Вай гьантрай Дусшиврул къатлуву тIиртIунни гьунар бусса, сурат дишаврил магьирлугъраву цIадурксса художник, жула лаккучу Буниямин Каллаевлул (Лак Буни) давурттал выставка. Авторнал тамашачитурал хьхьичIун ду­ккан дурну дур кьураксса сурат. Художникнал канил дирхьусса чIяруми давурттив дусса дур заллухъру бусса коллекциярдаву ва Москавуллал галереярттаву.

Залму АьбдурахIманова
Буниямин Каллаевлул сурат­ру дур дакIнил гьарцагу хIужра тIитIайсса, чаннал ва умудрал видурцIусса, рувхIанийсса оьр­мулул дазурду гьарта дуллалисса.
Выставкалий тамашалун дирхьусса суратирттая буслай, автор кIицI лаглай ур шикку дирхьусса циняр суратирттал ца аьмшиву душиврий – гьарца суратрая, чанна лархъсса кунна, цинма хасъсса чани най бушиву.
«Ттулла дакIнивасса чIу баяншиврул, аьркин шай бакIраву з­агьир хьумур пикри лаласун, муних личIлулну ябитан, ви­чIидишин.
Инсан цана цува цу уссарив увчIуну, цалла дакIнил чIу цанма бавукун, хъунасса ЗанначIангу ца шаттирал ухьурчагу гъан хъанай ур. Му хIалатраву цайми мюрш-кьюршсса, къалпсса, кьювкьусса пикрирдугу, хияллугу цайнува цивппа ххияйнуккар.
Мукунна шикку дуссар, жулла авадансса тIабиаьт чIалачIи дурсса, зунттал, хьхьирил суратругу. Хьхьири ва зунттурду бакъа жулва Дагъусттан сайки цамур куццуй ккаккан бан бюхъайшивугу къакIулли. ТIа­биаьтрал буллугъшиву ккаккан давура Дагъусттан ккаккан баврин ккалли бавияв», — буслай ур художник.
Выставка тIитIин бувкIсса хъамаллуравух ва тамашачитуравух бия хIукуматрал къуллугъчитал, авторнал дус-ихтивартал, МахIачкъалаллал магьирлугърал факультетирттал ва отделениярттал преподавательтал ва студентътал, художествалул школардал дуклаки оьрчIру.
ДР-лул миллатирттал политикалул иширтталсса буллалисса министрнал хъиривчу БахIанд МахIаммадовлул бувсунни Буниямин Каллаев Третьяковский галереялуву ва Москавуллал, Петербургуллал ца яла цIадурксса выставкардай дуккан дувайсса давурттал автортуравасса ца ушиву.
«Жула ватанлувнал дирхьу­сса суратру билаятрал хъуншагьрурдал галереярттаву душивугу жунма цинявннан пахру бан лайкьсса ишри. Ванал чIявусса произведениярттал халкьуннал коллекциярду чIюлу буллай бу­ссар. Цанчирча магьирлугъраву за бувчIайсса, миннул хъирив лавсса гьарначIа тIалавну дуну тIий Бунияминнул суратру», — увкунни министрнал хъиривчунал.
ДР-лул культуралул министр­нал хъиривчу Лилия Жамалуттиновал Зарема Ажуевнал цIанияту выставкалул автор барчагу увну, кIицI лавгунни Буниямин Каллаев, ца художник акъа, чIявусса бигарду щаллу буллалисса художник-мистик, художник- философгу ушиву.
«Бунияминнул суратру дур караматсса чани нанисса, жула оьлуркъусса дакIру рахIат дан­сса чараннах луглагисса, жулва пикрирду, хияллу марцI буккан буллалисса. Мяйжаннугу, гьарца произведение бур жува цIаннал ххуллуя чаннайн буцлацисса, вихшала-умуд бишин буллали­сса», — увкунни Лилия Жамалуттиновал.
Мукунма шикку махъру лавхъунни ДР-лул Художниктурал союзрал вакилтурал, магьирлугърал аралувусса пишакартурал ва дус-ихтивартурал.
Махъру лахълахъиминнал кIицI лавгунни хIакьинусса кьини Лак Бунил давурттив ца яла тIалавсса, сий дусса давур­ттан хIисавну душиву ва Аьрасатнал хъуни шагьрурдай бакъа, ванал давуртту Германнаву ва Италиянавугу тамашалун дирхьуну диркIшиву. Буниямин Каллаев ур Аьрасатнал лайкь хьусса художник, АьФ-лул Художниктурал союзрал вакил, Аьрасатнал художествалул академиялул член-корреспондент. ХIакьинусса кьини Дагъусттаннал маданиятраву хъунмасса бутIа бивхьусса, му машгьур дуллалисса цIадурксса художник зий ур Рерихлул цIанийсса музейращал цачIу.