оьрмулуву дурсса давурттая, хьун дурсса хьхьичIуннайшивурттая бувсун махъ ккаккан дунни республикалул магьирлугърал усттартурал концерт. Муний гьуртту хьунни паччахIлугърал хор, «Лезгинка», «Молодость Дагестана», «Эхо Кавказа» ансамбльлу, балетрал театрданул солистал, фольклорданул къавтIаврил ансамбльлу «Вихьли душ», «Акуша», «Ботлих», Дагъус­ттаннал паччахIлугърал университетрал магьирлугърал факультетрал студентътал. Балайрду увкунни Дагъусттаннал халкьуннал артист МухIсин Камаловлул, ТIагьир Курачевлул, Рукьият ХIамзатовал.