Жулва хъуншагьрулий, цила багьайкунсса кIинтнил замгьарду хьуннин, сайки гьарца нюжмардий шагьрулул къуллугъирттал, идарарттал зузалт ва пишакартал гьурттусса субботникру шайссар. Вана вай гьантрайгу хьунни МахIачкъалалив ухссавнил чулуха буххайсса ххуллуцI цIинцI-ччюрк датIлатIисса, Кировский райондалул администрациялул бакIчи СалихI Сагидов ва ванал каялувшиннаралусса пишакартал гьурттусса субботник-акция.
Акциялувух мукунма гьуртту хьунни ва райондалийсса Финансово- экономикалул ва Промышленностьрал колледжирттал студентъталгу.
Вай циняв цачIун хьуну, цанма-цанма ккаккан бувсса кIанттурду цIинцI-ччюрклицIа марцI буллай буна, тракторду ва эксковаторду дулуркьуну, халкьуннал, цукунчIавсса чагъардугу бакъанма, къабагьайсса кIанттурдай бувсса ттучанну ва цаймигу коммерциялул объектру лекьан дуллай дия.
СалихI Сагидовлул бусаврийн бувну, укунсса объектру лекьан дуллалаврицIун, халкьуннал оьрмурдан нигьачIисса, СниП-рал ихтияр къадуллуну бивхьусса газрал цистернардугу аьрщарава буккан буван тIий бур. Укунсса давуртту дувансса амру бувну бур уттигъанну щалва Ахъушинскийл кIичIиравалу ххал бувсса МахIаммад Сулаймановлул.
Ва акциялувух гьурттушинна дурну дур сайки 150-нниха ливчусса инсантурал. Кировский райондалул администрациялул бакIчинал кIицI лавгунни, вай кIанттурду марцI бувну, бакьин бувну дузал хьунсса давуртту лахъи къалагантIишиву.
