Дагъусттаннал маданиятрал давурттаву цалчинми

lger_8Пагьму-гьунар инсаннаву увсса чIумалва бикIайсса бур. Яла махъ гай гьунарду цалва ганал хIарачатрайн, дарс дишайсса учительнайн бувну, зун ивкIун махъ ялувсса хъунаманал кумаграйну ялун личайшиву аьлтта чIалачIисса зат бур.
Ккуллал райондалий культуралуву зузисса инсантурал хъинну ххуйну чIалачIи буллай бур аслийсса лакрал культуралул мархха-ххун. Гьашину баян бувсса Культуралул шинал вайннал дурсса давурттив хIисавравун ларсун, Дагъусттаннайсса 41-рагу райондалул дянив цалчинмур кIану буллунни. Му кIану буллунни ДР-лул Культуралул министерствалул, «Яла язимур клубрал журалийсса муниципал идара» тIисса цIанищал.

ХIажимурал ХIусайнов
На муданмагу жулла Ккуллал райондалий культуралул зузалтрал дуллалисса давурттаяту кказитрай чичин хIарачат бувара. ХIакьину ттун дакIнийн дутан ччива Ккуллал райондалул культуралул зузалтрал январь зуруя шиннай дурсса давурттив. Шинал бакIраятура хIасул дурну дия дуллансса давурттал сияхI. ХьхьичIва-хьхьичI райондалий тIивтIуна «Центр традиционной культуры народов России». ХIакьинусса кьини райондалий зий бур бугьараминнал ва оьрчIал фольклорданул 14 коллектив. Культуралул зузалтрал дянив чIун-чIумуй буллай бур «Культработник» семинарду. Райондалийсса Жагьилтурал политикалул комитетращал ва КIулшиву дулаврил управлениялущал бунни «Ттул Дагъусттан» цIанилусса балайрдал конкурсру. Шикку ххув хьуми лавгссар Лаващав ккаккан буван цалва гьунарду. Досуговый центрданий бунни Ватандалун хас бувсса балайрдал, хореографиялул, театрдал, сурат дишаврил конкурсру дуклаки оьрчIал дянив. Мартрал 21-нний Интнилхьхьунил байран дунни. Вара кьини хъинну ххуйсса концерт ккаккан дунни Культуралул шин тIитIаврин хас дурсса. Гьарца байрандалийгу тIитIайссар 14-рагу шяраваллил къатта-къушру.
Ваччавсса майданнив дунни «Наследие» цIанилусса фестиваль. Шикку райондалул шяраваллал коллективру бакъагу, гьуртту хьунни Лаващиял, Ахъушиял, Лакрал, Хасавюртуллал, Агъуллал районнал коллективру. Райондалул шяраваллал цачIун бувсса коллектив гьуртту хьуссар МахIачкъалалив Аьрасатнал халкьуннал конгрессравух. Хасну «Поэзия национального костюма» фестивальданувух, аслисса халкьуннал аьдатру ккаккан дуллалисса фольклорданул «Горцы» фестивальданувух, Дарбантлив хьусса, культуралул ва тарихрал фестивальданувух. Хъуннасса концерт ккаккан дурссар Дагъусттаннал конституциялул кьинилун хасну. Ккуллал райондалул коллектив гьуртту хьуссар ТIиляратIиял райондалий Хидиб шяраву хьусса «Цамаури» фестивальданий. Цавагу аьрххилия бахшиш, диплом къалавсун къаливчIссар.
Дуккаврил шин дайдишаврин хас дурсса КIулшиврул кьини хьунадаркьуссар Ваччавсса Досуговый центрдануву.
Дагъусттаннайн ххявхсса террористал бат бувну 15 шин бартлагаврин ва Дагъусттаннал халкьуннал цашиврун хас дурсса кьинирду концертирттайну хьунадаркьуссар, 1-мур ЦIувкIуллал ва Чакъаллал шяраваллал дянивсса майданнив «Пагьламан» цIанилусса фестиваль дурссар. Ва фестивальданиясса киносурат ласун му кьини бувкIун бия Франциянавасса ва Германиянавасса режиссертал, оператортал. Жулла культуралул Европанавун ша лавсъссар. Ва жулла хъуннасса хьхьичIуннайшивур.
Ккуллал райондалул культуралул зузалт мукунма гьуртту хьуссар «ТIивтIусса Дагъусттан» цIанилу МахIачкъалалив хьусса туризмалул форумравух, Избербашрай хьусса «Дагъусттаннал балайрду» фестивальданувух, Ахттиял райондалий гьуртту хьуссар «Дагъусттаннал бух заманнул балайрду» фестивальданувух, Дахадаевуллал райондалий Уркарах шяраву хьусса Дагъусттаннал зюннавчитурал 2-сса фестивальданувух.
Октябрьданул 16-нний Ккуллал райондалийн МахIач­къалалия бувкIун бия шаэртал, чичулт, композитортал, къавтIалт, макьанну руцулт, яни «Культурный десант». Хъамаллуращал Ваччав ккаккан дурссар концерт. Хъамалгу, мунивух гьуртту хьумигу хъинну рязину бия.
Найнна дур Ккуллал райондалий Культуралул шинан хас дурсса давурттив. Вания гихунмайгу тIайлабацIу хьуннав гьарца дуллалимуниву.