Шинал ахирданий Аьрасатнал Президент В. Путин журналистуращал хьунаакьайсса аьдат дур. Декабрьданул 18-нний Аьрасатнал Президентнал бунни цалва 10-мур пресс-конференция Аьрасатнал ва кьатIаллил билаятирттал журналистътуран. Пресс-конференциялий гьуртту хьунни 1259 журналист.
2013 шинал Путиннул 4 ссятрал мутталий жавабру дуллуна 52 суалданухьхьун. 2008 шинал 4 ссят ва 40 минутIрай Путиннул жавабру дуллуссар 106 суалданухьхьун.
2014 шинал пресс-конференциялий суаллу укунсса бия. «Собеседникрава­сса» Лиана Налбандяннул цIувххунни: «Ина гьанавиххи къашарав политикалул фронтрай цалчинма ушаврия?» — куну. «Му даххана шайсса затри, муних буниялану уруган аьркинссар. Даву дуллан, зун аьркинссар, на гьанавиххи къашара», — увкунни В. Путиннул. Ветерантурал хIакъиравусса суалданун жавабран Путиннул бакIрайн лавсунни цинявннан кумаг бан.
Калининградуллал областьраясса суал бия «Баргълагавал билаятирттащалсса ара зия шаврицIун региондалул ишру ссайн букканавав?» тIисса. Мунин В. Путиннул увкунни «Нигьабуслан къааьркинссар, амма уртакьну зузаву лядуккан дуллалияра, аьрасатнал анклаврал географиягу хIисавравун ларсун».
Суал бия кьатIаллил машинартту машан ласун ягу къаласун тIисса. «Чил билаятирттал машинартту машан ласаврин къадагъа дихьлан мяъна дакъар цIанасса жулла арцул хIалкьазиялух бурувгун», — увкунни Президентнал.
Ххуллурдал кьяйдарду лиян дуллалиминнан аькIри ххи даврил хIакъиравусса суалданун Путиннул увкунни: «АькIри лапра гьарзасса дикIан къааьркинссар, амма миннул бахьтта наними буручлай бур».
Гьартану хъиривмур номерданий чичинну.
ХI. Аьдилов