ЦIуссалакрал райондалия

lolo_9Жагьилтурал иширттал министр ЦIуссалаккуй
Ноябрь зурул 11-нний ДР-лул жагьилтурал иширалсса буллалисса министр Заур Кьурбанов увкIунни ЦIуссалакрал райондалийн.
Ва хьунаавкьунни ЦIуссалакрал райондалул бакIчи ХIажи Айдиевлущал, ДР-лул Халкьуннал Мажлисрал депутат Зайнуллагь Мирзоевлущал, райондалул Жагьилтурал политикалул комитетрал председатель Тимур Абакаровлущал ва Жагьилтурал советрал председатель ХIулаймат Рамазановащал.
Заур Кьурбановлул барчаллагь увкунни ХIажи Айдиевлухь райондалийсса жагьилтурал политикалул комитетрал чIарав ацIлай, кабакьу буллай тIий. Мунал лавайсса кьимат бивщунни «Эффективный муниципалитет» тIисса жагьилтурал форумрай гьуртту хьусса ЦIуссалакрал делегациялун. Ва хьунабакьаврий ДР-лул жагьилтурал иширтталсса буллалисса министерствалул ва ЦIуссалакрал райондалул кьутIи дунни, паччахIлугърал жагьилтурал политика иширайну щаллу даву ва хьхьичIуннай даву мурадрай, хIала-гьурттуну зунсса.
Ххалбивгьунни шикку ЦIусса­лакрал райондалул бакIчиначIасса Жагьилтурал советрал даврил масъалартту. Мукунма ихтилат хьунни ДР-лул «Человеческий капитал» тIисса приоритетсса проектравун багьайсса «Молодежный Дагестан» проектрал хIакъиравугу.
Тимур Абакаровлул бувсунни ЦIуссалакрал жагьилтурал центрданул терроризмалийн, экстремизмалийн, наркоманиялийн къаршину дурсса мероприятиярдая.
Заур Кьурбановлул кIицI лав­гунни ялун нанисса шинал ла­хъа-хъунну кIицI лагантIишиву Ххувшаву ларсун 70 шин хъанахъисса байран ва мунийн бувну комитетрайнгу тапшур бунни му байрандалийнсса хIадуршиннарду дуван. Мукунма Заур Кьурбановлул шикку ххалбивгьусса масъаларттал хIакъираву маслихIатругу ккавккунни. ХIажи Айдиевлул бувсунни цува Жагьилтурал комитет сиптачи хьусса проектру дузрайн дуккан даву мурадрай чIарав ацIан мудан хIадурну ушиву.

«Учитель года-2014»
Щалагу Аьрасатнаву нанисса «Учитель года-2014» конкурс хьунни уттигъанну ЦIуссалакрал райондалийгу. Гьашинусса райондалул конкурс ларгунни ЦIуссалакрал 1-мур школалий.
Мунивух гьуртту хьунни райондалул цинявппагу школарду. КIулсса куццуй, ва конкурсрал агьаммур мурад бур гьунар бусса учительтал ялун личин баву, миннал чIарав бацIаву ва райондалул хьхьичIунми учительтурал опыт цайминнангу кIул баву. Райондалийсса конкурс сакин хьуну дия, «Педагогическая мастерская» ва «Учебное занятие» тIисса, кIива бутIуя. «Педагогическая мастерская» тIимур бутIуву гьуртту хъанахъиминнан 15 минутIрал му­тталий презентация дурну, цалла даврил опыт ккаккан бан аьркинну бия. Миккува ккаккан бан багьлай бия кIулшивуртту дулавриву цIушиннарду ишла дуллансса куц ва миннуйну хьусса ккаккияртту. Цинявппагу гьуртту хъанахъиминнал ккаккан бунни цалва пишалул даража, эрудиция ва итххяххаву.
«Учебное занятие» тIимур конкурсраву учительнан аьркинну бия цала даврил опыт ккаккан буллалисса тIиртIусса дарс дишин. ЧIявуми учительтурал ккаккан дунни цинярдагу дарсирдал дянивсса дахIаву, ми дарсргу дирхьунни интернет-компьютерду ишла бувну. Масала, ЦIуссачIурттащиял 1-мур школалий Ися Муцаевлул дирхьу­сса ингилис мазрал дарсирай дуклаки оьрчIаща бювхъунни Китайнавасса цала чIунархIал оьрчIащал видео-связьрайхчIин ихтилат буван.
Чапаевкаллал 2-мур школалул обществознаниялул учитель Сусана Асбаровал дарсирай 7-мур классрал дуклаки оьрчIал ихтилат бунни Дагъусттан Республикалул вице-премьер Шарип Шариповлущал. Ва конкурсраву цалчинсса кIанттурду бувгьунни Сусанна Асбаровал ва Ися Муцаевлул. Амма, даврил стаж ва методикалул хьхьичIуннайшивуртту хIисавравун ларсун, жюрилул хIукму бунни 1-мур кIану Асбарова Сусанан булун. Гихунмай республикалий хьунтIисса вара конкурсрай ЦIуссалакрал райондалул чулуха гьуртту хьунтIиссар Сусана Асбарова.
Конкурсраву 2-мур кIану бувгьунни ЦIуссалакрал 1-мур школалул оьрус мазрал ва литературалул учитель Жамиля Аьлиевал, Гьамиящиял 2-мур школалул оьрус мазрал ва литературалул учитель Алпият Насибовал ва ЦIуссалакрал гимназиялул математикалул учитель Тамара Кьурбановал.
Конкурсраву 3-мур кIану буллунни ЦIуссаккуллал 2-мур школалул ингилис мазрал учитель Светлана Кьурбанован, Гьамиящиял 1-мур школалул биологиялул учитель Жамиля Кьурбанован ва Чараваллал школалул оьрус мазрал учитель Мадина Рашаеван.
Конкурсраву ххув хьуминнан ва гьуртту хьуминнан дуллунни ХIурматрал грамотартту ва багьлул ххирасса бахшишру.

Жагьилсса ахттарчитурал конференция
Вай гьантрай ЦIуссалакрал райондалий хьунни «Шаг в будущее» тIисса жагьилсса ахттарчитурал республикалул ХХ-мур элмийсса конференция.
Конференция баврил агьаммур мурадгу хьунни дуклаки оьрчIру ахттаршиврул даврихун багьан баву, миннал интеллектуальный­сса творчество итххяххан даву ва хьхьичIунсса ахттарчитуращал оьрчIру хIала-гьуртту баву.
Райондалул 21 школалува ва конкурсраву гьуртту хьунни 16. Дуклаки оьрчIал ахттаршиннарду дурсса, чIявусса, личIи-личIисса темарду дусса, докладирттайну конференциялул даву лавайсса даражалий ларгунни. Конкурсраву гьуртту хьуминнал элмийсса каялувчитуращал архIал ккаккан дунни цалла ахттаршиннардал видео-роликру ва стендру. Райондалул конференциялул конкурсрал хIасиллу дурну, ххув хьуми гьуртту хьунтIиссар «Шаг в будущее» тIисса республикалулмур конкурсрайгу.
И. Саидова
А. Аьбдуллаева