Ларгсса нюжмардий, октябрьданул 24-нний, МахIачкъала шагьрулул тарихрал музейраву тIиртIунни художествалул ва документал выставка СССР-рданул халкьуннал артистка Барият Мурадова ниттил бувну 100 шин шаврин хас дурсса.
Бадрижамал Аьлиева
Выставка тIитIлатIисса батIавривух гьуртту хьунни ДР-лул культуралул министр Зарема Буттаева, МахIачкъалаллал шагьрулул администрациялул бакIчинал хъиривчу Татьяна Гамалей, Аьрасатнал халкьуннал артист, Къумукьнал театрданул художествалул каялувчи Айгум Айгумов, Изобразительный искусствардал музейрал директор СалихIат ХIамзатова ва чIявусса цаймигу.
Махъру лахълахъими цинявппагу кIицI лаглай бия Барият Мурадова бивкIшиву ххишала бакъа бюхъу ххисса артистка, гьунардал авадансса дагъусттаннал аьрщарайсса сахIналул минахуртуравасса ца. Зарема Буттаевал барча бунни МахIачкъала шагьрулул тарихрал музей выставка тIитIаврищал ва укун хъуннасса проект сакин даврищал, бувсунни Барият Мурадова Ухссавнил Ккавкказнаву хьхьичIва-хьхьичI лайкь хьушиву СССР-данул халкьуннал артисткал цIанин ва хъанай бушиву му цIанин лайкь хьусса Дагъусттаннаясса бувагу ца актриса. Ялагу, Барият Мурадова Дагъусттаннай цалчинма цалчин лайкь хьуну бур Дагъусттаннал халкьуннал артисткал цIанин. ДР-лул культуралул министрнал ялагу бувсунни Культуралул шинал лагрулуву баян бувшиву Барият Мурадовал цIанийсса конкурс, мунивух гьуртту хьунтIишиву республикалул 12 театрданувасса актертал, Барият Мурадовал аьпалул вечер хьунтIишиву Оьруснал театрдануву ноябрьданул 14-нний, Бахрушевскийл музейраву тIурча хьунтIишиву ванин хас дурсса фотовыставка.
— Жулва билаятрай 2014 шин дур Культуралул шин, жулла республикалий тIурчан ва шин дур Барият Мурадован 100 шин хъанахъисса шингу. ХIат-хIисав дакъасса гьунарданул заллуну бивкIсса Барият Мурадова бивкIссар ва личIлачIиссар театрданул ссавнийсса яла чаннамур цIукуну. Му бакъассагу, Барият Мурадова бивкIссар Дагъусттаннал халкьуннал артистка, РСФСР-данул Станиславскийл цIанийсса премиялул лауреат. Мунил медаллал ва орденнал дазу-зумарагу дакъар. Му бивкIссар ляличIийсса личностьну, Дагъусттаннал культуралул мусил фондну, — увкунни Зарема Ажуевнал.
Татьяна Гамалейл цилва ихтилатраву кIицI лавгунни ва выставка хIадур дуршиву шагьрулул личIи-личIисса организациярдал хIарачатрайну, Барият Мурадова бивкIшиву жулла республикалул гьунар бусса инсантурал кьюкьлувусса багьа бищун къашайсса «самородокну». Татьяна Владимировнал дакIнийн бувтунни ва выставка хъанахъишиву Тарихрал музейрал Дагъусттан Республикалул БакIчинал грант духхаврил хIасилну, бувсунни ва выставкалий душиву личIи-личIисса дахха-дахханасса 500-нния лирчусса экспонатру.
Гихунмай махъру лавхъунни СалихIат ХIамзатовал, Айгум Айгумовлул ва м.ц.. Ихтилатру буллалими чIурчIав дуллай бия ва гьарцагу чулуха итххявхсса караматрал актриса бивкIшиврий, мунил гьунарданий хIайранну бивкIшиврий, билаятрал театрданул искусствалул паччахIтал, хIакьинусса выставкагу республикалул культуралул фондравун духхантIишиврий.
— Жулва бучIантIимур — му жулва тарихийсса лавгмурди. Жуйвасса буржгу — му буруччавур. Барият Мурадова бия дазу-зума дакъасса гьунар бусса актриса. Мунил дакъая ларайсса кIулшиву, му станиславскийл системалийн бувнугу зий бакъая, мунил бия актершиврул цинмава хасъсса ляличIийссава гьунар, — увкунни Айгум Айгумовлул.
МахIачкъалаллал тарихрал музейрал директор Зарема Дадаевал увкунни:
— Ва анжагъ выставка дакъар, ва ванил мяъна-мурадраву цалла ччаву ва аякьа дирхьусса инсантурал хъинну хъунмасса захIматри. Ва выставкагу жущара хъунмасса актрисал аьпалун дуван шаймунил анжагъ чIивисса бутIар, — куну.
Выставка дикIантIиссар декабрьданул 10-ннийн дияннин.
