Ххуйну дакIний бур: ЦIуссалаккуйн боевиктал ххявхсса ппурттуву ополчентурал кьюкьлуй каялувшиву дуллалисса Артур Исрапиловлухь цIухлай бура, «дяъвилул нетIа ккарксса та ппурттуву ци дия яла бала-мусиватмур» тIийча, Артур Анваровичлул учай, «агьалинавусса ццахханну, аваза» куну. Яъни «паника» куну ца мукъуйну жаваб дулай.
Дяъви сававсса ццахханну дурчIлай дур. Инсантал гьанавиххи хьуну бухьунссия кIулбакъа бала ялун бивну. Нигьал дазуй яла авазагу гьаз шайхха чара бакъа.
Ва махъсса ппурттуву Аьрасатнаву гьаз хьусса авазалиярив, най бунува учинна, цичIав къабувчIунни. Ихтилат доллар ва евро ххира шаврицIун, къурушрал кьимат багьаврицIун бавхIусса авазалия ва аьлагъужалия бушиву зунмагу бувчIухьунссар. Агьаммур темагу му дур цIана. Халкьуннал зумувгу ихтилат так муния бур. Хъуни политиктурал цIуцIи кIанугу му бур.
Гьаннайсса, дяъви ялун къабивнува (Аллагьнал арх бунну му балаллия!) дяъви ялун бивний куннасса ццахханнугу, нигьгу дия агьалинаву. Дурар му нигь миннавату уттигу дуккан. Ужагърай 100 долларвагу бакъамагу так доллардая ур гъалгъа тIий, миллионну луртандалул бумагу – доллардая ур гъалгъа тIий. Щавщимур, гьай-гьай, база-мискиннайнгу бивунни, давлатлувнайнгу. База мискиннайн хъиннува. База-мискиннайн гьарца чулуха: Харжру гайва, пенсиярду гайва, дуки-хIачIиями кIилийну ххира хьунни. ХIатта шамлийнугума. Ттул дурагу дакъассар экономикалул кIулшивуртту. Амма экономикалул азбука къакIулссагу цу уссар? БувчIлайрив бакъассар: ци иш буссар зунттаву ягу Астраханнай ххяххан бувсса нувщул евролущал, нувщигума ххира хьун багьарча? Ци дахIаву дуссар, учиннуча, Къизлардал ппиринжрал долларданущал? Уттинин ппал, утти гъал дикIайссарив, цIуку цава-ца буна? ДукIува, кIурссанува 300-400 азарда къурушран лавсъсса приора – машина, бух хьусса машина, циванни гьашину ххирану бахлахисса? Дустурахь – экономистътурахь буссара цIухлай, валлагьий, биллагьий, дустал – экономистъталлив хьхьарасса, наварав къухънасса къакIулли, къабувчIлайри бусса ттун. Спекулянтъталли мукун буллалими тIий бур, Совет билаятран душмансса махъ цIуницIа утта буккан буллай. Мукун буллалинахь мабулларду учин хIукумат дакъассарив? Аьрасатнаву законну дуручлай буссарив, бакъассарив? Антимонопольная служба чун бурувгун буссар?
Гьар кьини баяй ва уттигу баллайнма бур, Аьрасат – бюхттулсса билаятри, авай, цIакьсса державар тIисса махъру. Циванни бюхттул билаятрал санкциярдацIун бавхIусса масъаларду цала агьалинайн щавщи биянну щаллу буллан аьркинссагу? Европанал санкциярдал хьхьичIун къалханну дургьунни агьалинал барчабакъашиву.
Ва аьвамшиву… Арулва телевизор машан лавсунни ттул чIаххучувнал, арцу зия хьун най дусса дур, арцул кьимат багьан най бусса бур тIий. Ца-ца къатлуву шан-шанма телевизоргу бивхьуну щяикIанссар, къакIулли! Яла туну ми ккашин букантIиссарив, мякьлин хIачIантIиссарив?
Дардирдал пIякь чавай ур цама чIаххучу – фермер. Кьаркь дикI дуван биххан буллуну бур мунал буржирай чIаваоьллу, арцу интту дулунну.
Уква къаучиннача, бачIи багьлуй хъанай бур. Инттунин мунал ттуршазарда къурушрай ци хIал личIавив щин кIулссар?
Бюхттул билаятрал цал ттигу буруккинттаравун бивчунни агьали. Дахьа цайнма цивппа бувкIсса агьали.
Гьай, база-мискин, къуруш! Евро ва долларду уттанмайгу утта хъанай, лахъинмайгу лахъи хъанай нанийни, навт кьюкьайссарчала тIий дуккайсса кьини вийх?!
Инфляция тIисса баламур мудангу «бурув, бакъарув!» къакуну, хаварбакъулий бучIайхха. «Бивзрув, бурув!» къакIул инфляциялухь «Ча дуркра!» учинссавагу рухсат бакъая, хъанахъимур бувчIиннин, ссувссусса ссупралух ливчIунна. Хьумур хьуссар, хьулуцIух бавцIуссар! Электроникар учинсса ца зат на къаларсъссар. Вайминнал, янна шюшай машинарду, холодильникру ялунчIиннин-тулунчIиннингума ласайний, ичIура аьркинсса утурагу къаларсъссар. ЯлунчIин ласун диртссар. Ягу тулунчIин. Ттунгу, на кунмаминнангу ливчIмур цар бусса: цIусса шинавун ша ласлай, инфляциялухь ххуллухъин учин, зана къадикIай ххуллийх насу учин. Евролухь ва долларданухь хIаялува къабуклай, тIулуй бикIира, база-мискин къурушрайгу цIими бувара учин. Навтлихьгу циван кьюкьлакьиссара, долларданущал цIакьну циван къаталатиссара куну дяъви буван. Туну щийн дяъвава, ссайн дяъвава? Сбербанк батлавав, экономистътал оькки-ккаккун буллавав? ХIукуматрайн ссугру дуллавав?
Учин ливчIмургу тIий, пасат дурксса дакIнихьгу кьадагьу увкуну, бусанна ттула дакIнил мурцIний чантIа тIий бушиву тамахIругу: гьай-балики… Бавал «гьай-баликирду» бакъассар учай. «Гьай-баликирду» бакъа пайда бакъассар, ттул ххира бавай! Гьай-балики, ЦIусса шинал, ЦIукул шиналвагу цIими бан жуйва.
Гьай-балики, база-мискин къурушгу давлатлув хьун, цIакь хьун, битав хьун, къаритайнахьгу ритира увкуну, уттиния тинмай бюхъулий ша ласлан. Бюхъулий цIакь хъанан.
ЦIусса шинавун – гьай-баликилущал!
