Декабрьданул 9-сса кьини хъанай дур Совет Союзрал ва Аьрасатнал Вирттавран хас дурсса байран.
Амин Аьбдуллаев
Ттунгу ччан бивкIунни Дагъусттаннай цалчин Социалист ЗахIматрал Виричунал цIанин лайкь хьусса багъманчи Хинчалов Гъазияту ца-кIива махъ чичин. Мяйжаннугу,
Гъазил ГьунчIукьатIув алжаннул багъру бунни тIий бикIайва. Му хъинну тIайлассар. ХьхьичIва-хьхьичI ГьунчIукьатIув багъру бувну бур ванияр 500-600 шинал хьхьичI Гургахъул тIисса инсантурал. ЦIанасса Аьлиев Неъматуллагьлуя ва Аьлия бивзми миннал наслу хъанай бур. Мигу цIакьсса багъманчитал бивкIун бур. Уссурвал Неъматуллагьлул ва Аьлил жалгъа бувну, ца мурхьирай 7 журалул хъюрт-гьивч хьун бувну бивкIун бур. Гъази цува буслан икIайва мунияту. Цанмагу Гургал Аьлия мадарасса зат лавхьхьуссар тIий. Амма Гъазил хьун бувссар Дагъусттаннай чувчIав бакъасса коллекционный багъ. Шикку бакъасса ахъулссаннул мурхьру бакъассия. Кьураксса гектар багъурдил дунагу личIи-личIисса кIанттурдай, Ардарав, ХIажалтал неххамачIув Гумах, Ччуччилул щинай, Кьурбаннул сунув, щарнил ахъуву, Ялтту къурув, амма Оьхрахаллил багъ лапва личIийсса бикIайва. Мунийн Алжаннул ахъ учайва. Шикку бикIайва гьивчул мурхь одеколондалул кьанкь дусса гьивч шайсса. Шикку бакъасса ахъулссаннул мурхьру къабикIайссия: 40 журалул хъюрт, 100-сса журалул гьивч, личIи-личIисса ахъвазан, кякан, цIулит, бяъли, кураг, ккурмуз, кьюнукьи, хасав, смородина, малина. Учин мукъун, ва багъраву дакъасса ахъулсса дакъая Гъазил хьун дурну. Му багърая цIана аьш-бакI дакъар, Гъазил захIмат ялун дирсса никиран ккаккан.
Хинчалов Гъазил бивхьусса захIматран Совет хIукуматрал лавайсса кьимат бивщуну, ванан ЗахIматрал Виричунал цIа дуллунни. Ва хъанай ур Дагъусттаннай цалчинсса Герой Социалистического Труда багъманчи. Ванал чIярусса цаймигу наградартту дия, ва увчIуну ия Дагъусттаннал Верховный Советрал депутатну.
ГьунчIукьатIрал жяматрачIа Хинчалов Гъазил цIа абадссар.
